Ye we shɔfɔ Yɛnŋɛlɛ li sɔn
66
1 Yurukɔɔlɔ to wi sɛwɛ yurugo. Yurugo. Yɛnŋɛlɛ gbɔgɔyurugo.Yaa Yɛnŋɛlɛ li sɔnni yɔgɔrimɔ gbɔɔ ni, yoro dunruya woolo wele!
2 Yaa yuuro koo yaa li mɛgɛ ki gbɔgɔwɔ pi yari,
yaa li sɔnni yaa li gbogo!
3 Yege yo Yɛnŋɛlɛ li kan fɔ: «Ma kapyegele ke yɛn fyɛrɛ gbɔrɔ ni,
ma yawa gbɔɔ pi kala na, ma juguye pe yɛn na kanŋguuro kanni ma yɛgɛ sɔgɔwɔ.
4 Dunruya woolo pe ni fuun pe yɛn na fɔli ma yɛgɛ sɔgɔwɔ nɔɔ gbogo,
na yuuro koo nɔɔ gbogo,
na yuuro koo nɔɔ mɛgɛ ki gbogo.» Wɔnmatigiwɛn laga.
5 Ye pan ye Yɛnŋɛlɛ li kapyegele ke wele,
kagala ŋgele li yɛn na piin sɛnwee piile pe kan ke yɛn fanŋga ni!
6 Lì kɔgɔje wi waga ma tawara yirige,
ma ti a leele pè tanga tɔɔrɔ na maa kɔn ma yiri.
Ki kala na, we yɛn na yɔgɔri li kapyegele ke kala na†.
7 Li yɛn tegere ti na yaraga pyew ki go na fɔ sanga pyew, li yawa pi fanŋga na;
li yɛgɛ yɛn cɛngɛlɛ ke na, na ke kɔrɔsi,
jaŋgo mbele pè yiri ma je, paga ka pe yɛɛ yirige. Wɔnmatigiwɛn laga.
8 Yoro cɛngɛlɛ woolo, yaa Yawe Yɛnŋɛlɛ li shari!
Ye ye magaŋgala ke yirige yaa li sɔnni!
9 Lo fanŋga na we yɛn yinwege na,
lii yere ki na we to.
10 E, Yɛnŋɛlɛ, mà we wa ma wele,
mà we wa ma wele, paa yɛgɛ ŋga na pe ma warifuwe wa mbe wele kasɔn mboo pye kpoyi*.
11 Mà we le mɛrɛ ni,
mà jɔlɔgɔ gbɔgɔ wa we na.
12 Mà ti we juguye pè pe shɔnye pe fe ma lugu we yinrɛ ti na ma toro;
a wè jɔlɔ ndɛɛ wè kasɔn naa tɔnmɔ kɔn ma yiri,
ɛɛn fɔ mà we tile ma we wɔ wa ki kagala ke ni ma we kan wogosaga ni.
13 Mi yaa kari wa ma shɛrigo gbɔgɔ* ki ni mbe sa saara sogoworo* wɔ ma yeri,
mi yaa yɔn fɔgɔlɔ* ŋgele mìla kɔn ma yeri ke tɔn.
14 Ki yɔn fɔgɔlɔ koro wɛlɛ mìla kɔn na yɔn sɛnrɛ ti ni,
sanga ŋa ni mìla pye na jɔlɔ we.
15 Mi yaa yaayoro nda tì tɔrɔ ta wɔ ma yeri saara sogoworo,
naa simbapɛnɛ konaa wusuna nuwɔ taan* saara ni;
mi yaa napɛnɛ konaa sikapɛnɛ wɔ ma yeri saraga. Wɔnmatigiwɛn laga.
16 Yoro mbele fuun ye maa fyɛ Yɛnŋɛlɛ li yɛgɛ, ye pan ye logo,
ŋga Yɛnŋɛlɛ lì pye na kan, mi yaa ki yɛgɛ yo ye kan!
17 Mì gbele mali yeri lilan saga,
a mì ya mali sɔn wa na yɔn.
18 Ndɛɛ ki pye mì kapege yaga wa na nawa,
Yawe Yɛnŋɛlɛ li se jɛn na logo na yeri.
19 Ɛɛn fɔ, ye wele, Yawe Yɛnŋɛlɛ lì logo na yeri,
lì nuŋgbolo jan mala yɛnrɛwɛ pi logo.
20 Sɔnmɔ yɛn Yɛnŋɛlɛ li woo,
katugu lii je na yɛnrɛwɛ pi na;
lii si je mbeli kagbaraga ki pye na kan!