SƐWƐ SHYƐN WOO
Yuuro 42--72
Lere ŋa wila Yɛnŋɛlɛ li jaa,
42
1 Yurukɔɔlɔ to wi sɛwɛ yurugo. Kore pinambiile pe nagawa yurugo†.2 Safuwe ŋa wɔgɔ wì yigi wi maa lafogo tɔnmɔ pi lagajaa yɛgɛ ŋga na,
ee, na Yɛnŋɛlɛ, pa mi yɛn nɔɔ lagajaa ma.
3 Yɛnŋɛlɛ li la ki yɛn na na paa tɔnmɔ wɔgɔ ma kaa lere yigi we, Yɛnŋɛlɛ na yinwege wolo le.
Mi yaa ka ye wa li shɛrigo gbɔgɔ* ki ni wagati wiwiin mbe sa yere li yɛgɛ sɔgɔwɔ?
4 Yɔnlɔ naa yembinɛ, yɛntunwɔ po mi yɛn pi na suyi paa na suro yɛn;
ma si yala, pe maa ki yuun na na sanga pyew fɔ: «Ma Yɛnŋɛlɛ lo yɛn na yiŋgi piin?»
5 Ma si yala, na mi ka nawa to ki kagala ŋgele ke na,
ke mala jatere wi lɛgɛ na na, fɔ:
Faa, mìla pye na tanri wa janwa gbɔlɔ li sɔgɔwɔ;
mi ma keli pe yɛgɛ na tanri na kee wa Yɛnŋɛlɛ li go ki yeri,
wa yɔgɔrimɔ yuuro naa Yɛnŋɛlɛ li sɔnmɔ yuuro ti sɔgɔwɔ;
maga ta janwa wìla pye na yɔgɔri fɛti wi na fɔ jɛŋgɛ.
6 E, mi we, yiŋgi na mbe silan wire ti fanla na yɛɛ na?
Yiŋgi na mbe sila yogo mbaa na yɛɛ tooro na cɛnlɔmɔ pi kala na?
Mbanla jigi wi taga Yɛnŋɛlɛ li na ko mbɔnrɔ, katugu mi yaa li shari mbeli sɔn naa,
lo li yɛn na shɔfɔ konaa na Yɛnŋɛlɛ.
7 Na Yɛnŋɛlɛ, na nawa pì wɔ na na;
ki kala na, mbanla ta wa Zhuridɛn gbaan yɔn tara ti ni, naa wa Ɛrimɔ yanwira lara ti na, konaa wa Mizeyari yanwira lara ti na,
na jatere wi yɛn ma na.
8 Ma ma tɔnŋgbɔɔ pi pye pi maa tinmɛ gbɔɔ yinrigi,
tɔnŋgbɔɔ pa ma taga tɔnŋgbɔɔ pa yɛgɛ na, na fuun na tinni ŋgbanga;
ma tɔnmɔ mba pila fuun konaa mba pila yinrigi na tuun ŋgbanga, mà ti a pì toro na go na, mala li pew.
9 Yɔnlɔ na, Yawe Yɛnŋɛlɛ li ma li kagbaraga ki pye na kan,
yembinɛ mi yaa yurugo kɔ li mɛgɛ ni;
Yɛnŋɛlɛ na lì ti mi yɛn yinwege na, mi yaa lali yɛnri.
10 Mi yɛn na jaa mbege yo Yɛnŋɛlɛ li kan, lo na li yɛn na walaga, nala go singi fɔ:
«Yiŋgi na, a ma si fɛgɛ na na?
Yiŋgi na, mbe sila tanri mbaa tooro nandangawa ni,
jɔlɔgɔ ŋga na juguye paa na jɔlɔ ki kala na?»
11 Na winfɛnnɛ pe yɛn nala tifaga
fɔ mala wire ti gbo na na;
pe yɛn naga yuun na na sanga pyew fɔ:
«Ma Yɛnŋɛlɛ li yɛn se yeri?»
12 E, mi we, yiŋgi na, mbe silan wire ti fanla na yɛɛ na?
Yiŋgi na mbe sila yogo mbaa na yɛɛ tooro na cɛnlɔmɔ pi kala na?
Mbanla jigi wi taga Yɛnŋɛlɛ li na ko mbɔnrɔ, katugu mi yaa li shari mbeli sɔn naa;
lo li yɛn na shɔfɔ konaa na Yɛnŋɛlɛ.