Zhɔbu wìla para
29
1 Kona, a Zhɔbu wì si ka taga wi lelɛɛlɛ sɛnyogo ki na naa, ma yo fɔ:2 E, ndɛɛ ki pye mbe ja ya sɔngɔrɔ mbe pye paa wagati ŋa wì toro faa wi yɛn,
mbe pye paa wagati ŋa Yɛnŋɛlɛ làa pye na wele na na wi yɛn!
3 Wagati ŋa ni li fitanla wìla pye na yiin na go na,
a li yanwa pìla na yɛgɛ sinni wa diwi wi ni.
4 E, ndɛɛ ki pye mbe ja ya pye paa yɛgɛ ŋga na mìla pye wa na lefɔnrɔ sanga wi ni;
ki wagati wi ni, Yɛnŋɛlɛ làa pye wɛɛnrɛ na na ni, na wele na go ki go na.
5 Ki wagati wi ni, Yawa pi ni fuun fɔ wìla pye na ni,
na piile pe ma cɛn mala maga.
6 Ki wagati wi ni, kìla pye ma tanla, a mila na tɔɔrɔ ti jogo wa nɔnɔ wi ni,
oliviye tige pire sinmɛ lɛgɛrɛ la pye na fuun na yinrigi wa walaga ki ni na kan†.
7 Kìla pye, na mi kaa kee wa lelɛɛlɛ* pe gbogolosaga wa ca ki mbogo yeyɔngɔ ki na,
mbe sa cɛn wa finliwɛ pyesaga, wa katogo,
8 na lefɔnmbɔlɔ pe kanla yan mila paan, pe ma yiri wa, ma laga ki kan na yeri,
lelɛŋgbaara ti ma yiri ma yere mbanla gbɔgɔ.
9 Ca ki fanŋga fɛnnɛ pe ma pe sɛnrɛ ti yerege,
mbe kɛɛ taga yɔn na, mbe pyeri mbanla gbɔgɔ.
10 Ca ki teele pe ma pe magaŋgala ke sogo,
pe ŋgayinŋgele ke ma mara wa pe yɔnrɔ ti naayeri.
11 Lere ŋa wìla pye na nuru na yeri, wo la pye na yuun fɔ fɛrɛwɛ yɛn na woo;
lere ŋa wìla pye nala yaan, wo la pye nala mɛtanga yinri;
12 katugu kìla pye, mi ma fyɔnwɔ fɔ ŋa wìla pye na sagawa jaa wi shɔ,
sagafɔ sila pye pijiriwe ŋa na, mi maa saga.
13 Kìla pye, lere ŋa kaa jaa mbe ku wi ma duwaw pye na kan;
mìla pye na naŋgunjaala pe nawa pi yinŋgi pe na.
14 Mbe pye mbe sin kìla pye na yeri paa yaripɔrɔ yɛn na na,
na kaselege ko kìla pye paa derigbɔgɔ yɛn na yeri konaa paa gbɔgɔwɔ njala yɛn.
15 Muwi mìla pye fyɔɔn wi yɛngɛlɛ wele, mbaa wi yɛgɛ sinni,
konaa jejɔgɔlɔ fɔ wi jegele wele mbaa wi sari.
16 Muwi mìla pye fyɔnwɔ fɛnnɛ pe to we, na pe go sinni,
kìla pye mi ma nambanmbala pe kala li cancan jɛŋgɛ mbe yere pe ni.
17 Ɛɛn fɔ kìla pye mi ma lembasinmbele pe tugbilala pe kaari pe na,
mbe yaara nda pè shɔ ti tile mberi wɔ wa pe yɔn.
18 Ki wagati wi ni, mìla pye nala yɛɛ piin fɔ mi yaa ka ku yɛyinŋge na wa na go,
fɔ na yinwege piliye yi yaa lɛgɛ paa kɔgɔje yɔn taambugɔ ki yɛn.
19 Mi yɛn paa tige yɛn, ŋga ki niŋge kì ye ma gbɔn wa tɔnmɔ pi na,
yembinɛ fɔɔngɔ ki ma wo na njere tunmɔɔrɔ ti na.
20 Kona mi yaa koro mbaa gbɔgɔwɔ fɔnmbɔ taa suyi,
na sandiga ki yaa koro mbaa fanŋga taa na kɛɛ sanga pyew.
21 Ki wagati wi ni, pàa pye na nuru na yeri, nala singi,
pe ma pyeri mbe ta mbanla yɛrɛwɛ sɛnrɛ ti logo.
22 Na mi ka para mbe kɔ, lere nala sɛnrɛ ti kɛ;
na sɛnrɛ tìla pye na yiin pe ni, na taan pe ni paa yɛgɛ ŋga na fɔɔngɔ ma kaa na wuun we.
23 Leele pàa pye nala singi, paa yɛgɛ ŋga na pàa pye na tisaga ki singi,
pàa pe yɔn ki yɛngɛ na singi, paa yɛgɛ ŋga na pe ma kaa na tisaga koŋgbanŋga singi.
24 Na pe kɛɛ ka kɔn pe na sanga ŋa ni, mi maa tɛgɛ pe ni fuwɛɛ mbe nayinmɛ kan pe yeri,
yaraga ka nala yɛgɛ kɔn mbe kajɛŋgɛ pye pe kan.
25 Mìla pye na konɔ na pe yaa lɛ li nari pe na, mìla pye pe yɛgɛ sinvɔ;
mìla pye pe sɔgɔwɔ paa yɛgɛ ŋga na wunluwɔ ma pye wi maliŋgbɔɔnlɔ sɔgɔwɔ,
paa lere ŋa wi maa mbele pe jatere wì piri pe na pe kotogo ki sogo pe na.