Elifazi wi sɛnyoro taanri woro:
22
1 Kona, Elifazi ŋa wìla yiri wa Tema ca wì si Zhɔbu wi yɔn sogo ma yo fɔ:2 Sɛnwee wi mbe ya mbe yiŋgi yɔn Yɛnŋɛlɛ li kan?
Kajɛnŋɛ wi kayɔngɔ ki ma pye wi yɛɛ wogo.
3 Na ma ka pye mbe sin ko yaa yiŋgi yɔn Yawa pi ni fuun fɔ wi kan?
Na ma nawa pi ka pye mbe filige ma na, yiŋgi tɔnli wi yaa ta wa ko ni?
4 Ma nawa po ni, Yɛnŋɛlɛ li yɛn na jɔlɔgɔ waa ma na konaa na kiti kɔɔn ma na,
naa ma yɛn na fyɛ li yɛgɛ ko kala na le?
5 Ma tipere lɛgɛrɛ to kala li,
ma kajɔgɔrɔ ti se ya mbe jiri mbe kɔ.
6 Màa pye na yaara shoo ma sefɛnnɛ pe yeri go fu nari teri fɔgɔ yɔn na,
màa pye na pe yaripɔrɔ ti shoo pe yeri na pe yari witiwaga.
7 Mbele wɔgɔ la pye pe na, ma sila wɔtɔnmɔ kan pe yeri,
mbele fuŋgo la pye pe na, màa je mbe yaakara kan pe yeri.
8 Màa tara ti yaga, a lewɛlimbɛlɛ pèri shɔ,
ma mbele pe yɛn yɛɛ gbɔgɔwɔ ni pe tɛgɛ ti go na.
9 Màa pye na naŋgunjaala pe yari paa kee kɛɛ wara,
na pijiriwele pe fanŋga ki koo pe ni.
10 Ko kì ti ki pɛŋgɛlɛ ŋgele kè le mɔɔ maga kɛɛ ki ni fuun ki na;
fyɛrɛ gbɔrɔ to ma na go nuŋgba nɔɔ sunndo wi kɔɔn.
11 Diwi wì ye ma na fɔ ma se ya yan naa,
tɔnŋgbɔɔ pɔ̀ɔn li.
12 Naga yɛn ma, Yɛnŋɛlɛ li woro wa naayeri, wa yɛnŋɛlɛ na wi le?
Wɔnŋgɔlɔ ke wele wa naayeri, paa yɛgɛ ŋga na ke yɛn ma lali we!
13 A mbòro sho fɔ: «Yɛnŋɛlɛ lo yiŋgi jɛn?
Naga yɛn ma, li mbe ya koro wa kambaara diwi wi ni mbe kiti kɔn lere na wi le?
14 Kambaara tìli tɔn, li woro na yaraga ka yaan,
li maa yanri na mari naayeri wi go na.»
15 Naga yɛn ma, kolɛlɛ lo maa jaa mbaa tanri li na wi le,
kapege pyefɛnnɛ pàa tanga konɔ na na we?
16 Pàa kari ma wɔ wa, na pe wagati wi fa gbɔn,
paa yɛgɛ ŋga na lɔgbɔgɔ tɔnmɔ ma kaa fo ma kari mbogo ni.
17 Ki leele pàa pye naga yuun Yɛnŋɛlɛ li kan fɔ: «Ma yɛɛ laga lali we ni.
Yɛnŋɛlɛ na yawa pi ni fuun fɔ li mbe ya mbe yiŋgi pye we kan?»
18 Ma sigi ta Yɛnŋɛlɛ lo làa pe yinrɛ ti yinyin yarijɛndɛ ti ni;
Yɛnŋɛlɛ sanla shɔ mbe taga ki lepeele pe kagala ŋgele pè kɔn mbe pye ke na!
19 Lesinmbele pe yaa ka pe tɔngɔkala li yan, mbaa yɔgɔri,
mbele pe yɛn jɛrɛgisaga fu pe yaa kaa ki lakoo pe na, mbaa yuun fɔ:
20 «We winfɛnnɛ pe mbele pè tɔngɔ ma wɔ wa,
kasɔn kì pe kɛɛ yaara ti sogo wɛlɛ wɛlɛ wɛlɛ.»
21 Ki kala na, ki yaga ma yɔn wa nuŋgba Yɛnŋɛlɛ li ni, pa ma yaa yɛyinŋge ta;
ki ka pye ma, ma wogo ki yaa yɔn.
22 Nagawa sɛnrɛ nda li yɛn na kaan, yɛnlɛ ti na,
li sɛnyoro ti tɛgɛ wa ma kotogo na.
23 Na ma ka sɔngɔrɔ mbe pan Yawa pi ni fuun fɔ wi kɔrɔgɔ, wi yaa ma tɛgɛ wa ma yɔnlɛlɛ li ni;
ma yɛɛ laga lali kambasinŋge ki ni.
24 Ma tɛ wi wa wa taambugɔ ki ni,
mɔɔ Ofiri tara tɛ† wi wa wa yanwira laforo sinndɛɛrɛ ti sɔgɔwɔ.
25 Kona Yawa pi ni fuun fɔ wo wi yaa pye ma tɛ we,
mbe pye ma yeri ma warifuwe lɛgɛwɛ.
26 Kona Yawa pi ni fuun fɔ wo wi yaa pye ma nayinmɛ kala le,
ma mbe ya mbɔɔn yɛgɛ ki yirige mbaa Yɛnŋɛlɛ li wele.
27 Maga li yɛnri, li yaa ma yɔn sogo;
pa ma yaa yɔn fɔgɔlɔ* ŋgele mà lɛ li yeri ke yɔn fili.
28 Maga kala o kala na kɔn mbe pye, li yaa yɔn ma kan;
yanwa yaa yiri ma kan wa ma koŋgolo ke ni.
29 Na lere wa ka go sogo, mboro ma yaa kaa yirige;
katugu lere ŋa wùu yɛɛ go sogo, Yɛnŋɛlɛ li maa saga.
30 Ali yɛrɛ ŋa wi yɛn jɔgɔfɔ, li yaa wi shɔ tipege ki kɛɛ;
li yaa ma shɔ ma kɛyɛn yan fyɔngɔ fu yi kapyere ti kala na.