Bilidadi wi sɛnyoro koŋgbannda:
8
1 Kona, Bilidadi ŋa wìla yiri wa Shuwa tara wì si sɛnrɛ ti lɛ mɛɛ Zhɔbu wi pye fɔ:2 Ma yaa koro mbaa ki sɛnrɛ cɛnlɛ nda ti yuun fɔ sa gbɔn wagati wiwiin?
Ma yɔn sɛnyoro wara nda ti yɛn paa tifɛliŋgbɔgɔ yɛn, ti yaa kɔ wagati wiwiin?
3 Naga yɛn ma, Yɛnŋɛlɛ li yaa ŋga kì sin ki kanŋga wi le?
Naga yɛn ma, Yɛnŋɛlɛ na yawa pi ni fuun fɔ li yaa kaselege konɔ li kanŋga wi le?
4 Kana ki mbe ya pye fɔ ma pinambiile pè kapege pye ma ye Yɛnŋɛlɛ li ni,
ko a lì si pe kapere ti go kala li wa pe na.
5 Ɛɛn fɔ mboro wo na, na ma kaa Yɛnŋɛlɛ li lagajaa,
na ma kaa Yɛnŋɛlɛ na yawa pi ni fuun fɔ li yɛnri lɔɔn yinriwɛ ta,
6 na ma ka pye jɛrɛgisaga fu konaa mbe pye sinŋɛ,
kona li se mɔ li yaa la wele ma na,
mbe yɛyinŋge le wa ma go ki ni naa, mbe yala ma yɛn sinŋɛ yɛgɛ ŋga na ki ni.
7 Pa kona ma cɛnlɔmɔ koŋgbanmba, ma se po jate naa yaraga ka,
ɛɛn fɔ ma cɛnlɔmɔ fɔnmbɔ, po yaa yɔn mbe wɛ faa woo po na.
8 Faafɛnnɛ pe yewe ma wele,
ŋga pe tɛlɛye pàa cancan ma jɛn, mɔɔ jatere wi tɛgɛ ki na.
9 Katugu pè woro se yunmbaan, wee yaraga ka jɛn,
laga dunruya wi ni, we yinwege piliye yi ma toro paa tige yinmɛ yɛn.
10 Faafɛnnɛ poro pe yaa ma naga, poro pe yaa ka yo ma kan;
ŋga ki yɛn wa pe nawa, pe yaa ki wogo ka yo ma kan fɔ:
11 «Gbagara wi mbe ya mbe yiri, na wi woro lɔgɔ yɔn na le?
Lɔgɔ yɔn yan ki mbe ya mbe fi, na ki woro tɔnmɔ laga na le?
12 Na tɔnmɔ woro ki nɔgɔ, ki tipirige ki ma waga fyaw ma yan sanŋga ki yaga,
mbege ta kì fyɛɛnrɛ yiri, na pe faga kɔn gbɛn.»
13 Mbele pe ma fɛgɛ Yɛnŋɛlɛ li na, pa pe kala li ma pye ma;
pa lepee wi jigi tagasaga ki yaa ka kɔ ma.
14 Wi kɛɛndagaserege ki ma jɔgɔ ma wɔ wa,
wi jigi tagasaga ki ma tifaga paa sipee mɛrɛ yɛn.
15 Wì yo wi yaa jiige wi go ki na, ɛɛn fɔ, a go kì si to;
wì yo wi yaa ki yigi mbe mara ki na, ɛɛn fɔ kii ya yere.
16 Wi yɛn paa tige yɛn, ŋga kìgi yɛɛ ta wa yɔnlɔ ki na;
ki njere tì jaraga ma naŋgɔ kɔlɔgɔ tire sannda ti tɔn.
17 Ki ma ki ninde ti migili ti yɛɛ ni ma ye fɔ wa sinndɛɛrɛ ti sɔgɔwɔ;
ki ma yesaga lagaja ma kari fɔ wa waara ti nɔgɔ.
18 Ɛɛn fɔ pilige ŋga ni paga ki kɔw mbege wɔ wa laga ŋga kìla pye,
ki cɛnsaga ki ma je ki na, maga pye fɔ: «Mi sɔɔn jɛn fyew.»
19 Wele, nayinmɛ mba ki lerefɔ wi ma ta laga dunruya wi ni, pi kɔ pow yɛɛn!
Tige ka yɛgɛ mɛɛ fi ma yiri naa wa titɛgɛ lɛgɛ ki ni.
20 Lere ŋa wi nawa pi yɛn ma filige wi na, Yɛnŋɛlɛ laa je wo na fyew,
laa si kɛɛ le kapere pyefɛnnɛ pe ni mbe pe saga.
21 Li yaa ka ti ma tɛgɛ naa wa ma yɔn,
mbe ti maa yɔgɔrimɔ yuuro koo wa ma yɔn.
22 Mbele fuun pɔ̀ɔn panra, pe yaa ka fɛrɛ shɔ;
lepeele pe yinrɛ ti yaa ka jɔgɔ mbe wɔ wa.