Izirayɛli woolo
9
1 Kona ki yeŋge nuŋgba ki ni, ki pilige nafa ma yiri tijɛrɛ wogo ki na, a Izirayɛli* woolo pè si gbogolo ma yeŋge le*. Pàa jatere piriwɛn yaripɔrɔ le konaa ma tara wo pe yɛɛ na mbege naga fɔ pè pe yɛɛ tirige. 2 Leele mbele pàa pye Izirayɛli woolo piseele pè si laga mbele fuun pàa pye nambanmbala pe na ma cɛn pe yɛ. A pè sigi yo maga naga fɔ pè kapere pye poro naa pe tɛlɛye pe ni. 3 A pè si yiri ma yere ma koro wa pe yeresara, a pè Yawe Yɛnŋɛlɛ, pe Yɛnŋɛlɛ li lasiri* sɛwɛ wi kara pe kan fɔ ma saa gbɔn lɛri taanri. Ko puŋgo na, a pè si lɛri taanri pye naa ma pe kapere ti yo, konaa ma fɔli Yawe Yɛnŋɛlɛ, pe Yɛnŋɛlɛ li yɛgɛ sɔgɔwɔ mali gbɔgɔ.4 Kona, a Zhozuwe, naa Bani, naa Kadimiyɛli, naa Shebaniya, naa Buni, naa Sherebiya, naa Bani konaa Kenani pè si lugu ma yere wa yeresaga ŋga pàa gbegele Levi setirige piile* pe kan ki na, ma gbele ŋgbanga ma Yawe Yɛnŋɛlɛ, pe Yɛnŋɛlɛ li yɛnri.
5 Ko puŋgo na, Levi setirige piile wele, Zhozuwe, naa Kadimiyɛli, naa Bani, naa Hashabiniya, naa Sherebiya, naa Hodiya, naa Shebaniya konaa Petaya pè sho fɔ: «Ye yiri ye yere, yaa Yawe Yɛnŋɛlɛ, ye Yɛnŋɛlɛ li sɔnni wagati wi ni fuun konaa sanga pyew.»
Levi setirige piile
Yawe Yɛnŋɛlɛ, ti leele paa ma mɛgɛ ŋga kì gbɔgɔ ki sɔnni,
ko ŋga kì gbɔgɔ ma wɛ duwaw wi ni fuun naa sɔnmɔ pi ni fuun pi na we.
6 Mboro nuŋgba ma yɛn Yawe Yɛnŋɛlɛ le.
Mboro mà naayeri wo naa wi gbemɛ pi ni fuun pi da, ma wɔnŋgɔlɔ ke da.
Mà tara to naa yaara nda fuun ti yɛn laga ti ni ti da,
naa kɔgɔje wo naa wi nawa yaara ti ni fuun ti ni.
Mboro ma maa yinwege ki kaan ki yaara ti ni fuun ti yeri.
Naayeri fanŋga yaara ti maa fɔli ma yɛgɛ sɔgɔwɔ nɔɔ gbogo.
7 Yawe Yɛnŋɛlɛ, mboro màa Abiramu wi wɔ.
Mboro màa wi yirige wa Uri ca, wa Kalide tara,
màa wi mɛgɛ ki taga naa yinri Abirahamu†.
8 Màa ki yan fɔ wi yɛn ma sin wa wi kotogo ki na ma ni;
kì pye ma, a mà si yɔn finliwɛ* le wi ni
mbe Kana tara fɛnnɛ, naa Hɛti cɛnlɛ woolo, naa Amɔri cɛnlɛ woolo,
naa Perɛzi cɛnlɛ woolo, naa Zhebusi cɛnlɛ woolo konaa Girigasi cɛnlɛ woolo pe tara ti kan wi setirige piile pe yeri†.
A mɔ̀ɔ sɛnyoro ti tanga mari yɔn fili, katugu ma yɛn sinŋɛ.
9 Màa we tɛlɛye pe jɔlɔgɔ ki yan wa Ezhipiti tara.
Màa pe gbeere ti logo wa Kɔgɔje yɛɛn wi yɔn na†.
10 Màa kacɛn kagala naa kagbɔgɔlɔ pye Farawɔn* wi na,
naa wi legbɔɔlɔ pe ni fuun pe na
konaa wi tara woolo pe ni fuun pe na,
katugu wa pe yɛɛ gbɔgɔwɔ pi ni pàa we tɛlɛye pe jɔlɔ yɛgɛ ŋga na màga jɛn.
Kona, a mà si ti a ma mɛgɛ kì yiri jɛŋgɛ fɔ ma pan ma gbɔn nala†.
11 Màa kɔgɔje tɔnmɔ pi kɔn shyɛn wa we tɛlɛye pe yɛgɛ,
a pè tanga ma toro tawara na wa wi nandogomɔ.
Ɛɛn fɔ mbele pàa taga pe na na pe puro,
màa pe jaanri wa kɔgɔje wi latijugo ki ni
paa yɛgɛ ŋga na sinndɛlɛgɛ ma kaa tigi tɔnŋgbɔɔ nɔgɔ we†.
12 Yɔnlɔ na, màa pye na pe yɛgɛ sinni kambaaga titɔnlɔgɔ yerege ka ni,
yembinɛ na pe yɛgɛ sinni kasɔn titɔnlɔgɔ yerege ka ni
na yanwa yinrigi pe kan wa konɔ na pe mbaa lɛ li ni†.
13 Màa tigi wa Sinayi* yanwiga ki na.
Màa koro wa naayeri ma para pe ni.
Màa kakɔnndɛgɛŋgɛlɛ sinŋgele kan pe yeri,
naa lasiri sɛnrɛ nda ti yɛn kaselege woro,
naa kondɛgɛŋgɛlɛ ni konaa ŋgasegele tiyɔngɔlɔ ni.
14 Màa pe naga ma cɛnpilige* kpoyi* ki wogo ki ni.
Màa ŋgasegele, naa kondɛgɛŋgɛlɛ konaa lasiri kan pe yeri ma tunmbyee Moyisi wi yɔn†.
15 Sanga ŋa ni fuŋgo kìla pe yigi,
màa yaakara kan pe yeri ma yiri wa yɛnŋɛlɛ na ma pe fuŋgo ki kɔ.
Sanga ŋa ni wɔgɔ kìla pe yigi,
màa ti a tɔnmɔ janri ma yiri wa walaga ki ni ma pe wɔgɔ ki kɔ.
Tara nda màa wugu pe kan ti wogo na, mbe kan pe yeri,
màa ki yo pe kan fɔ pe sa ye wa peri shɔ peri ta†.
16 Ɛɛn fɔ poro wele, we tɛlɛye wele,
pàa pe yɛɛ gbɔgɔ, ma pe yɛɛ pye nuŋgboŋgbanla fɛnnɛ.
Pe sila tanga ma ŋgasegele ke na.
17 Pàa je mbe logo ma yeri, ma fɛgɛ kagbɔgɔlɔ ŋgele màa pye pe kan ke na.
Pàa pe yɛɛ pye nuŋgboŋgbanla fɛnnɛ,
ma yiri ma je fɔ pe yɛn na to wa jaa mbe tɛgɛ pe yɛɛ go na, mbe sɔngɔrɔ wa pe kulowo pi ni wa Ezhipiti tara.
Ɛɛn fɔ mboro wo na, ma yɛn Yɛnŋɛlɛ na li maa leele kala yari.
Ma yɛn yinriwɛ tafɔ ma pye yuŋgbɔgɔrɔ tafɔ.
Maa nawa ŋgban jaga jaga, ma kagbaraga kì gbɔgɔ.
Ki kala na, ma sila je pe na†.
18 Ali sanga ŋa ni pàa tugurɔn ti yan ma napige yanlɛgɛ ki gbegele pe yɛɛ kan,
ma yo fɔ: «We Yɛnŋɛlɛ li na,
lo na lì we yirige wa Ezhipiti tara!»
Pàa ki pye ma, ma kapegbɔrɔ pye ma na†.
19 Mboro wo na, wa ma yinriwɛ tawa gbɔɔ pi ni,
ma sila laga pe na wa gbinri* wi ni.
Kambaaga titɔnlɔgɔ yerege kìla pye na pe yɛgɛ sinni na konɔ li nari pe na yɔnlɔ na,
ki sila pe yɛgɛ sinmɛ pi yaga.
Yembinɛ, kasɔn titɔnlɔgɔ yerege kìla koro na yanwa yinrigi pe kan
wa konɔ na pe mbaa lɛ li ni†.
20 Màa ma yinnɛ jɛnnɛ li kan pe yeri,
jaŋgo paa kagala kɔrɔ jɛnni.
Ma sila je mbaa manɛ* wi kaan pe yeri paa kaa.
Màa tɔnmɔ kan pe yeri ma pe wɔgɔ ki kɔ.
21 Yɛlɛ nafa shyɛn na pàa pye wa gbinri wi ni li ni, màa pe kala li yɔn pe kan.
Pe sila yaraga ka kpɛ la.
Pe yaripɔrɔ ti sila lɛ mbe kɔɔnlɔ, pe tɔɔrɔ ti sila tinndi pe na†.
22 Màa ti a pè ya wunluwɔ tara lɛgɛrɛ naa cɛngɛlɛ ni.
A mà si ki woolo pe tara ti kan pe yeri peri yɛɛlɛ pe yɛɛ na,
fɔ ma saa gbɔn wa ti kɔngɔlɔ ke na.
Pàa Ɛshibɔn ca wunlunaŋa Sihɔn wi tara
to naa Bazan tara wunlunaŋa Ɔgi wi tara ti shɔ mari ta†.
23 Màa setirige piile lɛgɛrɛ kan pe yeri paa naayeri wɔnŋgɔlɔ ke yɛn.
Tara nda màa yo pe tɛlɛye pe sari shɔ peri ta,
màa kari pe ni wa ti ni†.
24 Pe setirige piile pàa saa ye wa ti ni mari shɔ mari ta.
Kona mbele pàa pye ma cɛn wa tara ti ni, Kana tara fɛnnɛ wele,
a mà si ki Kana tara fɛnnɛ pe go sogo pe kan,
ma pe le pe kɛɛ,
ma pinlɛ ki tara ti wunlumbolo konaa ki tara woolo pe ni,
jaŋgo ki ka pe ndanla pe pe yigi yɛgɛ ŋga na, pe pe yigi ma†.
25 Cara nda pè malaga sigemboro kan mari maga,
pàa ti shɔ mari ta konaa tara nda ti yɛn tanra ti ni.
Yinrɛ nda tìla pye ma yin yarijɛndɛ cɛnlɛ pyew ta ni,
pàa ti shɔ mari ta,
naa tɔnmɔ were ni nda pàa wɔ makɔ,
naa ɛrɛzɛn* kɛɛrɛ ni, naa oliviye tire kɛɛrɛ ni
konaa tire nda ti maa sɛni ti lɛgɛrɛ ni.
Ma kajɛŋgɛ gbɔgɔ ki kala na, pè li ma tin, fɔ ma tugbɔlɔ;
pàa pye na pe yinwege ki piin wa tanwa pi ni†.
26 Ɛɛn fɔ pe sila logo ma yeri, pàa yiri ma je ma na.
Pàa puŋgo le ma lasiri wi ni.
Ma yɔn sɛnrɛ yofɛnnɛ* mbele pàa pye na pe ŋgbanga ma yo pe sɔngɔrɔ ma kɔrɔgɔ pàa pe gbo.
Pàa kapegbɔrɔ pye ma na.
27 Kì pye ma, a mà si pe le pe juguye pe kɛɛ,
a pè pe jɔlɔ jɛŋgɛ.
Ɛɛn fɔ ma pe ta wa pe jɔlɔgɔ ki ni,
pàa gbele mɔɔ yeri ma pe saga.
Mboro wo na, mɔɔ ta wa naayeri, wa yɛnŋɛlɛ na, màa pe gbelege ki logo.
Wa ma yinriwɛ tawa gbɔɔ pi ni, a mà si shɔfɛnnɛ torogo,
a pè pan ma pe shɔ pe juguye pe kɛɛ.
28 Ɛɛn fɔ naa pàa kaa wogosaga ta,
a pè sigi lɛ naa na kapege piin ma yɛgɛ sɔgɔwɔ.
Kona, a mà si pe le naa pe juguye pe kɛɛ,
a pè pe jɔlɔ.
Ɛɛn fɔ, a pè si gbele mɔɔ yeri naa fɔnŋgɔ ma pe saga.
Mboro wo na, mɔɔ ta wa naayeri, wa yɛnŋɛlɛ na,
a mà si pe gbelege ki logo.
Wa ma yinriwɛ tawa gbɔɔ pi ni, màa pe shɔ shɔsaga lɛgɛrɛ na†.
29 A mà si pe ŋgbanga ma yo pe sɔngɔrɔ pe pan
paa tanri ma lasiri wi na.
Ɛɛn fɔ pàa pe yɛɛ gbɔgɔ, pe sila yɛnlɛ mbɔɔn ŋgasegele sɛnrɛ ti logo.
Pàa ma kakɔnndɛgɛŋgɛlɛ ke jɔgɔ,
ma sigi ta koro ke ma yinwege kan mbele pe maa tanri ke na pe yeri.
Pàa yiri ma je ma pe yɛɛ pye nuŋgboŋgbanla fɛnnɛ,
pe sila yɛnlɛ mbe logo†.
30 Màa pe kala li kun ma yɛɛ ni yɛgɛlɛ lɛgɛrɛ ni.
Màa ma yinnɛ li le ma yɔn sɛnrɛ yofɛnnɛ pe ni,
a poro pe yɛri.
Ɛɛn fɔ pe sila nuŋgbolo jan mbe logo.
Kona, a mà si pe le cɛngɛlɛ kele yɛgɛ kɛɛ†.
31 Ɛɛn fɔ, konaa ki ni fuun, wa ma yinriwɛ tawa gbɔɔ pi ni,
ma sila pe tɔngɔ mbe pe kɔ pew,
ma sila si je pe na,
katugu ma yɛn Yɛnŋɛlɛ na li maa yinmɛ kaan konaa na leele yinriwɛ taa.
32 Koni, we Yɛnŋɛlɛ, Yɛnŋɛlɛ ŋgbɔgɔ, yawa yɛn ma ni,
a mà pye fyɛrɛyaraga.
Mà koro sinŋɛ wa ma yɔn finliwɛ pi ni konaa ma koro na kajɛŋgɛ piin we kan;
jɔlɔgɔ ŋga kì we ta,
woro naa we wunlumbolo, naa we tara teele,
naa we saraga wɔfɛnnɛ*, naa we Yɛnŋɛlɛ yɔn sɛnrɛ yofɛnnɛ,
naa we tɛlɛye konaa tara woolo pe ni fuun pe ni,
maga lɛ wa Asiri tara wunlumbolo pe wagati wi na fɔ ma pan ma gbɔn nala,
maga ka ki jɔlɔgɔ ki jate kala jɛɛlɛ†.
33 Kala na fuun màa ti, a lì we ta,
tanga yɛn ma yeri ki wogo ki ni fuun ki ni,
katugu ma yɛn sɛnrɛ nuŋgba yofɔ.
Ɛɛn fɔ woro wo na, wè kapege pye.
34 We wunlumbolo, naa we tara teele,
naa we saraga wɔfɛnnɛ konaa we tɛlɛye pe ni,
pe sila tanga ma lasiri wi na;
pe sila ma ŋgasegele ke yigi,
yɛrɛwɛ sɛnrɛ nda màa yo pe kan pe sila ti logo.
35 Sanga ŋa ni pàa pye wa pe wunluwɔ tara ti ni,
màa kajɛŋgɛ gbɔgɔ pye pe kan,
ma pe ta pàa pye na yɔgɔri wa ki kajɛŋgɛ ki ni,
konaa tara gbende tanra nda màa kan pe yeri,
ma pe ta wa ki tara ti ni,
pe sila ma gbɔgɔ,
pe sila si laga pe kapyere tijangara ti na.
36 Nala, we mbele wè pye kulolo.
Tara nda màa kan we tɛlɛye pe yeri,
jaŋgo paa ti kɛrɛ yarilire naa ti yarijɛndɛ ti kaa,
wè pye kulolo laga ti ni.
37 Wunlumbolo mbele mà we le pe kɛɛ,
we kapere ti kala na,
poro pe yɛn na ki tara ti yarilire lɛgɛrɛ ti tɔnli wi nii.
Pe yɛn na we piin yɛgɛ ŋga na kì pe ndanla,
ma pinlɛ we yaayoro ti ni.
We yɛn jɔlɔgɔ na.