Luc 16

Nàfòrò gòò jààbobaa sànbè moò raa goò

1 Tà shɔ̀ùn, Yesù yè nà dzin e re kàràndzin neè rà ci: «Nàfòròtsi sɔn na ni. A na kpiri sɔn tsuuŋnà e re nàfor'la tsɛ, ci tɔ̀ y'a goo rèè jaa boò. Yè nà dzin nàfòròtsià rà, ci kpir'la y'à re nàfor'la bar'la.

2 Kùntsiɛ̀ tɔ̀ myɛ̀un, à y'à kiri, è nà dzin à ra ci: <Mun na dziu myɛɔ̀n wo re goo rèè ɲàn waa. Awà, mun wo tsùuŋ n ne nàfor'liì kùùn, ci wo y'à goo rèè jaa boò, à kpunaan bo n na, kàtsu, è sen she ra, mun nà wo bàji bo n ne nàfor'la tsɛ>.

3 Nàfòrò gòòjààbobaà tɔ̀ myɛ̀un min niì, tɔ̀ yeè dzin e duùn ci: <Mun kùntsiɛ̀ ci wò nà mun bàji bo e ree nàfor'la tsɛ. È mun bàji, mun nà fee rìì fa sa ? Fààn na ni mun na, min bà ni dzi fɛɛ fa. Mun to yè bà ni fyɛ̀yn fa, tɔ̀ seey ni mun na.

4 Cɔ, m'a tɔ̀ mun nà nìi fa dòònun. Min tɔ̀ fa, yè na mun kaa faagoò rà, swey nà e tsiì min bè ye re tsii>.

5 Awà, è fù tɔ̀ rii ɲàn, à kùntsiɛ̀ rè tsìì ni gè o ge rà, è twɛy sapɛ kir'na soo soo. Jɔ̀naà nàu wɔ, è tɔ̀ tey ci: <Mun kùntsiɛ̀ rè fɛ̀r'ni ni wo ra ?>

6 Tɔ̀ yeè dzin à ra ci: <A re ɲinin gongon caànmoò rìì ni mun na>.

E sèè è dzin tɔ̀ ra ci: <A ree tsìì sɛbɛ̀ɛ̀n sen tabe tabe, a tsuù a lakere sɛbɛn ci à dzyèè tsyeùn nì>.

7 Tà shɔ̀ùn, è kpɛrɛ tey kɔn ci: <Wo do, mun kùntsiɛ̀ rè fɛ̀r'ni ni wo ra ?>

Tɔ̀ yeè dzin ci: <A re shìmàndzin bɔtɛ caànmoò rìì ni mun na>.

E dzin tɔ̀ sa ra ci: <A re tsìì sɛbɛ̀ɛ̀n sen, a lakere sɛbɛn ci à bɔ̀tɛ cɛ̀ɛ̀n nì>.

8 Awà, nàfòròtsià twɛy goo rèè myɛ̀un min niì, è ree nàfòrò gòòjààbobaa namara moò saan, kàtsu, à y'à goo rèè fau ko sànbe ka.»

Tà shɔ̀ùn, Yesù yè dzin kɔn ci: «Dziɲan tsii ree doùn, dziɲan gaabaa rèè yè e ree goo rèè shi jiì jaa tɔ̀ e si ka, è geren Ŋaablà gaabaa rèè tsɛ.

9 Awà, mun nì ci e ra, dziɲan nafor'liì ni e re, y'a sen, y'a ka mòdzin ì dzwɛ̀ma, ye dzunwɛynsi ì gaa à ka. Tɔ̀ tsuru è na dò, twɛy dzia à to, ye yè dɔ̀n Ŋaablà re gàne rɔ̀n, nìi na doò waa.»

10 Yesù yè dzin kɔn ci: «Moo ɲɛɛn wo mòò riì rà goo kiɲaanin na, mòo dzia ɲɛn wo ra goo blà sa ra. Mòò to na ɲɛɛn wo mòò riì rà goo kiɲaanin na, mòò fa dzi ɲɛn wo ra goo blà tsu ra waa.

11 Awà, nìi dziɲan tsiɛ nàfor'la, mòò ma ɲɛn ye ra tɔ̀ kuun'n kur'la doùn ye re, mòo nà dzi ɲɛn ye ra dzùrù, è nàfor'la taki takìà kɛ̀ɛ̀yfa ye mà ?

12 Gè nìi na ye re, mòò ma ɲɛn ye ra tɔ̀ kuun'n kur'la doùn ye re, nìi ye re Ŋaabla dzia tɔ̀ sìn ye ra dzùrù ?

13 Faagoofadzin soo na dzia faagoo fa kùntsii fii sa re waa. Sooree goo ma xɔbe à mà, soo goo dzibee à ra. Tɔ̀ nìn yè bo à ra, à dzia è shi soo rà, è magoo bo soo ɲàn. Ye na dzia bà ni Ŋaablà raa faagoò rà, ye yè bà ni nàfor'la raà sa ra waa.»

14 Ayìwà, Faridziɲɛn rèè dziu twɛy gooma reè myɛ̀n Yesù dzu min niì, yè jiran à mà, kàtsu è na ɲɛɛn kɛ̀niɔn fɔ è bè geren.

15 Yesù yè dzin è ra tɔ̀un ci: «È ba mòdzian jaa ra, ye yè e yɛrɛ baà mòdzin tereonma ì, ŋà, Ŋaablà y'a tɔ̀ nìi ni ye duùn. Gè niì gè blà mòdzian rè, yè bà baraka wɔɔ̀ à ɲan, tɔ̀ gèè goo xɔ Ŋaablà ma.»

16 Tà shɔ̀ùn, Yesù yè dzin kɔn ci: «Àwà, nìi Ŋaablà re kɛɛra Musà raa sàrìyaa, ko kɛɛra dzyee reè raa kìtaabu rèè goomaa, twɛy to tsùuŋ sààn fur'lu, fɔ è bè suu mòdzìn jààràfoobaa Yùxanà raa watsia dzu. Tà doùn, è sen fɔ Mòdzìn Jààràfoobaa Yùxanà raa watsia rà, Ŋaablà re màsàbee kùnàgoo dziɔ̀ ni dèè rà. Tɔ̀ ɲan, mòdzian sapɛ n'a re, yè e maxɔbe, yè dɔ̀n tɔ̀ màsàbee gàne rɔ̀n.

17 Awà, ŋaablaxɔɔ̀ ko dzɔ̀nxɔɔ̀ sa dzia dò bo ɲuun fa tsuru, ŋà, Ŋaablà re sàrìyaa, arì tɔ̀ sɛbɛndzinii, tɔ̀ na dzia dò waa.

18 Tà doùn, kpiri o kpiri ye e re tààn bàjia, è tàan kpɛrɛ sen, tɔ ɲànmɔ̀ɔ̀be rii fau. Wo kpir'liì to tàan bàjiuma seen, à sa ɲànmɔ̀ɔ̀be rìì.»

Kpiri nafòròtsià ko Lazarì laa goò

19 Tà shɔ̀ùn, Yesù yè neè gooma ree ka tàlen ban mòdzian rèè ci: «Kpiri nafòròtsi sɔn na ni, a y'a jà, à vya o vya wɔɔ̀, à sapɛ vya wùù wuu sɔɔ̀n xɔ xɔù. A y'a jà, à ɲwɛyn o ɲwɛyn ɲɔɔ̀n, à sapɛ ɲwɛyn dzi dziù è bà giri, jaaravi to na doò à re.

20 Ayìwà, kpiri gbakɔɔn sɔn sa na ni, tɔ̀ tsoò yè bà na ci Lazarì. Lazarì màà sapɛ na ɲuun, è bà ɲɛn tsuùŋnà kpiri nafòròtsià rè fɔɔn dɔ̀nmà dziɛ rà.

21 Nàfòròtsià ɲwɛyn ɲɔnkɔɔn, ɲwɛyn bubui niì reè na tɔr'nà à re, Lazarì sào na ni à re, wò yeè bà e dzii ra gaa tɔ̀ ka. Arì nìi vì rèè, twɛy sa na nàa à mà ɲuun neè fɛr'nà.

22 Awà, Lazarì yè nà san. A saun, mɛ̀rɛ̀kɛ rèè y'à sen, Ibraximà ni min niì àrìjinɛɛ̀ doùn, yè b'a ji à tɛyn mɔn. Tà shɔ̀ùn, nàfòròtsià sa yeè nà san. A saun yè b'a wɔ.

23 Tɔ̀un, è nàfòròtsià to byɛnbee ɲàn mɔn jààndamaà doùn, è nà e jaà ɲansen, è Ibraximà jà jeenà, Lazarì ni à tɛyn mɔn.

24 Nàfòròtsià dziu tɔ̀ jà min niì, è vu bo fààn na ci: <Mun fà Ibraximà, cinan n ma. Lazarì ka, ci è bè e siiniɛn tsun yu rɔ̀n, è nà à ka n nɛɛ̀n cin, tà boshɔ̀ùn, wùù na ni n tsɛ sàden nɔ̀n mìin>.

25 Ibraximà yè dzin à ra tɔ̀ rii ɲàn ci: <N dzin kpiri, a taa to, ci wo na ni dziɲan tsiɛ doùn watsi riì bwèy, xɛɛrɛ na ni wo tsɛ fɔ è bè geren. Ŋà, Lazarì do, tɔ̀ yeè e raa jaamabee sapɛ fau byɛnbee rìì ɲàn. Awà, dòònun tɔ̀ jaayuà tsyɛ̀un mìin, wo yè bà byɛɛn.

26 Tɔ̀ nìn yè bo à ra, kòngon bla rii ni ye ko ɲe fi. Tɔ̀ ɲan, à kɛ̀nsɛɛn ye ba ni ɲe duùn, kòngon nee kamà, mòò na dzia bo ɲe re mìin è bè ye re mɔn. Mòò to na dzia bo ye re mɔn, è nà ɲe re mìin>.

27 Ibraximà rè goomaa shɔ̀ùn, nàfòròtsià yè dzin ci: <Tà bwèy, mun fàà, mun wo màfyɛ̀ɛn nì, e Lazarì ka dziɲaan doùn, è bè mun fàà rè fɔɔn rè.

28 Tseyn nùn ni mun shɔ̀ùn mɔn, à to è bè twɛy latsi, sànko, è sa mà nà nà nèe byɛnbe gane ree ɲan mìin waa>.

29 Ibraximà yè dzin à ra ci: <Ŋaablà re kɛɛra Musà rè sàrìyaa doùn gooma reè ni wo tseyn nèè rè, ko kɛɛra dzyee reè rè kìtaabu rèè doùn gooma reè sa ni è re. Wo tseyn nèè ye e si kun tɔ̀ ra, tɔ̀ dzia è latsi>.

30 Nàfòròtsià yè dzin ci: <Mun fà Ibraximà twɛy raa gooma reè bàsɔùn fa à wùbe waa. Mòdzin saunmaà sɔn ni fùn ye kpunan, è bè è kpɛyn, tɔ̀ rii nà à to, yè e re jaamabee lakere>.

31 Tɔ̀un, Ibraximà yè dzin ci: <È ma dzi e toro wɔ Ŋaablà re kɛɛra Musà, ko kɛɛra dzyee reè rè gooma reè rè nòn, arì fùn nì kɛ̀nsɛɛn ye kpunan bo è bè, tɔ̀ sɔn na naà à to, yè e re jaamabee fau'n kur'la lakere waa>.»