Twɛ̀yfabaa nìì reè bèu Yesù dzinyɛykɔɔn blàbe
2
1 Àwà Yesù kereu tɔ̀ rii tsuru Bɛtsilɛmùn wɔ̀ rɔ̀n, Yude mar'la ɲàn. À fau, tɔ̀ y'a tàrà màsà kpiri Erodzì rìì na ni màsàbee tsɛ. Tà doùn, swɛyn nèè tàànmàshɛ̀n tɔbaa swey yè dan kir'la kèrè, yè nà wɔ Yerusalɛmùn.
2 Yè mòdzian teè ci: «Dzyèèsìbee mòdzin neè rè màsà kpir'lìi kereu dòonen, à ni min ? Ɲe y'à re swɛɛ̀n fùuma jàu, ɲe to naɔ̀ e kunun gban à bììn, ɲe yè blà wɔ à ɲan.»
3 Màsà kpiri Erodzì nàu tɔ̀ goomaa myɛ̀n, à akiri na tsuù waa, à ko Yerusalɛmunka reè sapɛ.
4 Tɔ̀un, saaka goojaa bo reè kùntsii rèè, ko sàrìyà kaamoo reè gè o ge ni à re màr'là doùn, è twɛy sapɛ ladzyèè. È tey ci Ŋaablà Jaara Modzìàn na wù è kere min ?
5 Yè dzin à ra ci: «À Bɛtsilɛmùn wɔ̀ rɔ̀n nì, Yude mar'la ɲàn, kàtsu kɛɛraa sɔn y'a sɛbɛɔ̀n nèe tsuru ci:
6 Wo Bɛtsilɛmùn, Yude mar'la wɔ̀,
à na ni a ci wo rìì dzyɛ̀n Yude mar'la wɔ̀ kùnma reè sapɛ ma dɛ,
kàtsu kùntsii nà bo wo ɲan, nìi nà bà Isirayɛli dzin neè kplatsuubaa,
mun ne mòò rèè.»
7 Tɔ̀un, Erodzì yè tàànmàshɛ̀n tɔ reè kiri mɛnɛn doùn, è tey cɛyn ci è swɛɛ̀n jàu watsi kɛn ni soo ɲan ?
8 Tà shɔ̀ùn à yè è bàji be Bɛtsilɛmùn, è dzin è ra ci: «Y'a wa mɔn, ye bè tey fa dziɛ̀n tsɛ cɛyn. E y'a jaa tɔ̀, ye nà à dè n na, sànko n sa yeè bè n kunun gban à bììn min blà wɔ à ɲan.»
9 Màsà kpir'là dòun twɛy gooma reè rà, tàànmàshɛ̀n tɔ reè yè fù, yè shia kun. Tɔ̀un, è swɛyn nìi jàu è to kir'la rà, yè tɔ̀ jà e jɔɔn. È bè fur'lu, dziɛ̀n ni gàne rìi ɲàn, è bè e tsiì tɔ̀ kùùn.
10 È swɛɛ̀n jà niì fau, è taama yè dzibe fɔ è bè geren.
11 Àwà, yè dɔ̀n gbàà doùn, yè dziɛ̀n ko e na Mariyamùn jà. Yè e kunun gban tɔ̀un, yè dziɛ̀n blàbe. Tà shɔ̀ùn, yè e re sùn nèè dzii san, yè bo ko sɛnu ka, ko wushuna, ko mà yɛɛ gè fama kinin dziù, nìi kir'là miiri, y'à ka blàbe fa dziɛ̀n rè.
12 Twɛy goo rèè shɔ̀ùn, è ci e ye e kpɛyn sèè e fatsii doùn, Ŋaablà yeè è sɔ̀nmin sìràn ɲàn, ci è mà sèè be Erodzì kpà dɛ. Tɔ̀un, yè bo shi kpɛr'le, yè bè e fatsii doùn.
Yusufù vwɛ̀ɛ̀y bèu dziɛ̀n ko e naà ka min niì Misiran jamaan nɔn
13 Àwà, è bèumaà shɔ̀ùn, Ŋaablà re mɛ̀rɛ̀kɛ sɔn yeè e yɛrɛ kpadè Yusufù rà sìràn ɲàn, è dzin à ra ci: «Fù, e dziɛ̀n ko e naà sen, e vwɛ̀ɛ̀y be è ka Misiran jamaan nɔn. Bè to mɔn, fɔ min nà dzin a ra, ci e sèè na, kàtsu Erodzì nà dziɛ̀n gaa, ci wo nà à vu.
14 Yusufù yè fù tɔ̀un fen nɔ̀n, è dziɛ̀n ko e naà sen, yè dɔ̀n be Misiran jamaan nɔn, yè bè e mɛnɛn mɔn.
15 È to mɔn, fɔ Erodzì yè bè san. Tà tsuru, Tsìfaà na nìi deò è bo à re kɛɛraa dzu, tɔ̀ yeè bo e shi tsɛ, nìi yɛ ci:
Min n Dzin Kpir'la kiriu, ci è bo Misiran jamaan doùn.
16 Àyìwà, Erodzì y'à tɔu watsi riì bwèy ci twɛ̀yfabaa rèè wò jàànfau, à vunun yè ta fɔ à yè bè geren. Tɔ̀un dziin gè o ge jii fii boo, ko gè o ge gbaɔ̀ jii fii mà, Bɛtsilɛmùn ko e dziire wɔ rèè ɲàn, è mòdzin ì ka bè, yè bè twɛy sapɛ vu. À tàànmàshɛ̀n tɔ reè teron swɛɛ̀n jà watsi riì mà, à tɔ̀ watsia rìì jàtsi kuun, à y'à goò fa.
17 Tɔ̀un, kɛɛra Yeremi na nìi deò, tɔ̀ yeè bo e shi tsɛ, nìi yɛ ci:
18 Vu sɔn myɛɔ̀n, è bo Àramà wɔ̀ rɔ̀n, gɛɛy bo vu, ko ŋmunan vu brìsi.
Àràshɛl'lì gɛɛ e dzin nèè goofaa rà, à to na e tsiiŋnà mòò y'à mɛ̀nshɛ̀n waa,
kàtsu è na ni dɛ.
Yusufù yè e kpɛyn sèeŋ min niì Isirayɛli jamaan nɔn
19 Àyìwà Erodzì saunmaà shɔ̀ùn, Tsìfaà rè mɛ̀rɛ̀kɛ sɔn yeè e yɛrɛ kpadè Yusufù rà sìràn ɲàn Misiran jamaan nɔn.
20 E dzin à ra ci: «Fù, e dziɛ̀n ko e naà sen, e sèè è ka Isirayɛli jamaan nɔn, kàtsu nìì reè na dziɛ̀n gaa vurama, twɛy saun.»
21 Yusufù yè fù tɔ̀un, è dziɛ̀n ko e naà sen, yè kpɛyn sèè Isirayɛli jamaan doùn.
22 Àwà à myɛ̀unmaà à re ci Arikelayusì rìì tsùuŋnà Yude mar'la màsàbee tsɛ e fa Erodzì tsɔ̀saan ɲàn, mɔn bèè y'à shi. Tɔ̀un Ŋaablà y'a sɔ̀nmiun sìràn ɲàn, è dɔ̀n be Galile mar'lɔn.
23 À bèu mɔn, è bè e tsuù wɔ̀ sɔn ɲan, nìi tsoo Nazarɛtsì. Tɔ fau, sànko kɛɛra reè na nìi deò tɔ̀ tsɛ bɔrɔɔ Yesù rè goò ɲàn, tɔ̀ yeè bo e shi tsɛ, nìi yɛ ci:
À nà kiri Nazarɛtsika.