मर्कुस 9

येसु ताइको चात्यागेलाइहेङ कालाउ जेरहेङ दोअ्हि, “जातिङ भारि का नेलाइहेङ दोअ्खा, इता हिकालाइ सिलि खान्तेङ लाम्फा परमेस्वरको सासन एनोङ नावा कालाउ सरबुङसाइका रुपता तिङस्वाना।”

येसुको जिउ भाङगाइन्हाहि

(मति 17:1-13; लुक 9:28-36)

2 आथार दिना न्हुसो येसु पतरुस, याकुब कालाउ युहान्नाहेङ दोफाङ चुम्पुतेङ एनोङ झाउका तिकारता हानिहि। कालाउ चात्यागेलाइ खाङकाताङ-खाङकाताङ परमेस्वर येसुको जिउ भाङघाइ पापि हि। 3 वाको धाबा एसापा जेङहि कि फेलाउबुङ सुमिङ भरि हासु बुङ इन्सिका जाहाँका पालि मादोधाङ। 4 ओदोङ बेला उङको न्हेमि परमेस्वरको बक्ता मोसा कालाउ एलिया देखाल जेङल्हाहि कालाउ येसु दोफा काथा पालि तेङहि। 5 इसिका तिङतेङ पतरुस येसुहेङ दोअ्हि। “गुरुज्यु, केलाइ बुङ इता हिका एल्काङ जेङहि। केलाइ इता सुमलोङ खोपारा धामाइने, एनोङ नाङको भाअ्सिङ, भेनेङ मोसाको भाअ्सिङ, आरोङ भेनेङ एलियाको भाअ्सिङ।” 6 पतरुस मागिघाखे कि वा हाइ दोअ्खे हाइपालिपानु पतरुस, याकुव कालाउ युहान्ना मेनाङ थिनाङ। येसु इम्बालाइहेङ हाइ दोअ्का हिघाहि इङको मागिहि। 7 ओदोङ घुरि बादेल लोहि कालाउ इङको होइ ओबालाइहेङ थुम्हि। कालाउ बादेल लितासो परमेस्वर नुइधुइलि तेङहि, “वा काङको मायारु चान, नाअ् दोफा का लेङचाका हिघा वाको दोअ्का काथाता मन पिसु।” 8 इसिका दोअ्का हिङतेङ चात्यागेलाइ कोरपाहाङ खाङलाउ हासुहेङ बुङ तिङलि मादोहि। मोसा कालाउ एलिया इन्तासो हानिलि दोका हिघाहि, कालाउ इम्बालाइ येसुहेङ खिनिङ ताइमि दोफा तिङहि। 9 जेलाउ येसु कालाउ वाको सुमि चात्यागेलाइ तिकारसो खुअ्काताङ पालाउ, वा ओबालाइहेङ दोअ्हि, नेलाइ तिङका काथा हासुहेङ बुङ मादोअ्सु जेलाउ थेकापा “का द्याङको चान सिकासो मासिन्हुपा धाउ।” 10 ओदोङ भाअ्सिङ, ओबालाइ वाको दोअ्का काथा ताइमि दोफा ताअ्हि कालाउ ता-ताइमिता चाहि इसिका काथा पालि तेङहि कि सिकासो मासिन्हुपा दोअ्का मतलोप हाइ वाला। 11 कालाउ चात्यागेलाइ येसुहेङ हिअ्हि, हाइ व्यवस्थाता धिरपाका द्याङगेलाइको काथा सहिदोङ हि, किया जरुरि हि कि वा ख्रिस्ट खान्तेङ लाम्फा एलिया लोलि गोयाङ? एदि जातिङकोनु, वा एला थेकापा हाइ पालि लोका मान्थु? 12-13 येसु दोअ्हि, “जातिङ भारि का नेलाइहेङ दोअ्खा या सत्ये हि कि परमेस्वर एलियाहेङ दिङगिल लाङका दोअ्तेङ केरा चाका हिघाहि, कि वा गोताङ काथा थिक पालिको भाअ्सिङ लाम्फा ल्वाङ। कालाउ एलिया लाम्फा दोङ लोलि दोका हि, कालाउ केलाइको आगुवागेलाइ वाको दोफा मेनाङ मारेम्का व्यभार पाहि। जेलाउ वा पालि भोघाखे, जेसाङ कि परमेस्वरको बक्ता दोङ हेन्जाङ लाम्फा दोङ दोअ्का हिघाहि कि वा पावा। कालाउ का द्याङको चान, काङको बारेता धर्मसास्तरता हेन्जाङ काथा इसिका लेखेका हि, बचन दोङ दोअ्खे कि का हेन्जा दुख भोगिलि गोयाङ कालाउ द्याङगेलाइ कासेहेङ आसुइकार पावा।”

भुत-आत्मा धेल्का वाजान

(मति 17:14-21; लुक 9:37-43)

14 जेलाउ येसु कालाउ वाको सुमि चात्यागेलाइ तिकारसो खुतेङ लेता लोहि आरोङ चात्यागेलाइ हिका थामेता लोहि, इम्बालाइ इन्ता एनोङ बार्का द्याङगेलाइको जेर वाको कोरपाहाङ तिङहि कालाउ व्यवस्थाको गुरुगेलाइ चात्यागेलाइ दोफा नाइसुतेङ हिघाहि। 15 येसुहेङ तिङतेङसाङ द्याङगेलाइ भाङ-भाङहि, कालाउ धाअ्तेङसाङ हानितेङ सेउपाहि। 16 येसु इम्बालाइहेङ हिअ्हि, “हिदोइ काथाको बारेता नेलाइ बहस पातेङ हिसुना?” 17 द्याङको जेरसो एमि द्याङ येसुहेङ बिन्ति पाकाताङ दोअ्हि “प्रभु, काङको चान नाङकोता चुमाका हिघा। वाकोता भुत-आत्मा हि ओदोङ भाअ्सिङ वा नुइ धुइलि मादोखे। 18 जेलाउ बुङ भुत-आत्मादोङ वाको हुता झाअ्मिरिखे, भोनोइता लोङपाखे कालाउ वा नुइसो थोसि बिरखे, तासिङ रेअ्खे कालाउ रानथिउ-थिउखे कालाउ चाल मालाइलि मादोखे। का नाङको चात्यागेलाइहेङ भुत-आत्मा ओल्लेपालि दोअ्तेङ बिन्ति पाघा कालाउ ओबालाइ मादोहि।” 19 येसु इम्बालाइहेङ दोअ्हि, “ओइ खाङधुरि मापाका हारागुटियागेलाइ, का नेलाइ दोफा हेथे सोमोइ थेकापा हिलि? का एला नेलाइहेङ हेथे थेकापा सहितेङ हिलि? उङको वाजानहेङ काङकोता चुमासु।” 20 कालाउ इम्बालाइ उङको वाजानहेङ येसुकोता पिपुहि। जेलाउ भुत-आत्मादोङ येसुहेङ तिङहि उङको वाजान मुरसा परितेङ भोनोइता लोङहि। उङको वाजान नुइ भरि थोसि बिर्तेङ लोताइलि तेङहि। 21 कालाउ येसु वाको आबाहेङ हिअ्हि, “यासेहेङ इसिका जेङका हेथे जेङहि?” जामालसोङ इसिका जेङका हि दोअ्तेङ वाको आबा जोबाफ पिहि। 22 “भुत-आत्मासो वासेहेङ हेन्जा पोल्ति मेता कालाउ चिता लोङपातेङ सेअ्लि भोखे। नाअ् दोअ्न्हा पानु केलाइ हुता दाया पातेङ साघाइपि।” 23 येसु दोङ दोअ्हि, “का इसिका पालि माद्वाङ दोअ्तेङ नाअ् लिता साङखा हिलि माएल! जेसापा हिदोइ बुङ द्याङ का हुता खाङधुरि पाखे कालाउ गोताङ काथा सम्भव हि।” 24 इसिका हिङतेङ आबा चाहि ह्रिकाइतेङ दोअ्हि, “नेउ, का खाङधुरि पाङका। काङको खाङधुरि मापाकाता कासेहेङ साघाइपि।” 25 जेलाउ येसु आरोङ बुङ तिङहि, हेन्जा जेर वासेहेङ खाङलि जोम्तेङ हिघाहि वा दोङ भुत-आत्माहेङ चेरकाताङ दोअ्हि, “ओइ लाता कालाउ बहिरा पाका भुत-आत्मा, इदोइ वाजानसो ओल्लेतेङ लोउ, कालाउ वाको लिता आरोङ हेलाउ बुङ मादुल।” 26 इङको भुत-आत्मा र्ह्रिकाइतेङ कालाउ वाजानहेङ फेअ्न्हापातेङ ओल्लेतेङ हानिहि। वाजान चाहि सिनाङ भाइपाङ जेङहि। कालाउ झाराङ या वाजानते सिहोइ दोअ्लि तेङहि। 27 कालाउ येसु वाको खुर चातेङ ल्होपाहि कालाउ वाजान जाराक-जुरुकपा ल्होहि कालाउ एल्हि। 28 येसु कालाउ चात्यागेलाइ साअ् भारि घुरिहि चात्यागेलाइ ए-कुन्हाता येसुहेङ हिअ्हि, “केलाइ चाहि इङको भुत-आत्माहेङ हाइ पालि ओल्लेपालि मादोन्हाहि?” 29 कालाउ येसु दोअ्हि, “इन्सिका खाल्को भुत-आत्माहेङते प्रार्थानासो खिनिङ ओल्लेपालि दोअ्खे।”

30 न्हुसो येसु कालाउ चात्यागेलाइ इङको थामेहेङ लाअ्तेङ गालिल जिल्ला पाहासो हानिलि तेङहि। येसु मन पाघाखे कि इदोइ काथा हासु बुङ थाहा माग्याको, 31 हाइपालिपानु वा दोङ ताइको चात्यागेलाइ खिनिङ सेउपालि दोफा हेन्जाङ सोमोइ बितिपालि कालाउ धिरपालि खाङघाखे। वा दोङ इम्बालाइहेङ दोअ्हि, “धेमाङ का द्याङको चानहेङ सतुरुगेलाइको खाबाराता सुम्पिप्याङ, कालाउ इम्बालाइ कासेहेङ सेअ्तावा, कालाउ सुम्निता सिकासो सिन्हुतेङ ल्होकाङका।” 32 चात्यागेलाइ इदोइ काथा दोअ्का माबुझिहि, कालाउ वासेहेङ हिअ्लिबुङ थिघाहि।

माहान हासु हि?

(मति 18:1-5; लुक 9:46-48)

33 येसु कालाउ वाको चात्यागेलाइ कर्फनहुम सहरता ताइको साअ्ता लोहि। साअ्ता लिता दुल्लाउ येसु इम्बालाइहेङ हिअ्हि, “दामाता लोलाउ नेलाइ हाइको बारेता बहस पाघा सुघासुखेना?” 34 कालाउ इम्बालाइ हाइदोङ मादोअ्हि, हाइपालिपानु इदोइ दोअ्तेङ नाइसु घाखे कि, “केलाइ मध्येसो हासु बार्का वाला?” 35 कालाउ येसु योम्हि कालाउ तेन्हे झना चात्यागेलाइहेङ काइतेङ दोअ्हि, “हेन्जा इज्जत भोलि खाङकालाइ झाराङ खान्तेङ म्हुइका जेङतेङ झाराङको काम पालि गोयावा।” 36 कालाउ येसु दोङ एमि म्हुइका जामालहेङ ताइको दोफा चुमाहि कालाउ जामालहेङ खोम्तेङ दोअ्हि, 37 “जेसापा हिदोइ बुङ द्याङ का हुता खाङधुरि पाखे दोअ्तेङ एमि जामालहेङ दाया तिङपाखे पानु वा जातिङको आदर पाखे। कालाउ हिदोइ बुङ द्याङ कासेहेङ आदर पाखे पानु जातिङको परमेस्वरको आदर पाखे जाइ दोङ कासेहेङ दिङगिल्हि।”

38 युहान्ना येसुहेङ दोअ्हि, “हे गुरुज्यु, केलाइ एमि द्याङहेङ नाङको मिङ ल्होतेङ भुत-आत्मागेलाइहेङ ओल्लेपातेङ हिका तिङन्हाहि। कालाउ वा केलाइको चात्यागेलाइ मध्येको माकोनाङ वासेहेङ रोकिन्हाहि।” 39-40 येसु दोअ्हि, वा केलाइको बिरोधता मान्थु उङको केलाइको पक्स्यताङ हि। ओदोङ भाअ्सिङ जाइ दोङ लाउबुङ काङको मिङता भारभुसाइका काम पाखे, वा तुरुन्तै काङको बिरोधता खाराका काथा धुइलि माद्वाङ ओदोङ भाअ्सिङ वासेहेङ मारोकेसु। 41 जातिङ भारि का नेलाइहेङ दोअ्खा, “हासु बुङ नेलाइहेङ ख्रिस्टको द्याङ दोअ्तेङ ए गिलास चि आम्लि खिनिङ पिनु वा हेसा पालाउ बुङ इनाम निनावा।”

बाधा पिकाहेङ चेताउनि

42 येसु आरुङ दोअ्हि, हासुहेङ बुङ ताइको निर्घाता जान्ता तोइतेङ समुन्द्रता थाल्लि मारेम्का साजाइदोङ। कालाउ जेसापा हासु बुङ काङको हुता खाङधुरि पाका इदोइ म्हुइकालाइको मध्ये एमिहेङ बाधा पिनु वासेहेङ इदोइ खान्तेङ मारेम्का साजाइ जेनावा। 43 जेसापा नेलाइ पाप पालिको भाअ्सिङ ताइको खुरहेङ पाप पालि लागाइलि सोचितेङ हिसुना पानु इङकोहेङ पाल्पि। न्हेनोङ खुर नरकता हानिलि खाङतेङ भरु कुजिया जेङतेङ स्वर्गता दुल्लि हेन्जा रेम्कादोङ जेनाङ। 44 नरकता जिउहेङ चाका पेअ्सा हेलाउ बुङ मासिखे कालाउ दालदालाइतेङ हिका मेबुङ हेलाउ बुङ मासिखे। 45 जेसापा नेलाइ पाप पालिको भाअ्सिङ ताइको खोकोइहेङ लागाइलि सोचितेङ हिका हिसुना पानु इङकोहेङ पाल्पि। न्हेनोङ खोकोइ नरकता हानिलि खाङतेङ भरु कुजिया जेङतेङ स्वर्गता दुल्लि हेन्जाङ रेम्कादोङ जेनाङ। 46 नरकता जिउहेङ चाका पेअ्सा हेलाउ बुङ मासिखे कालाउ दालदालाइतेङ हिका मेबुङ हेलाउ बुङ मासिखे। 47 जेसापा नेलाइ पाप पालिको भाअ्सिङ ताइको मिसियाँहेङ पाप पालि लागाइलि सोचितेङ हिका हिसुना पानु इङकोहेङ पाल्पि। न्हेनोङ मिसियाँ नरकता हानिका खाङतेङ भरु कान्हाँ जेङतेङ परमेस्वरको सासनता दुल्लि हेन्जाङ रेम्काङ जेनाङ। 48 नरकता जिउहेङ चाका पेअ्सा हेलाउ बुङ मासिखे कालाउ दालदालाइतेङ हिका मेबुङ हेलाउ बुङ मासिखे। 49 हाइपालिपानु देसेहोइ बलिदान सुद्द बानाइका भाइपाङ झाराङहेङ मेहोइ खारियावा। 50 देसेते एनोङ आवस्यक आनेमानेदोङ कालाउ देसेदोङ चेचेका जेङनु हाइहोइ ताइका बानाइलि? नेलाइको ता-ताइमिता “देसेको गुन हिलि गोइखे कालाउ एमिसो भेनेङ दोफा सान्तिसो मिलितेङ हिलि गोइखे।”