मत्ती 2

हेरोद राजाको सोमोइता याहुदिमको बेथेलेहेमता जेलाउ येसुःको जोलम जेङ्हिः, इन्ता नुहेसो ज्योतिसिगेलाइ यरूसेलेमता लोहि कालाउ ओबालाइ दोअ्हि | 2 यहुदिगेलाइको राजा जेन्तेङ जोलम जेङका हिसो हि, हाइपालिदोनु | केलाइ वाको फुरु नुहे तिङनाहि कालाउ केलाइ वासिहेङ सेउपालि लोका हिनाहिः| 3 जेलाउ हेरोद राजा इङ्को हिङ्हिः, वा निरासा जेङ्हिः कालाउ वाको दोफाङ गोताङ यरुसेलेमबुङ निरासा ज़ेङहि | 4 "कालाउ वा गोताङ बारर्का धामिगेलाइ हेङ् कालाउ द्याङगेलाइको सास्तिरिगेलाइ जोम्पाहि, कालाउ हिअ्हि, ""ख्रिस्तको जोलोम हिसों जेनाङ ?" 5 ओबालाइ वासिहेङ दोअ्हि, यहुदियाको बेथेलेहेमता | हाइपालि दोनु अगमबक्ता लेखीका हि | 6 ओइ बेथेलेहेम, यहुदा सारभिको देरागेलाइ, ना हिदिबुङ यहुदाको सासकको माझाता हिदोइ खान्तेङ्बुङ आतुङ्का मान्थुना, हाइपालिदोनु नाङ्को एलोङ सासक उल्लेहेतेङ लावा, वादोङ काङ्को द्याङ इस्राएल हेङ खानावा | ' 7 कालाउ हेरोद राजा इङ्को ज्योतिसिगेलाइ हेङ ए-कुन्हा मातिङका थामेता काइतेङ फुरु हिदोइ पहर हि, इङको ओबालाइसो भेचा पाहि | 8 वा ओबालाइहेङ एसा दोअ्तेङ बेथेलेहेमता दिङ्गिलहि, हानेसु ,कालाउ रेम्फा इङ्को चानहेङ भोसु, वासिहेङ निङ्नु कासेहेङ्बुङ बानाल दोअ्पिसु | कालाउ काबुङ वासिहेङ लोतेङ तिरु थोतेङ सेउपाङ्का |'' 9 जेलाउ इम्बालाइ राजाको काथा हिङतेङ ताइको दामा चाहि , जेदङ फुरु ओबालाइ न्हुहे भारि तिङ्का हिघाखे, इङ्को फुरु ओबालाइको आगा-आगापाहा हानिहि, कालाउ जामाल हिका थामेता थुकातेङ इङ्को फुरु इन्ताङ जाअ्हि | 10 जेलाउ ओबालाइ इङ्को फुरु तिङ्हि, कालाउ ओबालाइ हेन्जा लेङचाहि | 11 कालाउ इम्बालाइ सालिता दुल्तेङ ओबालाइ जामालहेङ वाको आमाइ मरियमको कोल्हेता हिका तिङ्हि, कालाउ पोम्भेलेतेङ वासिहेङ सेउपाहि | कालाउ ताइको सिपि खाइतेङ वासिहेङ सोना, मालामालाका धुमाना कालाउ मुराको ताका चढ़ाइहि | 12 कालाउ इम्बालाइ हेरोदकोता घुरितेङ मानिसु दोअ्तेङ सपनाता थिपाहि | कालाउ इम्बालाइ भेनेङ दामापाहा सो ताइको सारभि भारि ओबालाइ घुरिहि | 13 ओबालाइ इन्तासो हानिलि दोअ्तेङ , परमप्रभुको एलोङ दुत सपनाता योसेफ दोफा तिङ चालाहि कालाउ वा एसा दोअ्हि, ''ल्हो, म्हुइका जामाल कालाउ वाको आमाइ सुधाङ दोफाङ मिस्र सारभिता खासु,कालाउ नासिहेङ का जेलाउ थेकापा माद्वाङका एन्सालाउ थेकापा इनता हि | हाइपालिदोनु ,जामालहेङ से:लिको भासिङ हेरोद राजा जामालहेङ भो:लि तेङहि | '' 14 कालाउ वा ल्होतेङ म्हुइका जामाल कालाउ जामालको आमाइहेङ आधा न्हिसिनता दोफाङ चुम्तेङ मिस्र सारर्भिता हानिहि , 15 कालाउ हेरोद मासिपा भर इम्बालाइ इन्तादौङ हि,'' परमप्रभु वाको दोफा काथा दोअ्हि एसा अगमबक्ता सो पुरा जेङहि , ''का काङको चानहेङ मिस्र सारभि सो काइघा |'' 16 ज्योतिसिगेलाइ हेरोद राजाहेङ धाताइका थाहा गिहि, कालाउ वा इसका चेरताम्पाही | कालाउ वा बेथेलेहेमको कालाउ भेरपाको थामेगेलाइको न्हें बासार कालाउ इन्तासो म्हुइका गोताङ जामालगेलाइ से:लि लागाइ हि | 17 जेलाङ यर्मिया अगमबक्ता दोअ्हि, इङ्को बचन पुरा जेङहि , 18 ''रामाता एलोङ गाला हिङ्हि, जिउधाइ ल्होपा खारकाङ-खारका कालाउ बार्का गालासो, उदाङ्का राहेल ताइको जामाल गेलाइको भासिङ खारतेङ्साङ हिका,आरुगेलाइ लाइपालाबुङ वा माकिका ,हाइपालिदोनु एला वाको जमालगेलाइबुङ मान्थु | '' 19 कालाउ हेरोद राजा सि:काको न्हुसो, परमप्रभुको एलोङ स्वर्ग-दूत सपनाता योसेफ दोफा तिङ्चालाहि, मिस्रता एसा दोअ्हि, 20 'ल्हो, कालाउ जामाल वाको आमाइहेङ दोफाङ चुम्तेङ इस्राएल सारभिता हानेसु, हाइपालिदोनु जामालहेङ से:लि खाङ्कालाइ झाराङ सिहइ | '' 21 कालाउ वा ल्होतेङ ताइको जामाल कालाउ जामालको आमाइहेङ ताइदोफा चुम्तेङ इस्राएल सारभिता घुरिहि | 22 यहुदियाता ताइको आबा हेरोदको थामेता वाको चान, अख्रिलाउस राज्या पाका दोअ्का हिङ्तेङ योसेफ इन्सो हानेलि थिहि, कालाउ सपनाता चेताना निङ्तेङ वा गालिल दोअ्का सहरको थामेभारि हानिहि | 23 कालाउ वा नासरत दोअ्का सहरता हानितेङ हि , एसापा अगमबक्ता गेलाइसो दोन्हाका वचन थुकाहि: ''वासिहेङ दोङ नासरि दोअ्खे | ''