हजार बरस
20
1 फेर म आम्बर सुं एक सरगदूत न्अ नीच्अ उतरतो देख्यो। बीका हाथ मं पताळ की चाबी अर एक बड़ी सांकळ छी। 2 वो बी पराणा बड़ा अजगर न्अ पकड़ लियो ज्यो रागस यान्अ सेतान छ। फेर एक हजार बरस क ताणी बीन्अ सांकळ सुं बांध दिया। 3 फेर वो सरगदूत बीन्अ उण्डा पताळ मं पटकर ताळो लगा दियो अर बीक्अ मोहर लगार बंन्द कर दियो। जिसुं क हजार बरस पूरा होबासुं पेली वो और लोगबागा न्अ धोखो कोन दे सक्अ। फेर हजार बरस पूरा होया पाछ्अ बीन्अ थोड़ी बगत क ताणी छोड़यो जाव्अलो।4 फेर म घणासारा सिंहासन अर बांक्अ माळ्अ बेठ्या लोगबाग देख्यो। बान्अ न्याय करबा को अधिकार दियो गियो छो। फेर म बा लोगबागा की आत्मा न्अ देख्यो ज्यांका माथा ईसु की गुवाई देबा की बजेसुं अर परमेसर का बचन की बजेसुं काट्या गिया छा, वे बी ड़रावणा ज्यानबर की अर बीकी मूरती की आराधना कोन कर्या। अर वे बीकी छाप खुदका माथा अर हाथ माळ्अ कोन लिया। वे जिन्दा होर मसी की लार हजार बरस ताणी राज करअला। 5 जद ताणी एक हजार बरस पूरा कोन होव्अला बाकी मरेड़ा जिन्दा कोन होव्अला।
यो पेलो जिन्दो होबो छ। 6 वो धनै अर पवितर छ ज्यो पेला जीन्दा होबा म्अ पांतीदार छ। या माळ्अ दूसरी मोत को कोई अधिकार कोन्अ। पण वे परमेसर अर मसी की सेवा करबाळा होव्अला अर बीकी लार हजार बरस ताणी राज करअला।
सेतान की हार
7 जद हजार बरस पूरा होव्अला तो सेतान न्अ केद मं सुं छोड़ दियो जाव्अलो। 8 अर वो धरती माळ्अ फेलेड़ी जात्या न्अ छळबा नखळ पड़्अलो। ज्यांन्अ गोग अर मागोग खेव्अ छ। वे सागर की रेत की जस्यान अणगणती का होव्अला ज्यांन्अ भरमार सेतान लड़ाई बेई भेळा करअलो। 9 सेतान की सेना सबळी धरती माळ्अ फेलर पवितर लोगां का डेरा न्अ अर प्यारी नगरी न्अ घेर लेव्अली। पण सरग सुं आग उतर'र बान्अ भसम कर देव्अली, 10 फेर बान्अ छळबाळा सेतान न्अ आग की झील अर तज्याप मं पटक दियो जाव्अलो, जिम्अ वो ड़रावणो ज्यानबर अर परमेसर की ओड़ी सुं झूंटमाट बोलबाळो बी होव्अलो, अर वे जुग-जुग ताणी पीड़ा मं रात-दन तड़फडाता रेव्अला।
संसार का लोगबागा को न्याय
11 फेर म एक बड़ा धोळा सिंहासन अर बीक्अ माळ्अ बेठ्यो छो बीन्अ देख्यो। बीक्अ साम्अ सुं धरती अर आम्बर भागगा। अर वांको नामुनिसाण मटग्यो। 12 फेर म सबळा छोटा-बड़ा मरेड़ा न्अ सिंहासन क्अ साम्अ उबा देख्यो। अर कताबा खोली गई। फेर एक ओर कताब खोली गई मतलब “जन्दगी की कताब”। अर जस्यान बां कताबा मं लिख्यो गियो छो वस्यानई वांका कामा की जस्यान बाको न्याय कर्यो गियो। 13 ज्यो सागर मं मरया छा सागर बान्अ देदियो, अर ज्यो पताळ मं मरया छा पताळ बी बान्अ देदियो। अर सबळा को न्याय वांका करमा की जस्यान कर्यो गियो। 14 ईक्अ पाछ्अ मोत अर पताळ न्अ आग की झील म्अ पटक दिया। या आग की झील ई दूसरी मोतa छ। 15 अर जिको बी नांऊ जन्दगी की कताब मं मण्ढेड़ो कोन लाद्यो, बीन्अ आग की झील मं धक्को दियो जाव्अलो।