प्रकासित वाक्य 12

लुगाई अर बड़ो अजगर

1 फेर आम्बर मं बड़ो नसाण दिख्यो। उण्डअ एक लुगाई दीखी ज्यो सुरज न्अ ओढ मेली छी अर चांद बीका पगा तळ्अ छो। बीका माथा माळ्अ मुकुट छो जिम्अ बारा तारा लागमेल्या छा। 2 बा पेटसुं छी। अर बा जणबाळी छी जिसुं बा पीड़ा मं बळ्ळारी छी।

3 आम्बर मं एक ओर नसाण दिख्यो। म्हारअ साम्अ एक लाल रंग को बड़ो अजगर ऊबो छो। बीक्अ सात माथा अर दस सींग छा बीका सातू माथा माळ्अ सात मुकुट छा। 4 बीकी पूंछ आम्बर का सबळा तारा का तीसरा हस्सा न्अ खींचर नीच्अ पटक दी। बा लुगाई ज्यो जणबाळी छी, वो अजगर बीक्अ साम्अ जार ऊबो होगो जिसुं क बा जस्यानई बाळक न्अ जण्अ वो बी बाळक न्अ नंगल जाव्अ। 5 बा एक छोरो जणी ज्यो लोया को राजदण्ड लेर सबळी जात्या माळ्अ राज करबाळो छो। पण बी बाळक न्अ झठदाणी उठा'र परमेसर अर बीका सिंहासन क साम्अ ले जायो गियो। 6 अर बा लुगाई उजाड़ थळा मं भागगी। बी ठोर न्अ परमेसर बीक्अ ताणी त्यार कर मेल्यो छो क बा बी ठोर मं एक हजार दो सौ साठ दन ताणी जिन्दी रखी जा सक्अ।

7 फेर सरग मं एक लड़ाई छड़गी। खास सरगदूत मीकाईल अर बीका सरगदूत बी बड़ा अजगर सुं लड़बा नखळ्या। अर वो अजगर बी बीका दूता की लार वासुं लड़यो। 8 पण वे अजगर न्अ हरा दिया अर वो अजगर बासुं जीत कोन पायो। अस्यान सरग मं बाकी ठोर हाथ सुं नखळगी। 9 वो बड़ो अजगर धरती माळ्अ पटक दियो गियो। यो बोई पराणो सांप छ ज्यो रागस अर सेतान खुवाव्अ छ। यो सबळा संसार न्अ भरमाव्अ छ। अर बीन्अ बीका दूता की लार नीच्अ धरती माळ्अ पटक दिया।

10 फेर म जोरसुं एक आकासवाणी हेती सुण्यो, “अब परमेसर को उद्धार आयो छ। अब परमेसर बीकी सक्‍ती न्अ राजा का रूप मं दखायो छ। बीको मसीह बीकी सक्‍ति न्अ दखायो छ, क्युं क मसी का बस्वास्या माळ्अ दोष लगाबाळो, ज्यो रात-दन परमेसर क साम्अ वाप्अ दोष लगाव्अ छो, बिन्अ धक्‍को देर नीच्अ पटक दिया। 11 वे उण्णेठा का चढ़ाया लोई सुं अर बांकी दियेड़ी गुवाई सुं बीन्अ हरा दिया। अर वे खुदकी ज्यान की बी परवा कोन कर्या। 12 ई बजेसुं सरग अर सरग मं रेबाळाओ खुसी मनाओ। पण धरती अर सागर थांक्अ ताणी कतरो बरो होव्अलो क्युं क सेतान अब थां माळ्अ उतर'र आग्यो। अर वो गुस्सा मं लाल पीळो हेर्यो छ। क्युं क वो या जाण्अ छ क अब बीकी थोड़ी ई बगत ओर बाकी छ।”

13 जद वो बड़ो अजगर देख्यो क बीन्अ धरती माळ्अ धक्‍को देर पटक दिया तो वो छोरा न्अ जणबाळी लुगाई को पाछ्‍यो करबा लागगो। 14 पण बी लुगाई न्अ बड़ी चील की जस्यानका पांखड़ा दिया गिया छा जिसुं क बा बीक्अ ताणी त्यार करेड़ा उजाड़ मं उड़र चलजाव्अ। जण्ढ्अ साढ़ी तीन बरस ताणी बी अजगर सुं आंतरअ रांखर बी लुगाई को पालण-पोषण कर्यो जाणो छो। 15 फेर वो बड़ो अजगर बी लुगाई न्अ डुबाबा बेई बीका मूंडा सुं नन्दी की जस्यान पाणी नखाळ्यो। 16 पण धरती बी लुगाई की सायता करी अर बी बड़ा अजगर का मूंडा सुं नखळेड़ी नन्दी न्अ नंगलगी। 17 ईक्अ पाछ्अ वो बड़ो अजगर बी लुगाई माळ्अ गाडो रोषा होगो अर वो बीका वंस क ज्यो परमेसर को खियो मान्अ छा अर ज्यो ईसु की गुवाई न्अ मान्अ छा बासुं लड़बा नखळ्यो। 18 अर वो बड़ो अजगर सागर की तीरां माळ्अ ऊबो होगो।