यूहन्ना को दूसरो कागद
2 यूहन्ना
1
1 म बस्वास्या की टोळी को मुखियो यूहन्ना उं बेरबानीa क नांऊ ज्यो परमेसर सुं चुणी गेई छ अर उंका बाळका क नांऊ ज्यांन्अ म सांच्याई परेम करू छु यो कागद माण्ढ़र्यो छु। म ऐकलो नही पण वे सबळा थान्अ परेम करअ छ ज्यो सांच न्अ जाण्या छ।2 वो उं सांच की बजेसुं होयो छ ज्यो आपा मं रेव्अ छ अर सदामेस आपणी लार बण्यो रेव्अ छ।
3 पिता परमेसर अर उंका छोरा ईसु मसी की ओड़ी सुं उंको अनुग्रह, दीया अर सांति सदा आपणी लार सांच अर परेम मं बणी रेव्अली।
सांच अर परेम
4 जस्यान आपान्अ आपणो पिता परमेसर आज्ञा दियो छो वस्यान थारा एकात छोरा-छोर्या न्अ उं सांच की जन्दगी जीता देखर म घणु राजी होयो। 5 bअर अब ओ बेरबानी, म थन्अ ओर कोई नुई आज्ञा कोन्अ देऊ पण वाई ज्यो सरूवात सुं आपण्अ कन्अ छ माण्ढ़र्यो छु, क आपा बस्वासी बेण भाई आमा-सामा हेत रखाणा। 6 परेम को मतलब योई छ क आपा उंका आदेसा न्अ माना। या वाई आज्ञा छ जिन्अ थे सरूवात मं सुण्या छा क थान्अ परेम सुं जीणी चायजे।
7 संसार मं घणा अस्या भरमाबाळा छ ज्यो या कोन्अ मान्अ क ईसु मसी काया मं होर आयो छ। येई भरमाबाळा अर मसी का बेरी छ। 8 खुद साऊचेत रेवो क थे उन्अ कोन्अ गमाओ जिबेई आपा मेनत कर्या छा, पण थान्अ तो थांको पूरो फळ लेणी छ।
9 कोई बी ज्यो मसी की सक्ष्या मं बण्यो कोन्अ रेव्अ अर आग्अ नखळ जाव्अ छ, उकन्अ परमेसर कोन्अ; अर ज्यो उंकी सक्ष्या मं बण्यो रेव्अ छ, उकन्अ बाप अर छोरो दोनी'ई छ। 10 अर कोई थां कन्अ आव्अ अर मसी की सांची सक्ष्या कोन्अ देव्अ तो उन्अ घर मं मत आबाद्यो अर नमस्कार बी मत करो। 11 क्युं क ज्यो अस्यानका मनखा की आवभगत करअ छ, तो वो उंका बरा कामा मं पांतीदार बणजाव्अ छ।
आखरी बाता
12 मन्अ घणी बाता माण्ढ़णी छ पण कागद प्अ स्याई सुं कोन्अ माण्ढबो चाऊ; पण मन्अ आसा छ क थां कन्अ आर आम्अ-साम्अ बेठर बतळाव्अला। जिसुं आपणो आण्द पूरो हो जाव्अ।
13 थारी बेणाc का छोरा-छोर्या को थान्अ नमस्कार मल्अ। ज्यांन्अ बी परमेसर थरप्यो छ।