भेदभाव मत करो
2
1 ह म्हारा भाई-बेणो, आपणा महमावान परबु ईसु मसी प थे बस्वास करो छो जिसुं थांका बीच मं भेदभाव कोन होणो चायजे। 2 क्युं क जद्या थांकी सभा मं एक मनख सोना की मूंदड़ी अर सुआवणा लत्ता पेराया आव्अ, अर एक नरचूं गरीब मनख फाट्या-पराणा लत्ता पेराया आव्अ, 3 अर थे बी सुआवणा लत्ता पेरबाळा को मूंडो देखर खेवो छो क, “थे बी चोखी ठोर मं बेठो”, अर बी गरीब सुं खेवो छो क, “क तु तो अण्डअ उबो रे, अर क म्हारा पगा क सांकड्अ बेठजा।” 4 तो कांई थे आमा-सामा भेदभाव कोन कर्या अर खोटा बच्यार सुं न्याय करबाळा कोन ठेरया।5 ह म्हारा प्यारा भायाओ, परमेसर कांई ई संसार का गरीबा न्अ कोन थरप्यो, क वे बस्वास मं अमीर अर परमेसर का राज का बारिस होव्अ जिको वादो वो बीसुं परेम करबाळा सुं कर्यो छो। 6 पण थे बी गरीब को मान उतार्या छो। कांई अमीर मनख थां माळ्अ जुलम कोन करअ, अर बेई थान्अ पंचा क साम्अ घीस्अ छ। 7 कांई वे उं मसी का चोखा नांऊ को अपमान कोन करअ जिका थे छो?
8 अर ज्यो थे सांच्याई बी साही बेवस्था न्अ मानो छो ज्यो पवितर सास्तर का ई बचन की जस्यान क, “तु खुदका पाड़ोस्या सुं खुदकी जस्यान परेम रांख”, तो चोखो ई करो छो। 9 पण थे भेदभाव करो छो तो पाप करो छो अर बेवस्था थान्अ अपराधी ठेराव्अ छ। 10 क्युं क ज्यो कोई सारी बेवस्था न्अ मान्अ छ पण एक'ई बात मं चूकग्यो तो वो सारी बाता मं दोषी ठेरग्यो। 11 क्युं क ज्यो या बात बोल्यो छ क, “व्यभिचार मत करज्यो”, वोई या बी बोल्यो छ क, “तु हत्या मत करज्यो”, अस्यान तु कोई की लार व्यभिचार तो कोन कर्यो पण खून कर्यो छ, तोबी तु बेवस्था न्अ उंगालबाळो छ। 12 थे बां मनखा की जस्यान बोलो अर काम करो, ज्यांको न्याय आजाद करबाळी बेवस्था का आधार प्अ होव्अ छ। 13 क्युं क ज्यो दीया कोन कर्यो, बीको न्याय बना दीया क होव्अलो, दीया न्याय न्अ जीत लेव्अ छ।
बस्वास अर काम
14 ह म्हारा भायाओ, कोई खेव्अ क मन्अ बस्वास छ पण वो काम कोन करअ, तो इम्अ कांई फायदो? कांई अस्यानको बस्वास उन्अ बचा सक्अ छ? 15 कोई भाई-बेण उघाड़ा होव्अ अर बान्अ रोजीना रोठ्या कोन मल्अ, 16 अर थाम्अ सुं कोई बान्अ खेव्अ, “सांति सुं जा, नुवायो रे अर धापेड़ा रिज्यो”, पण ज्यो चीजा काया बेई छाव्अ वे कोन देव्अ तो कांई फायदो। 17 अस्यान'ई बस्वास बी काम की लार कोन होव्अ तो खुद मरेड़ो छ।
18 पण कोई खेव्अ छ क, “थे बस्वास करो छो अर म्हे काम करां छा। तो थे मन्अ खुदका बस्वास न्अ कामा क बना दखाओ, अर म थान्अ खुदका बस्वास न्अ म्हारा कामा सुं दखाऊलो।” 19 थान्अ बस्वास छ क एक'ई परमेसर छ? तो चोखो छ। दुष्टात्मा बी यो बस्वास करअ छ अर कांप्अ छ। 20 पण ह मूरख, तु या बात जाणबो छाव्अ छ कांई क करम क बना बस्वास बेकार छ? 21 जद्या आपणो बाप अबराम खुदका छोरा इसहाक न्अ बलिदान करबा बेई यज्ञ कुण्ड प चढ़ायो छो, तो कांई करमा सुं धरमी कोन ठेर्यो छो? 22 अस्यान थे देख लिया क उंको बस्वास अर उंका काम मलर लारा काम कर्या, अर कामा सुं बस्वास पक्को होग्यो, 23 अर पवितर सास्तर को यो बचन पूरो होग्यो, “अबराम परमेसर को बस्वास कर्यो, अर बीकी बजेसुं धरमी मान्यो गियो,” अर वो परमेसर को बायलो खुवायो। 24 अस्यान थे देख लिया क कामा सुं मनख धरमी ठेरअ छ, कोरा बस्वास सुं नही।
25 वस्यान ई राहाब वेस्या बी करमा सुं धरमी ठेरी, क्युं क वा भेद लेबाळा इजरायल का दूता न्अ खुदका घर मं सरण दी, अर वान्अ बचाबा बेई दूसरा गेला सुं खन्दा दी।
26 अर जस्यान काया आत्मा बना मरेड़ी छ, ठीक वस्यान ई बस्वास बी कामा बना मरेड़ो छ।