आखरी चेतावणी
13
1 या तीसरी बार छ जद्या म थासुं मलबा आर्यो छु। जस्यान सास्तर खेव्अ छ “हरेक बात को फेसलो दो-तीन गुवा की गुवाई सुं कर्यो जाव्अ।” 2 जद्या म थांकी लार छो जद्या बी अर अब जद्या म थासुं आंतरअ छु, म वा मनखा न्अ ज्यो पेली पाप कर्या छा, अर वां सबळा मनखा न्अ फेरू खेऊ छु ज्यो म्हारो दुबारा आबो होग्यो तो म वान्अ कोन छोडुलो। 3 म अस्यान जिसुं खेर्यो छु क थे ई बात को सबुत चावो छो क म्हारअ मेईन्अ मसी बोल्अ छ। वो थांक्अ बेई कमजोर कोन्अ, पण थांक्अ मायन्अ खुदकी सक्ति दखाव्अ छ। 4 वो कमजोरी म छो तो वो करूस प मर्यो पण वो परमेसर की सक्ति सुं जिन्दो छ। अर उंका गठजोड़ मं म्हे बी तो कमजोर छा पण थांका भला बेई परमेसर की सक्ति की बजेसुं उंकी लार जीव्अला।5 खुदन्अ परखो अर देखो क थे बस्वास म खरा छो, अर ज्यो थे खरा छो तो थान्अ तोल पड़्अलो क मसी थाम्अ जीव्अ छ। ज्यो ईसु मसी थाम्अ कोन जीव्अ तो ईको मतलब यो छ क थे फेल होग्या। 6 अर म आसा करू छु जद्या थे हेरअला तो पाव्अला क म्हे नाकाम कोन होया। 7 अर म्हे परमेसर सुं परातना करां छा क थे बराई मत करो। यो ई बजेसुं कोन्अ क म्हे म्हाकी कामयाबी न्अ दखावा छा, पण जिसुं क थे वोई करो ज्यो सही छ, छाव्अ आपा फेल ही क्युं कोन दीखां। 8 क्युं क म्हे कद्या बी सच्चाई का बिरोध मं कोन गिया। पण ज्यो कांई बी कर्या वो सांच बेई कर्या छा। 9 म्हे राजी छा जद्या म्हे कमजोर अर थे तागतबर छा। अर जिसुं या परातना बी करां छा क थे मजबुत सुं बी मजबुत बणो। 10 ई बजेसुं थासुं आंतरअ रेताहोया बी म या बाता न्अ थां बेई मांडर्यो छु। जिसुं क जद्या म थां कन्अ आंउ तो मन्अ परमेसर का दियेड़ा अधिकार न्अ कळ्डाई दखाबा बेई काम मं कोन लेणो पड़्अ यो अधिकार थान्अ गराबा बेई कोन्अ पण थान्अ बणाबा बेई छ।
आखरी नमस्कार
11 अरअ भायाओ, म आखरी मं यां सबदा की लार ई कागद न्अ बंद करू छु क राजी-खुसी रेवो, थांको बेवार बदलो, एक-दूसरा न्अ हिम्मत बंधाओ, सान्ति सुं अर मल-जुलर रेवो। तो परमेसर ज्यो सान्ति अर परेम को देबाळो छ वो थांकी लार रेव्अलो। 12 एक-दूसरा सुं गळ्अ मलर मान करो। सबळा परमेसर का मनख थान्अ नमस्कार मांड़अ छ। 13-14 परबु ईसु मसी की दिया अर परमेसर को परेम अर पवितर-आत्मा को साथ थां सबळा की लार होतो रेव्अ।