पौलुस अर झूंटा थरपेड़ा चेला
11
1 म तो बावळ्यो छु, फेरबी म चाऊ छु क जद्या म बावळ्या की जस्यान करू तो थे उन्अ दीया करर सेन करल्यो। 2 क्युं क जस्यान परमेसर थांकी चन्ता करअ छ वस्यानई म बी थांकी चन्ता करू छु अर थे पवितर कुंवारी छोरी की जस्यान छो ज्यांको बियाव म मसी की लार करबा को करार कर्यो छु। 3 पण म डरपु छु क कढी अस्यान कोन हो जाव्अ क जस्यान हजारू बरसा पेली आपणी आदि माता हवा न्अ सांप चतराई सुं बेहकायो छो, वस्यानई थांका हीया न्अ जिम्अ मसी बेई थांकी खरी भगती अर पवितरता छ, कोन बेहका दे। 4 क्युं क म्हे जि ईसु का उपदेस थान्अ बताया छा अर ज्यो पवितर-आत्मा थान्अ मली अर ज्यो चोखो समचार थे मान्या उंक्अ अलावा ज्यो थे कोई मनख न्अ दूसरा ईसु का बारा म्अ बोलबा द्यो तो ईको योई मतलब छ क थे ओर'ई चोखा समचार न्अ अर ओर'ई आत्मा न्अ मानबा अर ओर'ई ईसु न्अ लेबा बेई राजी छो।5 म या कोन बच्यारू क म थांका वां खास थरपेड़ा चेला सुं छोटो छु। 6 हो सक्अ छ म बोलबा म अनाड़ी छु, पण ज्ञान म कम कोन छु। अर ई बात न्अ म्हे हरेक बात मं थां बेई परगट कर्या छा। 7 म थान्अ ऊंचा करबा बेई खुदन्अ छोटो करर थान्अ सितमात मं परमेसर को चोखो समचार सुणार कोई पाप कर दियो कांई? 8 बस्वास्या की टोळ्यां सुं ज्यो सायता मन्अ मली छी उन्अ लेर म वान्अ लूट्यो छु कांई? जिसुं म थांकी सेवा कर सकुं। 9 aअर जद्या म थां कन्अ छो तो मन्अ कमी घटी हेई छी उं बगत बी म थांप्अ कोई बोझ कोन पटक्यो। क्युं क मकिदुनिया सुं म्हारा भाया आर म्हारी सबळी जुरता पूरी कर्या छा। अर म हरेक बार खुदन्अ थाप्अ बोझ बणबा सुं रोक्यो, अर आग्अ बी रोकुंलो। 10 अर ज्यो मसी की सच्चाई म्हारअ मायन्अ छ तो म वादो करू छु अखाया देस मं कोई बी मन्अ ई बात मं घमण्ड करबा सुं कोन रोक सक्अ। 11 अर म्हारा खेबा को यो मतलब थोड़ी छ क म थासुं परेम कोन करू? परमेसर ई बात न्अ जाण्अ छ क म थासुं परेम करू छु।
12 ई बजेसुं ज्यो कांई बी म अबार करू छु उन्अ तो करतो रेऊलो, जिसुं वा थांकी ओड़ी सुं थरपेड़ा न्अ वांका काम प घमण्ड करबा को मोको कोन मल्अ अर वे या कोन खे सक्अ क आपणी जस्यानई वे बी काम करअ छ। 13 क्युं क अस्यान का मनख झूंट्याई का थरपेड़ा चेला बण्या बेठ्या छ अर धोखा सुं काम करअ छ, अर मसी का थरपेड़ा चेला जस्यान को भेष बणाव्अ छ। 14 हां, या अचम्बा की बात कोन्अ! क्युं क सेतान बी चमकबाळा सरगदूता को रूप धारण कर सक्अ छ। 15 ई बजेसुं या कोई बड़ी बात कोन क उंका दास बी धरम का काम करबाळा मनखा जस्यान को भेष बणाव्अ छ। पण आखरी मं वांको नास एकधम वांका कामा जस्यान होव्अलो।
पौलुस को दुख भोगबो
16 म फेरू खेऊ छु, कोई मन्अ बावळ्यो कोन समझ्अ अर ज्यो थे अस्यान समझो छो, तो मन्अ बावळ्यो समझर ई म्हारी सेन करल्यो, जिसुं म बी थोड़ोघणु घमण्ड कर सकुं। 17 अब या म ज्यो खेर्यो छु वो परबु की जस्यान कोन खेर्यो पण बावळ्या की जस्यान खेर्यो छु। जिप्अ म्अ घमण्ड करू छु। 18 क्युं क अस्यान का घणा ज्यो काया अर माया को घमण्ड करअ छ, तो म बी वस्यान घमण्ड करू छु। 19 थे समझदार छो ई बजेसुं राजी-राजी बावळ्या की बाता सेन करल्यो। 20 मन्अ बस्वास कोन होर्यो क ज्यो कोई थान्अ दास बणाले, थांको बरो करअ, थान्अ धोखो देव्अ, अर थान्अ निचो दखाव्अ अर कोई थांका मूंडा प लप्पड़ देव्अ तो थे उन्अ सेन करो छो। 21 म सरमिन्दा होर खेऊ छु क मै वांकी जस्यान थांकी लार बेवार करबा मं घणा कमजोर छा।
पण ज्यो कोई-कांई बेई बी घमण्ड करबा की हिम्मत करअ छ तो म बावळ्यापणा सुं खेऊ छु, क म बी अस्यान'ई हिम्मत करूलो। 22 वेई इब्रानी छ कांई? म बी तो इब्रानी छु। वेई इजरायल का छ कांई? म बी तो इजरायल को छु। वेई अबराम का बंस का छ कांई? म बी तो अबराम का बंस को छु। 23 bवेई मसी का दास छ कांई? म तो बावळ्या की जस्यान खेऊ छु क म वासुं बी बढ़र मसी को दास छु! म वासुं साउटी मेनत कर्यो छु, केई बार केद म गियो छु, घणीबेर सोट्टा खायो छु अर बार-बार मोत को सामनो कर्यो छु। 24 म पांच बार यहूद्या क हाथा गुनताळीस-गुनताळीस चमड़ा का कोड़ाc सुं मार खायो छु। 25 dतीन बार तो म सोट्टा खायो; अर एकबार तो म्हारअ उपरअ भाटा बगाया छा; अर तीन बार म जहाज मं चढ्यो पण तीनु बार वे टूटग्या; एकबार तो म एक रात अर एक दन समदर क मायन्अ रियो। 26 eम घणी बार लाम्बी-लाम्बी जातरा कर्यो, केई बार तो म उफणती नंद्या को तो कद्या डाकुवां का खतरा को सामनो कर्यो। खुदका मनखा सुं खतरा को सामनो कर्यो अर गेर यहूदी मनखा सुं बी खतरा को सामनो कर्यो। अर नगरा म, राडी म, अर समदर अर वा झूंटा बस्वासी मनखा का खतरा मं बी घणी जातरा कर्यो। 27 म घणी मेनत करर गाढो थाक'र जन्दगी जीयो छु। केई बार म सो बी कोन सक्यो। केई बार भूखो तसायो रियो छु। केई बार तो म आधो भूखा रियो। अर घणी बार तो स्याळा म बना लत्ता क धूजतो रियो। 28 अर अब ओर कांई खेऊ? म्हारअ उपरअ सबळी बस्वास्या की टोळ्यां की चंता को बोझ बी रोजिना रियो। 29 जद्या कोई कमजोर छ तो म बी खुदन्अ कमजोर मेसुस करू छु, अर ज्यो कोई पाप म पड़यो छ तो मन्अ दुख होव्अ छ।
30 अर ज्यो मन्अ घमण्ड करणी ही छ तो म म्हारी कमजोरी पई करू छु। 31 आपणा परबु ईसु मसी का पिता परमेसर की मेमा सदा-सदा की छ, अर वो जाण्अ छ क म झूंट कोन बोलु। 32 fजद्या म दमिस्क नगर म छो उं बगत अरितास राजा को राजपाल उं नगर का दरवाजा प मन्अ पकड़बा बेई पेरो बठाण मल्यो छो। 33 पण मन्अ छाबड़ी म बठाणर नगर का कोट का जंगळा क माईन्अ सुं बारअ खन्दायो गियो, अस्यान म उंक्अ हाथा सुं बचर नखळग्यो।