बियाऊ का बारा मं
7
1 अब वां बाता का बारा मं ज्यांन्अ थे माण्ढया छो क, “एक आदमी बेई बियाऊ करबो चोखो छ कांई?” 2 तो म्हारो खेबो अस्यान छ क कुकर्म सुं बचबा बेई हरेक मोट्यार क खुदकी लुगाई होणी चायजे अर हरेक बेरबान्या क खुदको मोट्यार होणो चायजे। 3 एक मोट्यार खुदकी लुगाई की काया की मन्सा पूरी करअ। अर वस्यान ई परणी लुगाई बी खुदका मोट्यार की काया की मन्सा पूरी करअ। 4 लुगाई न्अ खुदकी काया प अधिकार कोन्अ पण उंका मोट्यार को बी अधिकार छ, वस्यान ई मोट्यार न्अ बी खुदकी काया प अधिकार कोन्अ पण उंकी लुगाई को बी अधिकार छ। 5 अर थे लुगाई-मोट्यार जद्या परातना करबा जावो तो आमा-सामा बतळार थोड़ी बगत परातना मं रे सको छो, अर ईक्अ पाछ्अ थे फेरू एकलार रेवो, क्युं क कढी अस्यान कोन हो जाव्अ क थांका न्यारा होबा को फायदो उठा'र सेतान थान्अ खुदन्अ बसम्अ रांखबा की कमी सुं परख्अ। 6 या म्हारी आज्ञा कोन, पण मं तो थान्अ छूट देर्यो छु। 7 मं तो चाऊ छु क सबळा मनख म्हारअ जस्यानका होता। पण हर एक कन्अ परमेसर का न्यारा-न्यारा बरदान छ अस्यान सबळा मनखा न्अ परबु की ओड़ी सुं न्यारो-न्यारो बरदान मलेड़ो छ। 8 अर अब मं वां मनखा न्अ ज्यांको बियाऊ कोन होयो अर बिधवा बेरबान्या न्अ खेऊ छु क जस्यान मं ऐकलो छु वस्यान वे बी रेव्अ, तो वो वां बेई कतरो बढ़ीया रेव्अ। 9 पण ज्यो थे खुद प काबु कोन रांख सको तो थे बियाऊ करल्यो; क्युं क ई वासना की आग मं जीबा सुं बियाऊ करबो साउटो चोखो छ।10 aअर अब म वान्अ आज्ञा देऊ छु ज्यो परणेड़ा छ। यो म्हारो हुकम कोन्अ पण परबु को हुकम छ क लुगाई खुदका मोट्यार न्अ कोन छोड़्अ 11 अर ज्यो वा छोड़ बी देव्अ तो कोई बात कोन्अ पण दूसरो बियाऊ कोन करणी चायजे अर हो सक्अ तो खुदका मोट्यार सुं फेरू मेळजोळ कर लेणी चायजे। अर अस्यान'ई मोट्यार न्अ बी करणी चायजे।
12 अर अब ज्यो मनख रेग्या वान्अ या म खेऊ छु, परबु कोन खेव्अ क ज्यो कोई मसी भाया क लुगाई होव्अ अर वा बस्वास कोन करअ पण उंकी लारां रेबा बेई राजी छ तो वो मनख खुदकी लुगाई न्अ कोन छोड़्अ। 13 अर अस्यान'ई ज्यो कोई लुगाई को मोट्यार बस्वास कोन करअ पण उंकी लारा रेबा बेई राजी रेव्अ तो वा लुगाई बी खुदका मोट्यार न्अ कोन छोड़्अ। 14 क्युं क वो बस्वास कोन करबाळो मोट्यार खुदकी बस्वासी लुगाई की लारा रेबा सुं परमेसर न्अ भाव्अ छ अर अस्यान'ई बस्वास कोन करबाळी लुगाई खुदका बस्वासी मोट्यार की लारा रेबा सुं परमेसर न्अ भाव्अ छ। अर ज्यो थे अस्यान कोन करो तो थांका बेटा-बेटी बी असुद्ध बण जाव्अला पण अस्यान करबा सुं वे परमेसर न्अ भाव्अला।
15 अर ईक्अ पाछ्अ बी कोई बस्वास कोन करबाळो न्यारो होबो छाव्अ तो वो न्यारो हो सक्अ छ। क्युं क अस्यान का नियम सुं मसी बेण अर भाई आजाद छ। परमेसर थान्अ सुख सांति सुं रेबा बेई बलायो छ। 16 हे लुगायाओ, थे जाणो छो कांई? लारां राखबा सुं हो सक्अ छ थे थांका अबस्वासी मोट्यारां न्अ बचाल्यो। हे मोट्यारओ थे जाणो छो कांई? लारां राखबा सुं हो सक्अ छ थे थांकी अबस्वासी लुगाया न्अ बचाल्यो।
वा जन्दगी जिओ जी बेई परमेसर थान्अ बलायो छ
17 परबु जिन्अ जस्यान को बरदान दियो छ अर जि रूप मं परमेसर थान्अ थरप्यो छ, उन्अ वस्यानई जिणी चायजे। अर म सबळी बस्वास्या की टोळ्यां न्अ अस्यान'ई सखा'ऊ छु। 18 खतनो करवाया मनख न्अ परबु बलायो छ तो उन्अ खतना का नसाण न्अ कोन बगाड़णी चायजे। अर ज्यो बना खतनाळा मनख न्अ परबु बलाव्अ तो उन्अ खतनो कराबा की कोई जुरत कोन्अ। 19 क्युं क परमेसर का हुकम न्अ मानबा क अलावा खतनो कराबो अर खतनो कोन कराबो कोई माईना कोन राख्अ। 20 सबळा मनखा न्अ वस्यानई रेणो चायजे जस्यान वान्अ बलायो गियो छ। 21 थन्अ दास की न्याई बलाया छ कांई? तु ई बात की चंता मत करअ। पण ज्यो तु आजाद होबो छाव्अ छ तो आग्अ आ अर मोका को फायदो उठा। 22 क्युं क जीन्अ परबु का दास की जस्यान बलाया छ वो परबु को आजाद मनख छ। अर अस्यान'ई जिन्अ आजाद मनख की न्याई बलायो छ तो वो परबु ईसु मसी को दास छ। 23 परबु थारो मोल देर थान्अ मोल लियो छ। ई बजेसुं मनखा का दास मत बणो। 24 तो म्हारा भायाओ, जि दसा मं थान्अ बलायो गियो छ उंई दसा मं परमेसर की लार बण्यारेवो।
बियाऊ करबा का बारा मं
25 कुंवारा कुंवार्या बेई परबु की ओड़ी सुं मन्अ कोई हुकम कोन मल्यो। ई बजेसुं म परबु की दीया सुं अर बस्वासहाळो होबा की बजेसुं सला देऊ छु। 26 म सोचु छु क ई दुख की घड़ी मं यो घणो चोखो क थे जस्यान छो वस्यान ई रेवो। 27 अर ज्यो थारअ लुगाई छ तो उसुं न्यारो होबा की जोरी मत करज्यो, अर ज्यो थारअ लुगाई कोन्अ तो पण्णबा की जोरी मत करज्यो। 28 अर ज्यो तु बियाऊ बी करअ छ तो यो पाप कोन्अ; अर ज्यो कोई कुंवारी छोरी बियाऊ करअ छ तो वा कोई पाप कोन करअ। पण पण्णेड़ा मनखा न्अ घणी मुसिबत होव्अ छ अर म वा मुसिबत सुं थान्अ बचाबो चाऊ छु।
29 हे भायाओ म्हारो तो योई खेबो छ, क बगत घणु कम। ई बजेसुं जिक्अ लुगाई छ वो अस्यान रैवो जाण्अ उंक्अ लुगाई छ्अई कोन्अ। 30 अर ज्यो रोव्अ छ वे अस्यान रैव्अ जाण्अ वे कद्या रोयाई कोन्अ। अर ज्यो राजी छ वे अस्यान रैवो जाण्अ वे कद्या राजी रिया'ई कोन्अ। अर वे ज्यो कोई चीजा मोल लेव्अ छ वे अस्यान रैवो जाण्अ वां कन्अ कांई कोन्अ। 31 अर ज्यो ई दनीया की चीजा को मजो लेर्या छ, वे वाम्अई कोन रम्या रेव्अ। क्युं क ई दनीया का रीति रूवाज एक दन खतम हो जाव्अला।
32 अर म चाऊ छु क थे चन्ता मत करो। क्युं क एक कुंवारो मनख परबु क बारा म सोचतो रैव्अ छ क परबु न्अ कस्यान राजी करू। 33 अर एक परण्यो मनख दनीया मं ही मगन रैव्अ छ अर या सोचतो रैव्अ छ क खुदकी लुगाई न्अ कस्यान राजी रांखू। 34 अर अस्यान उंका बच्यार बट जाव्अ छ। अर अस्यान'ई कुंवारी छोरी की लार होव्अ छ, एक कुंवारी छोरी परबु मं मगन रैव्अ छ जिसुं क वा आत्मा मं अर काया मं पवितर हो सक्अ। पण एक पर्णी लुगाई ई दुनिया की बाता मं मगन रैव्अ छ अर या बच्यार करती रेव्अ छ क म म्हारा मोट्यार न्अ कस्यान राजी रांखू। 35 अर म ये बाता थांका भला बेई खेर्यो छु, थाप्अ पाबंदी लगाबा बेई कोन बोलर्यो। जिसुं थे ई दनीया की चन्ता न्अ छोड़र परबु क हाथा मं रे सको।
36 अर ज्यो कोई या समझ्अ क वो खुदकी कुंवारी छोरी को हक मारर्यो छ जिकी जुवानी ढळबा लागगी होव्अ अर उं छोरी की मन्सा बी होव्अ। अर ज्यो वो उंको बियाव करबो छाव्अ छ तो उंको बियाव करदे यो पाप कोन्अ।b 37 पण जिन्अ जुरत बी कोन्अ अर ज्यो खुदका हीया मं ठाण मेल्यो होव्अ, अर वो खुदकी इच्छा न्अ पूरी करबा को अधिकार राख्अ छ अर वो खुदका हीया मं या बच्यार मल्यो होव्अ क म म्हारी छोरी को बियाव कोन करू जद्या तो वो चोखो करअ छ। 38 ई बजेसुं ज्योबी खुदकी कुंवारी छोरी को बियाव करअ छ वो चोखो करअ छ पण ज्यो खुदकी छोरी को बियाव कोन करअ वो ओर बी चोखो करअ छ।