आपसरी की रयाड़ को सुळजावड़ो
6
1 ज्यो थां मंसुं कोईको दूसरा की लारा झगड़ो छ तो थे उंका सुळजावड़ा बेई परमेसर का मनखा कन्अ जाबा की बजाई बेबस्वासी मनखा कन्अ कस्यान जा सको छो? 2 अर थे यां कोन्अ जाणो कांई क परमेसर का मनख जगत को न्याय करअला अर जद थेई सबळा जगत को न्याय करअला तो यां छोटी-छोटी बाता को सुळजावड़ो कोन कर सको कांई? 3 अर थे यां कोन्अ जाणो कांई क आपा दूता को न्याय करअला? तो फेर ई जन्दगी की छोटी-छोटी बाता को कांई खेबो? 4 ज्यो थांक्अ मायन्अ अस्यान की बाता होव्अ जद्या थे अस्यान का मनखा कन्अ जावो छो ज्यांकी बस्वास्या की टोळी मं कोई ठोर कोन्अ। 5 थान्अ सरम आणी चायजे! थांक्अ गाब्अ अस्यानको ज्ञानी मनख कोई कोन्अ कांई ज्यो थांका बस्वासी भाया की रयाड़ को सुळजावड़ो कर सक्अ? 6 फेरबी थाम्अ सुं एक भाई दूसरा भाई प्अ मुकदमो करअ छ अर उंको न्याय एक गेर बस्वासी करअ छ!7 थे आमा-सामा मुकदमाबाजी करर्या छो ज्यो सांच्याई थांकी हार न्अ दखाव्अ छ। इसुं तो चोखो यो कोन होतो कांई क थे अन्याय सेन कर लेता अर खुदन्अ लूट जाबा देता? 8 पण थे तो खुदई अन्याय करो छो अर थांका दूसरा मसी भाया न्अ बी लूटो छो!
9 थे सांच्याई जाणो छो क बराई करबाळा लोगबाग परबु का राज का वारिस कोन हो सक्अ। थे बावळ्या मत बणो। अनैतिक काम करबाळा, मूरती पुजबाळा, व्यभिचारी, पुरूषगामी, 10 चोर-लुटेरा अर लालच करबाळा, दारूड़या अर चुगली करर लड़ाबाळा अर ठगबाजी करबाळा परबु का राज का वारिस कोन हो सक्अ। 11 थाम्अ सुं बी एकात मनख अस्यान कांई छा। पण अब थान्अ धोर पवितर कर दिया। थान्अ परमेसर की सेवा मं सुंप दिया। परबु ईसु मसी का नांऊ अर आपणा परमेसर का आत्मा सुं वान्अ धरमी करार दे चुक्या।
परबु की महमा बेई थांकी काया न्अ काम मं लेवो
12 aथां मंसुं कोई खेव्अ छ, “मन्अ सब करबा की छूट छ।” हां पण सब थां बेई चोखो कोन्अ। म खे सकुं छु क मन्अ सब करबा की छूट छ पण म कसी बी चीज को गुलाम कोन बण्यो। 13 खेबा मं ई आव्अ छ क “रोटी पेट बेई अर पेट रोटी बेई छ।” पण हां, परमेसर दोन्यान'ई नास कर देव्अलो। आपणी काया कुकर्म करबा बेई कोन्अ पण परबु की सेवा करबा बेई छ। अर काया को कल्याण तो परबु करअलो। 14 परमेसर जस्यान परबु ईसु न्अ जीवतो कर्यो छ वस्यान ई वो खुदकी सक्ति सुं आपान्अ बी फेरू जीवता करअलो। 15 थे जाणो छो कांई क थांकी काया परबु ईसु की छ तो फेर कांई म यां अंगानअ ज्यो मसी का छ रांड का अंग बणबा द्यु? कतेबी नही! 16 अर थे कोन जाणो कांई क ज्यो मनख रांड की लार सोव्अ छ वो उंकी लार एक तन हो जाव्अ छ? क्युं क सास्तरा मं मण्ढर्यो छ क “वे दोनी एक तन हो जाव्अला।” 17 पण ज्यो परबु मं मगन रेव्अ छ वो परबु की आत्मा मं एक हो जाव्अ छ।
18 कुकर्म मत करो। क्युं क ईक्अ अलावा मनख जतरा बी पाप करअ छ वे खुदकी काया सुं कोन्अ करअ। पण ज्यो मनख कुकर्म करअ छ वो खुदकी काया की लार पाप करअ छ। 19 bअर थे या कोन जाणो कांई क थारी काया पवितर-आत्मा को मन्दर छ अर वा आत्मा थारअ माईन्अ रेव्अ छ ज्यो थान्अ परमेसर दियो छ। थांको मालिक परमेसर छ, थे खुद कोन्अ। 20 क्युं क परमेसर थांको मोल चुकार थान्अ मोल लियो छ। ई बजेसुं थे थांकी काया सुं परमेसर की महमा करब्अ करो।