परमेसर की आज्ञा मनखा का रूवाज सुं बड़ी छ
7
1 फेर फरीसी अर एकात मूसा का निम न्अ सखाबाळा ज्यो यरूसलेम सुं आया छा, ईसु क सांकड्अ भेळा होया। 2 अर वे देख्या क ईसु का चेला बना हाथ धोया'ई रोटी खार्या छा। 3 क्युं क फरीसी अर दूसरा सबळा यहूदी आग्लाबड़ा की लीकटी पिटता रेवअ छा। अर जद्या ताणी खुदका हाथा न्अ चोखां कोन्अ धोव्अ छा जद्या ताणी रोटी कोन्अ खाव्अ छा। 4 अस्यान'ई बजार मं जार आया पाछ्अ वे बना नांया-धोया कांई बी कोन्अ खाव्अ छा। अस्यान की ओर घणीसारी पराणी रीत छी ज्यांन्अ वे मान्अ छा। जस्यान क थाळी-कटोरा, लोठ्यो, तांबा का राछ-पिछ न्अ मांजबो अर खाट-बछावणा न्अ धोबो।5 जिसुं फरीसी अर मूसा का निम न्अ सखाबाळा ईसु न्अ बुज्या, “थारा चेला आग्लाबड़ा की रीत न्अ क्युं कोन्अ मान्अ? अर चोखा हाथ धोया बना ही रोठ्या क्युं खाव्अ छ?” 6 ईसु वान्अ खियो, “यसायाह परमेसर की ओड़ी सुं बोलबाळो थां जस्या कपट्या बेई सही लख्यो छ;
“‘ये लोगबाग होटा सुं तो म्हारो आदर करअ छ,
पण बाका मन मंसुं सदाई आंतरअ रेव्अ छ।
7 वे बनाकाम म्हारी आराधना करअ छ,
क्युं क ये मनखा का बणाया निम न्अ धरम का निम बतार मानबो सकाव्अ छ!’”
8 “थें परमेसर की आज्ञा न्अ कोन्अ मानो पण मनखा का रीत-रूवाज न्अ मानर्या छो।”
9 वो वान्अ खियो, “थे परमेसर की आज्ञा न्अ टाळबा मं अर खुदका नीमा न्अ चलाबा बेई घणा चालाक छो! 10 जस्यान मूसा खियो छ, ‘खुदका माई-बाप को आदर करो’ अर ‘ज्योबी खुदका माई-बाप न्अ बरो खेव्अ, उन्अ मारद्यो।’
11 “पण थें खेव्अ छो क कोई मनख खुदका माई-बाप न्अ खेव्अ क, ‘म्हारी कोई चीज सुं थान्अ फायदो मल सक्अ छो म उन्अ परमेसर क चढ़ा दियो।’ 12 तो अस्यान करर वो उंका माई-बाप की जुम्मेवारी सुं हट जाव्अ छ। 13 अस्यान थे खुदका बणाया रीत-रूवाज सुं परमेसर का बचना न्अ टाळ देओ छो। अस्यान ही ओर बी घणीसारी बाता थे करो छो।”
मनखा न्अ सूगलो करबाळी बाता
14 जद ईसु भीड़ न्अ फेरू सांकड़्अ बलार खियो, “थे सबळा म्हारी सुणो अर समझो। 15 असी कोई बी चीज कोन्अ ज्यो मनख क मेईन्अ जार उन्अ गन्दो करअ, पण ज्यो मनखा क मायन्अ सुं नखळ्अ छ बाई उन्अ गन्दो कर सक्अ छ।” 16 “जिक्अ सुणबा बेई कान होव्अ वो सुणले।”a 17 फेर जद्या भीड़ न्अ छोड़र वो घर क मेईन्अ गियो तो उंका चेला उन्अ उं कस्सा का बारा मं बुज्या। 18 जद्या वो वान्अ खियो, “थें बी कोन्अ समझ्या कांई? थे कोन्अ देखो क ज्योबी चीज बारे सुं मनख क मेईन्अ जाव्अ छ बा उन्अ गन्दो कोन्अ कर सक्अ। 19 क्युं क बा उंका मन मं नई पण ओजड़ा मं जाव्अ छ अर फेर मेलाई बणर बारअ नखळ जाव्अ छ।” अस्यान खेर वो खाबाकी सबळी चीजान्अ सुध्द खियो।
20 फेर वो खियो, “मनखा का मन मं सुं ज्यो बच्यार नखळ छ वोई उन्अ सूगलो बणाव्अ छ, 21 क्युं क मनख मनखा का मन मं सुंई बरा-बच्यार, व्यभिचार, चोरी, हत्या, रण्डीबाजी, 22 लोभ, दुष्टता, छळ-कपट, बेसर्मी, बुरी-नजर, ईर्ष्या, गाळबको, घमण्ड अर मूर्खता बारअ आव्अ छ। 23 ये सबळी बाता मन मंसुं नखळ्अ छ अर मनखा न्अ असुद्ध बणा देव्अ छ।”
एक सुरुफिनीकी जात की बेरबानी को बस्वास
24 फेर ईसु बी ठोर न्अ छोड़र सूर अर सेदा नांऊ का परदेसा मं चलग्यो। उण्डअ वो एक घर मं गियो। वो कोन्अ छाव्अ छो क उंका आबा को कोई न्अ तोल पड़्अ। पण वो खुदकी मेजुदगी न्अ कोन्अ लुखा सक्यो। 25 ईसु का बारा मं सुणर एक बेरबानी जिकी छोरी मं दुष्टात्मा छी, बेगीसीक उंक्अ सांकड़्अ आई अर उंका पगा मं पड़गी। 26 बा बेरबानी यहूदी कोन्अ छी। बा सिरीया देस का सुरुफिनीकी नांऊ की ठोर मं रेबाळी छी। बा खुदकी छोरी मंसुं दुष्ट आत्मा न्अ नखाळबा बेई ईसु सुं अरदास करी। 27 ईसु उन्अ खियो, “पेली बाळका न्अ धाप जाबा द क्युं क बाळका की रोटी न्अ लेर गण्डकड़ा क आग्अ पटकबो चोखो कोन्अ।”
28 बा बेरबानी उन्अ खेई, “परबु, बाळका क रोटी खाती टेम गण्डकड़ा बी तो तळ्अ पड़या बुरया न्अ खाव्अ छ।” 29 फेर ईसु उन्अ खियो, “थारा ई जुवाब सुं दुष्टात्मा थारी छोरी मं सुं नखळगी अब तु चेनसुं घरा जा।” 30 फेर बा बेरबानी घरा जार देखी क दुष्टात्मा उंकी छोरी मं सुं नखळगी अर बा खाट प सुती छ।
ईसु बेरया अर गुंगा मनख न्अ नीका कर्यो
31 फेर ईसु सूर अर सेदा का नगरा सुं पाछो आयो अर दिकापुलिस मतलब दस नगरा का गेला सुं गलील की झील क सांकड़्अ पुंच्यो। 32 बड्अ एकात मनख ईसु क सांकड़्अ एक अस्या मनख न्अ ल्याया ज्यो बहर्यो अर काल्यो छो। वे मनख ईसु सुं अरदास कर्या क वो उंक्अ उपरअ हाथ मेल दे।
33 ईसु उन्अ भीड़ मंसुं एकाड़ी लेग्यो अर खुदकी आंगळ्या न्अ उंका काना मं घाल्यो अर फेर वो थुंकर उंकी जीभ क हाथ लगायो। 34 फेर सरग की ओड़ी नाळर नसास भर्यो अर बिन्अ खियो, “इप्फथा!” मतलब “खुल जा” 35 अर अस्यान बोलताई उंका कान खुलग्या, अर उंकी जीभ की आटी बी खुलगी, अर वो नीका बोलबा लागग्यो। 36 फेर ईसु वान्अ आज्ञा दियो क थें कोई न्अ कांई बी मत बताज्यो। पण वो मनखा न्अ जतरो रोकबो चायो अतराई वे मनख उंको सावटो परचार कर्या। 37 सबळा मनख अचम्बो कर बोलबा लागग्या, “ईसु ज्योबी करअ छ, वो भलोई करअ छ। अण्डअ ताणी की बेरया सुण्अ छ अर गुंगा बोल्अ छ।”