Bufor bíyeni bu, n'etaam éyeni i
21
Hunuut toko,
n'ijuk bufor bíyeni,
n'etaam éyeni.
Bufor bítiyar bu bútowutatowuto,
n'etaam i yooŋ fe,
han hu yooŋ iŋkut hibaja.
2 N'ijuk hikinu heenabe hu,
heeemo hu Serusalem éyeni i tu búwaneina húnuutin t'Atambatun t'etiir bufor bu.
Hifareefare áwari,
naane anaare aa asiimo áwariee keejoo huyoosanb.
3 N'ijam kaaji kómbokun kéehaminna t'eriikeey ite híyiaate hu keene:
«Hahiyu Atambatun kakinu nu kúŋgowulan ku!
O biriiko nu boko.
Boko káyemi bakan koone,
akina humuumo káyemi nu boko,
abe n'áyemi Atambatun ooniinc.
4 O katotu muhuw mánoman ti ñíkiniin.
Eket eroŋut kabaju,
ni kátiñja,
ni biyiy,
ni sílaam,
ábuki buroon bítiyar bu fe bútowutaad.»
5 Náami an eeriikee u t'eriikeey ite híyiaate hu n'aane:
«Hahiyu íhina buroon bu fe bíyeni.»
Ahaban n'aanam:
—A̱kiñj bonde,
ábuki kirim konde kéewoore,
kite nu múniyo.
6 Abe n'áwutiyen aane:
—Hahiyu ahabanee!
Íñj'eemo fu átiyar u n'araan u toko,
kájabina ku ni bihabanooreey bu.
An i nukuno nisaye,
íñje kawunio éehujo fuufu ti káabulanu kite móhujo mite buroŋ bue.
7 An fe eeriiŋane,
o kabaju bondu t'íñje.
Íñje káyemi Atambatun oone,
abe n'aŋ'áyemi añi úumaf.
8 Bare bukoloow bu,
ni kéeyilenut ku,
ni kiŋki káhin buroon béekojie bu,
ni kiŋki kayool bakan,
ni kiŋki kaŋot ni bakan ki kaseñeit ku,
n'élugusa i,
ni kiŋki kásukaay ñúwisenum ñu,
n'ejuusa i fe,
boko káyemi ti han héesufe-sufe hu hite sineemak su n'efor i.
Ho heemo fu eket ésooboriyan ig.
Serusalem éyeni i
9 Ake t'emalaka i hutok ni bákasuba kéeyekie ku sukot hutok nu súsuba seehooje su nu wútaañi wu hutok nu wúsuba wuraanu wu n'aanam:
—A̱bin,
abe n'iŋ'íwufoori anaare eeemo u ti biseño bu,
asibar ite Ametek u.
10 Búwejet Beenabe bu nu bujokam,
abe amalaka u n'aja n'íñje ti hirij hómbokun heeliite jáŋgaraŋh.
N'áwufooram Serusalem hikinu heenabe hu,
tu búwaneina húnuutin t'Atambatun t'etiir bufor bu,
11 kániku koone ti kajaaŋan ho yooŋ.
Masilanar mite hikinu hu múmoomi naane mite ekuur yeeseere-seer yeejaaŋe naane eweer.
12 Hiñaan heeŋoloole hu hikinu hu hiliitaliit jáŋgaraŋ.
Hibajabaj wuruŋ weemo sumoŋu nu wúsuba,
abe emalaka sumoŋu ni bákasuba ifi kajukar wo.
Kuruwu keemo sumoŋu nu kúsuba kikiñjeekiñj tu wuruŋ wu:
ko keemo fu kuruwu kite bakañi *Israyel.
13 Hiñaan-ñaan fe hibajabaj wuruŋ wúhaaji:
wúhaaji káasiŋ ki taanak tu tundu túnuutin,
wúhaaji káasiŋ ku tundu túlumo,
wúhaaji ni baamay kane a̱joŋoor ni káasiŋ ki taanak tu tundu túnuutin,
wúhaaji ni baatosi.
14 Hiñaan heeŋoloole hu hikinu hu hisiiŋasiiŋo tu sujuju seemo sumoŋu nu súsuba,
abe kakiñjakiñj te so kuruwu kite *epotor i sumoŋu ni bákasuba ku bakate Ametek u.
15 Amalaka éeyemie u ti báhamin bu n'íñje ajokajok naane yariyoon ite éwurus yite kaliiku hikinu hu,
nu wuruŋ wu,
ni hiñaan huj.
16 Hikinu hu,
kaŋabu ku kirare ni kakambu ku.
Amalaka u n'aliik hikinu hu ni yariyoon yeene:
ni hibaj ti kakambu ku síkilomeetar seemo súñjune súsuba ni síteemeer súsuba,
abe kakambu ku kirare ni kaŋabu ku,
ni kaliitu ku yooŋ.
17 Amalaka u n'aliik hiñaan hu ti maliikar mite húŋgowulan:
kaliitu ku,
hibaja simeetar bakan bákahaaji nu hutok.
18 Hiñaan hu hunuteenut nu bujuju bimbi kaane esasip,
abe hikinu hu hurokeerok n'éwurus yeekuure but yeejaaŋe naane eweer.
19 Sujuju su ti hiñaan heeŋoloole hu hikinu hu hisiiŋanee du sisaŋganeesaŋgan nu bukuur bánoban fe beeseere-seer:
étiyar i iŋi kaane yo esasip,
ésooboriyan i esafiir,
éhaajiyan i eyagat,
ébaakiiriyan i émerod,
20 etoken i onikis,
etoken i n'efeeneŋ esariduwan,
etoken i nu súsuba ekirisolit,
etoken i ni síhaaji eberil,
etoken i ni sibaakiir etopaas,
yéehine i sumoŋu ekirisopuraas,
yéehine i sumoŋu n'efeeneŋ eturukuwaas,
yéehine i sumoŋu nu súsuba ametisit.
21 Wuruŋ wu sumoŋu nu wúsuba wu,
wo sukuur seeseere-seer.
Karuŋ-ruŋ fe kurokeerok n'ekuur efeeneŋ.
Éhuhu yite hikinu hu,
yo éwurus yeekuure but,
abe eŋ'ejaaŋ wililil naane eweerk.
22 Ijukut ti hikinu hondu *báalawum,
ábuki Atemit,
Atambatun eehaŋe u ebaja sembe,
n'Ametek u kaamo fu báalawum bu.
23 Hikinu hu hisawuleit taanak tu tijaaŋan ho,
man yooŋ hiim hu,
ábuki kániku kite Atambatun iŋi kijaaŋan ho,
abe Ametek u aamo fu ejaaŋana yite te ho.
24 Biheet bu fe kañaahu ti meejaaŋe mite te ho,
abe bákayi kite etaam i kásikina toko ebaj yeeniin.
25 At'arko hikee-kee wuruŋ wute hikinu hu nu wufeŋkee,
ábuki káajiim iti kibaj toko.
26 Kániku ku n'ebaj ite etaam i kásikinee toko.
27 Bare doon fe *deekuurut utu duyooso toko,
n'an fe aŋ'áhin buroon béekojie,
man yooŋ n'aŋ'ajuus.
Keeemo ku kuruwu kooniin kikiñjee fu ti kaawiit kite buroŋ bul taŋ,
kite k'Ametek u kaja fu buyooso ti hikinu hondu. m