9
Amalaka atoken u n'asok ti káabiinu koone.
N'ijuk káaloofiiloof kéeneyina t'etiir bufor bu bibin t'etaam i.
Ake n'asaan ko ejaab ite kaayeen kéesulie-sulie ku.
2 Káaloofiiloof ku ni kífeŋgin kaayeen kéesulie-sulie ku.
Hárunda nu húnuutin toko,
híyemi naane hite sineemak sómbokuna.
Taanak tu nu túkumb,
eyam i yooŋ n'ébaani iŋ'ite hárunda hite kaayeen ku.
3 Bábaŋgur nu búnuutin ti hárunda hu,
abe n'uŋu burko fererer t'etaam i.
Nu buwunee sembe site káhinu t'áseñji t'ésuk i naane bilaŋguut bub.
4 Ake n'aane bo utum bugor mahos mu,
nu ñunukanuk ñu,
nu doon fe déelooñina,
kane arko taŋ bo bibete bakan kéehinutee ku tu kúyuut ékeetanuma yite Atambatunc.
5 Bábaŋgur bu buwunutee sembe site kayoolu bakan kondu;
beeneyen kep bíhiniin t'áseñji tu boko kiim hutok.
Abe káseñji ki bábaŋgur bu kiŋki bíhin kúmoomi naane kite an e elaŋguut ebete.
6 Ti kiim kondu hutok hu,
ésuk i kaŋesu eket i,
bare iti kajuk yo.
Boko kámaŋi kaketu,
bare eket i kateyiiind.
7 Bábaŋgur bondu búmoomi naane bifaliñj bite bija ti hitiik.
Busolasol ti kikaw ku aŋ'a̱juk naane búkuhe bite bákayi bite éwurus,
abe ñuhooŋu ñite te bo ñúmoomi naane ñite kúŋgowulan.
8 Bihan bite te bo bikambakamb naane wan wute anaare,
abe wúŋiiŋ wu naane wute éŋaŋ.
9 Búkooki tu búsus bite te bo aŋ'a̱juk naane sibaŋgal site mañ,
abe síbend site te bo uŋu suwen naane bisaret beehooje bi sifaliñj siñake seetey bija bite hitiike.
10 Bibajabaj kiyet keebaje wubetu naane wute bilaŋguut bu,
abe ti kiyet kite te bo ti bibaje fu sembe site káhinu ku ésuk i t'áseñji tu boko areeŋ kiim hutok.
11 Áyi ite te bo aamo fu amalaka eesaanee u kaayeen kéesulie-sulie ku;
huruwu hoone ti kíhaminiin kite Esuwif i «Abadon»,
ti *kigerekaay «Apoliyoŋ» (aamo fu «Ábuja u»).
12 Kátaañi kítiyar ku kihabanaa.
Wike wúsuba wuwarawar bibin.
13 Amalaka atoken u n'afeeneŋ n'asok ti káabiinu koone.
N'ijam kaaji ni kíhaminn tu suwus sibaakiir site *ataabul ite *wusarah wu ite éwurus i eeemo u hágila Atambatunf.
14 Kaaji ku ni keene amalaka atoken u n'afeeneŋ:
«Á̱jendin emalaka i bakabaakiir ku keefaakee ku ti kaayelu kómbokun ku kiŋki kaane Ófurat.»
15 Emalaka i bakabaakiir ku keefaree ku bija t'ewahatu yendu,
nu tu hunak hondu,
ni ti hiim hondu,
ni t'emit yendu ni kájendinee kaanuku keeyool efej efeeneŋ ti síhaaji site kúŋgowulan ku.
16 Esulaan keehooje kabinabin keerabee ti bifaliñj.
Ake n'asokam kaamo bakayem:
kaamo similiyoŋ seemo síteemeer súsuba.
17 Ti beefeeñam bii,
iye i ijuke fu bifaliñj bu ni keerabee ku te bo:
kasiimasiimo sibaŋgal seelaañe jif naane sineemak,
nu súbulool naane bufor beejaaŋe,
abe nu surombaay naane efor yéetife toko-tokog.
Kikaw kite bifaliñj bu kunokooranokoor ni kikaw kite bíŋaŋ,
abe sineemak ufu súnuutin tu ñutum ñite te bo,
ni hárunda,
n'efor yéesufe.
18 Wútaañi wondu wúhaaji wu wuwu wúnuutin tu ñutum ñite bifaliñj bu nu wuyool efej efeeneŋ ti síhaaji site kúŋgowulan ku.
Wo weemo fu sineemak su,
ni hárunda hu,
n'efor yéesufe i.
19 Ábuki sembe site bifaliñj bu sondu tu ñutum ñite te bo,
ni ti kiyet kite te bo.
Kiyet kite te bo naane ñuroon.
Kibajabaj kikaw,
abe ne ko ni bifaliñj bu ifi bíhin t'áseñji tu kúŋgowulan ku.
20 Bakaaku kúŋgowulan,
ku wútaañi wondu wuyoolut ku,
naane bondu bibaje i fe,
kawatanooreit ñurok ñooniin ñeejakut ñu ñi kanoŋke ñu keerok nu sumoŋiiin.
Kawasut kájeŋgin kite sirab su,
nu ñúwisenum ñite éwurus i,
ni ñite ehalis i,
ni ñite ñañ ñu,
ni ñite bujuju bu,
ni ñite kunuk ku,
ñeeemo ñu ñiyinaat kajuku,
ñiyinaat kajamu,
ñiyinaat yooŋ bijah.
21 Bokondu kawatanooreit yooŋ naane kayoole i bakan,
ni naane ii kálugus,
ni naane ii kaŋot ni bakan ki kaseñeit,
ni naane ii kákuwat.