Eleetar yeekiñjee i bija ti bakate ku Sarid kéeyilene ku
3
—A̱kiñj amalaka ite bakate ku Sarid *kéeyilene ku a̱ano:
«An éeyekie u ñúwejet ñu hutok nu ñúsuba ñite ñ'Atambatun,
nu wúloofiiloof wu hutok nu wúsuba wu aane:
ímoomi buroon b'á̱hine bu fe.
A̱jokeejok naane an eeroŋe,
bare awe an eekete.
2 Á̱niyo!
A̱litan beeŋeñene bu t'awe beeemo bii ti bija kaketu.
Ábuki ijukajuk kaanuku t'Atambatun úuma,
kunoŋk kúuwe kiyanut.
3 Á̱baŋino naane a̱jame i hirim hu,
ni naane a̱joke i ho ariike.
Á̱hin naane husoke i,
abe n'a̱watanooro wuhoofoor wúuwe.
Afut'á̱niyo,
íñje káfufii naane ákuw,
abe at'á̱meyi yiin ewahatu y'ija fu bibina.
4 Bare a̱bajabaj t'awe Sarid bakaake keebuusatanut wañ wooniin.
Boko bisiimo wañ weefañje iriiriboor,
ábuki káhinahin naane kaware i káhinu.
5 An fe eeyak kariiŋan,
o bisiimo wañ weefañje naane boko.
It'itot huruwu hoone ti kaawiit kite buroŋ bub.
Íñje kasoku tu buhooŋu Faafam n'emalaka yeene kaanuku akina an úuma. c
6 «An fe eebaje wúkondin ánandin naŋ nu Búwejet bu busoke fu kéeyilene ku!»
Eleetar yeekiñjee i bija ti bakate ku Filadelfi kéeyilene ku
7 —A̱kiñj amalaka ite bakate ku Filadelfi *kéeyilene ku a̱ano:
«An eenabe u,
eeemo u an ite bifeeneŋ,
éeyekie u ejaab ite áyi u *Dafit,
akina aa áfeŋgin abe an at'áyini kafeŋku,
n'afeŋk abe an at'áyini káfeŋgin aaned:
8 ímoomi buroon b'á̱hine bu fe.
Ímoomi kaanuku a̱bajut sembe,
bare á̱jeŋginajeŋgin hirim húuma,
abe a̱teñekeitam.
A̱juk,
ífeŋginifeŋgin karuŋ k'an ayinaat kafeŋku.
9 Iye i ija fu ni bakan kite Setani,
ejuusa yendu kiŋki kaane boko kaamo Esuwif abe bare nu múniyoiit:
íñje kanoŋkooraniin keebin kéesukaayi,
kéemeyi kaanuku ímaŋiimaŋie.
10 Makamu á̱jeŋginajeŋgin hirim h'isoki hu hite kaanuku á̱muñ ti sílaam su,
ifin íñje yooŋ,
íñje kajukari ti sílaam seebin su t'aduna i ereyi fe.
Sílaam sondu kabaju kaanuku t'ajuk buŋ bu kúŋgowulan ku kaamo fu ariike.
11 Íñje bibin memee.
A̱jok alit tip ti b'a̱joke bu,
ake atum'abin ásik hisiibanu hoonuun hite búriiŋan bu.
12 An fe eeyak kariiŋan,
íñje káhinio éeyemi éniñj t'enuuf ite Atambatun úuma,
abe aroŋut hikee kánuutina toko.
Íñje kakiñju te o huruwu hite Atambatun úuma,
nu huruwu húuma híyeni hu,
nu huruwu hite hikinu hite Atambatun úuma.
Hikinu hondu heemo fu Serusalem éyeni i,
yeeja i kánuutina t'etiir bufor bu t'Atambatun úuma yéewaneinf.
13 «An fe eebaje wúkondin ánandin naŋ nu Búwejet bu busoke fu kéeyilene ku!»
Eleetar yeekiñjee i bija ti bakate ku Lawodise kéeyilene ku
14 —A̱kiñj amalaka ite bakate ku Lawodise *kéeyilene ku a̱ano:
«An u ii kaane Amiing,
aseede éejube u ite u nu múniyo,
a Atambatun aŋaase u te o éewuwan doon areyi fe aane: h
15 ímoomi buroon b'á̱hine bu fe.
Ímoomi kaanuku a̱jokokanut,
á̱sufut yooŋ.
Tiŋkan yéeni bare a̱jokokanajokokan man yooŋ á̱sufasuf!
16 Bare naane á̱sufoore i,
a̱jokokanut,
á̱sufut yooŋ,
íñje kásajini tu butumam!
17 Aŋ'a̱ane:
“Íñje husaanum,
íyekia ebaj,
iŋkut isawula doon fe.”
Bare á̱meyiit kaanuku á̱fuñinania,
á̱tumba yooŋ á̱yubinani!
A̱bajut doon fe,
á̱fuumafuum,
aw'ondu yooŋ fuufii.
18 Náami iirimi bonde:
a̱bin a̱ajoohen t'íñje éwurus yeekuuranee ti sineemak,
man n'á̱yemi husaanum.
A̱joohen yooŋ wañ weefañje man n'a̱siimo á̱anuus méefuñinanie múuwe.
Abe n'a̱joohen bubuun bite káhinu ti ñíkini man n'á̱yini kajuku.
19 Bakan k'ímaŋie ku fe,
iŋ'ijoŋooraniin abe n'ímiñiini.
Náami á̱ñiŋkaan á̱habanein,
abe n'a̱watanooro wuhoofoor wúuwe.
20 A̱jam,
iŋ'isiiŋo ti karuŋ ku,
abe n'ikoŋkoŋan.
An af'ajam kaajiam abe n'áfeŋgin,
íñje buyooso te o iriiñoofo t'afeeneŋ.
21 An fe eeyak kariiŋan,
íñje karahano t'eriikeey íima yite híyiaate hu,
naane iriiŋane i yooŋ,
Faafam n'arahanam t'eriikeey yeene yite híyiaate hu.
22 «An fe eebaje wúkondin ánandin naŋ nu Búwejet bu busoke fu kéeyilene ku!»