Enyarubha ya
Yuda
Okukeeranʼya
1
Enyarubha inu, erwiri kuoni Yuda, omugaya wa Yeesu Kiristu na omumura waabho Yakobho. Ndabhangʼoorera bheenyu bhanú mwabhirikirwa na Taata Waryubha, bheenyu bhanú mureekara mubhuhanje bhwaye, na okwangararirwa bhwaheene na Yeesu Kiristu.2 Ndabhasabhira ku Waryubha abhoongerye ekyabhira, omurembe na obhuhanje.
Okubhutura ekiina kubheehigirya bha obhubheehi
3 Abhahanje bhaani, naaringa ndeegomba bhukongʼu okubhangʼoorera eguru ya obhutuurya bhunú turasanga bhonsego hamwi. Nawe bhoono, naaruuji ega, ndeenderwa mbangʼoorere, naho mbakomererye ega, mwibhagirire obhuheene bhwa eimani bhunú Waryubha yaagwatya abharabhu bha omutima rumwigo kwibhaga ryonsego. 4 Ndabhangʼoorera enyarubha inu, kwa okubha, abhantu nyabhurebhe bhanú bhatakumwigwa Waryubha, bheesoherye gati yeenyu bhugunyi na okwisanganʼya na bheenyu. Abhantu bhayo, bharagamba ega, eriruguto rya Waryubha weetu rirabheekiririrya okugwata orunamba rwabho orubhiibhi rwa omubhiri. Na bharamwanga Yeesu Kiristu, Omukangatya na Omukuru weetu omumwemwe. Nawe, okwambira akare yaangʼoorwa ega, abhantu bhayo, bharibhuturirwa ekiina kya ego abhandi bhaamara okubhuturirwa ekiina.
5 Kweki ndeenda okubhahiitukya, onyoora mwamara okumanya amangʼana ganu gonsego, ega, Omukuru yaatungurya Abhaisiraeri okurwa mubhugaya, mukyaro kya Misiri, nawe, yaamara akasikya bhanú bhataaringa bharamwikirirya.a 6 Kweki muhiituke bhamaraikab bhanú bhateeswanga na obhutungi bhunú bhaaringa nabho, bhakatiga egimenyo gyabho, Waryubha yaabhabhoha mukisunte kwa eminyororo gya koko. Eyo bharaganyirira orusiku orukuru rurya rwa okubhuturirwa ekiina. 7 Kweki muhiituke abhantu bha mumigi gya Sodoma na Gomora, na bharya abha mumigi gya haangʼi. Abhamenyi bha muyo bharahunkana kya bhamaraika bhayo. Bhaaringa bharakora obhusimbe na okugwata orunamba rwa omubhiri runú rutakutuubhana na kya ego bhaabhumbwa bheekare. Waryubha akabhajibhya kwa okusambwa mumururo gwa koko, naho okukemera abhantu bhonsego.c
8 Kora ego, abhantu bhanú bhatakumwigwa Waryubha bharya, bhahunkeeni kya bhayo. Bhararoota ebhirooto, bhinú bhirakonʼya emibhiri gyabho, kweki bhirabhakora bhaange obhutungi bhwa Waryubha na okutuka ebhibhumbwa bhya obhukuru bhinú bhiringi murwire. 9 Nawe, kora Mikaeri maraika omukuru, hanú yaaringa arabhuuriranʼya na okuhakaananʼya na Erisambwad eguru ya omubhiri gwa Musa, ataasakya okurihaamirirya kwa obhubheehi. Nawe, yaagamba ega, “Omukuru Waryubha omwene akukemere!” 10 Nawe, abhantu bhayo bharatuka amangʼana gogonse ganú bhatagamanyiri. Bharisikibhwa kwa amangʼana ganú bhagamanyiri, na bharagakora kya egintyenyi ginú gitaana obhungʼeeni.
11 Bharikirora-ko, kwa okubha bhaagwata enjira ya Kaini, eya okukora obhusarya.e Bharikirora-ko, kwa okubha bheesohya mubhusarya kya bhunú Bharamu yaakora, kurusumo rwa okunyoora obhuniibhi.f Bharikirora-ko, kwa okubha bharasika kwa ekisigo bhaajeema kya ego Koora yaajeema, akasika.g 12 Hanú abhantu bhayo, bhararya hamwi na bheenyu muginyangi gyenyu ginú murasanga kwa obhuhanje,h n-kya amatare ga munyanja ganú gatakumaahikana, na garareeta engʼanga. Bhareemanya abheenego, kwa okwiriisya bira eginsoni. Kweki abhantu bhayo, bhataana obhwera kya amasaaru ganú gataana embura, ganú garahumbibhwa na omuyaga. Na bharingi kya emiti ginú gyaharuruka amasya, gitaana emisumo eribhaga rya omugeso, giihirwe gikwiri kimwi. 13 Bharatamwa okwiribhira kya amabhooka amanene ga munyanja, na amakorwa gaabho ga eginsoni garanyaragana kya erihuro rya amabhooka. Bharingi kya eginjota ginú girayengayenga ginú gitakutura okoorokererya enjira. Waryubha yaabhaseemerya omweya mukisunte kinú kikurirye, naho bhariija okwikara muyo koko.
14 Enoki, omuntu wa orwibhuro rwa muhungati okureka ku Adamu,i yaaruusya obhurooti eguru ya abhantu bhayo ega, “Maaha, Omukuru Waryubha araaja hamwi na ebhiku bhya bhamaraika bhaaye abharabhu, 15 naho abhuturire ekiina abhantu bhonsego na okujibhya bhonsego bhanú bhatakumwigwa. Aribhajibhya kwa amakorwa gaabho amabhiibhi gonsego, ganú bharakora kwa okwanga okumwigwa weeki, hamwi na amangʼana gonsego amabhiibhi ganú abhakori bha obhusarya bhayo, bharagamba eguru yaaye.” 16 Abhantu bhayo, m-beengʼeheerya na abha okutonda amasoro, bharagwata orunamba rwabho orubhiibhi. Bhareegungya bhukongʼu enu bharagungya abhantu, naho bhanyoore obhwera.
Obhutongeri
17 Nawe, bheenyu abhahanje bhaani, muhiituke amangʼana ganú gaagambwa akare hayo, na abhatumwaj bha Omukuru weetu Yeesu Kiristu. 18 Bhaabhakeerya ega, “Eribhaga rya obhuteero bhariibhuka abhantu bha okujeera, bhanú bharibhanga bharagwata orunamba rwabho orubhiibhi rwa okubhahabhya abhandi.” 19 Abhantu bhayo, mbo bharakora mutakwigwana, bhareeganirirya amangʼana ga mukyaro ageenego, bhataana Omutima Omurabhuk wa Waryubha.
20 Nawe, bheenyu abhahanje bhaani, munage kuimani yeenyu, inú erarwa ku Waryubha, na mubhenga murasabha okuringʼaana na kya ego Omutima Omurabhu arabhoorokererya. 21 Mwiyangararire okunaga kubhuhanje bhwa Waryubha, enu muraganyirira Omukuru weetu Yeesu Kiristu, abhamaahire ekyabhira naho okubhasohya mubhuhoru bhwa koko. 22 Mwabhirenga abhantu abhandi bhanú bhaana enkubhi, 23 abhandi mubhatuurye kwa okubhasaka okurwa mubhujibhu bhwa omururo gwa koko. Na abhandi mubhamaahirenga ekyabhira, nawe, mwiyangararirenga na okubha ahare na obhubhiibhi bhwabho.
Amasabho ga okugungya
24 Waryubha ngʼo yaana obhuturo bhwa okubhaangararira mutabhura, na okubhareeta bheenyu bira amasoro embere ya obhukuru bhwaye, enu murajomerwa bhukongʼu. 25 Weeki ngʼo Waryubha omumwemwe, Omutuurya weetu kwa okuhitira ku Yeesu Kiristu Omukuru weetu. Waryubha agungibhwe. Weeki yaana obhukuru, eginguru, na obhutungi, okurwa akare, bhoonwego, na kora koko. Amina.