2
Mbe, mutige obhubhiibhi bhonsego, obhungʼeenererya bhwa amanga gonsego, orwambe na orwango, kora mutakorerana amasoro kora amake. 2-3 Bhoono mumariri okumanya ega, Omukuru Yeesu m-muheene.a Mbe, kya ego abhaana abharera bhareenda amabheere ga bhangʼina waabho, bheenyu mubhe na enamba ya amabheere amajomu ga emitima, naho muture okukongʼa na okutuuribhwa.Okubha abhantu abharabhu bha omutima
4 Yeesu ngʼo erigina erihoru rya okuhagaajira. Erigina riyo, abhantu bhaaryanga, nawe ndyo Waryubha yaasora, na riina obhwera obhunene kumwene. Mbe, mumuseete Yeesu, 5 mumanye ega, bheenyu bhonse n-kya amagina amahoru, murahagaajwa na Waryubha mubhe enyumba ya omutima. Kweki arabhakora mubhe abhasyengerib bhanú bhasorerwe okuruusya ebhimwensoc kurusumo rwa emitima, bhinú bhiramungʼarira kwa obhuturo bhwa Yeesu Kiristu. 6 Mbe, Amangʼoore Amarabhu garagamba ega,
“Maaha! Ndatuura erigina erikuru rya obhurusa Sayuni,d
kweki ndyo erigina rya obhwera rinú naasora.
Nawe, omuntu wowonse nyoore aramwikirirya unú ni-rigina riyo,
atarisuuka kora orusiku rumwi!”e
7 Kubheenyu bhanú mureekirirya erigina riyo, ni-rya okusuukwa. Nawe, kubhanú bhatakwikirirya, Amangʼoore Amarabhu garagamba ega,
“Erigina rinú abhahagaaji bhaangiri,
ndyo ryabheeri erigina erikuru rya obhurusa.”f
8 Kweki, Amangʼoore garagamba ega,
“Erigina riyo ni-rigina rya okwikuujura,
ni-ritare rya okugwisya abhantu.”g
Abhantu bhareekuujura kwa okubha bhatakugwata Amangʼana ga Waryubha, na ego niigo bhaaringa bhaseemeriibhwe okurwa akare.
9 Nawe, bheenyu n-hamati inú yaasorwa, abhasyengeri bha Omukama, abhantu bhanú mwasorwa kurusumo rwaye omwenego, abhantu bhanú Waryubha yeendanga muraarike amakorwa gaaye amakuru. Omwene yaabhabhirikira okurwa mukisunte, okugya mundingaasi yaaye ya okuruguurya.h 10 Akare hayo mutaaringa abhantu bha Waryubha, nawe bhoono, bheenyu m-bantu bhaaye. Kwibhaga riyo, mutaaringa mwabhiirwe na Waryubha, nawe bhoono, mwabhiirwe.i
Obhwikari bhwa abhagaya bha Waryubha
11 Abhahanje bhaani, bheenyu muringi abhageni na m-bahiti bha enjira mukyaro hanu. Kwa ego ndabhakomererya ega, muteekirirya orunamba rwa emibhiri gyenyu, runú rurasongana na bheenyu, rubhahige. 12 Mukore amajomu kubhanú bhatamumanyiri Waryubha, naho nyoore bharibhahaamirirya ega, muringi abhabhiibhi, bharore amakorwa geenyu amajomu. Nho, bharimugungya Waryubha kurusumo rwenyu, orusiku rwa okuuja kwaye.
13 Mubhenga murasuuka abhatungi bha abhantu, kurusumo rwa okumusuuka Omukuru. Musuuke Kaisari, kwa okubha weeki ngʼo omutungi omukuru wa ekyaro kyenyu. 14 Kweki, musuuke abhaanangwa bha ebhyaro, bhanú bhaasorwa na omukama uyo. Bhaasorwa naho bhajibhye abhantu bhanú bharakora amabhiibhi na bhagungye bhanú bharakora amajomu. 15 Obhwendi bhwa Waryubha niiga, mukore amangʼana amajomu, naho mukirye abhakangi bhanú bhatamanyiri amangʼana gaaye.
16 Mwikare kwa okwiyagaara, nawe mutatumira obhwiyagaari bhuyo, okukora amabhiibhi, mumenye kya ego abhagaya bha Waryubha bhareenderwa okumenya. 17 Musuuke abhantu bhonsego, na muhanje abheekirirya abharikyenyu. Mumwigwe Waryubha, na musuuke omukama weenyu.
Obhwikari bhwa abhagaya bha abhantu
18 Bheenyu abhagaya bha abhantu, mwigwenga abhakuru bheenyu, kweki mubhasuuke, bhabhe abhanyoohu kasi abharuru. 19 Nyoore mureegumirirya enyanko kwa okwihonerwa, Waryubha, aribhanonka. 20 Nyoore mureegumirirya enyanko inú mureenderwa kwa ekisigo kya obhusarya bhwenyu, mutaringʼarira Waryubha. Nawe, nyoore mureegumirirya enyanko kwa ekisigo kya okukora amajomu, mbe murangʼarira Waryubha.
21 Mureenderwa mwigumiriryenga ego, kwa okubha Kiristu wonse, yaanyankibhwa kurusumo rwenyu. Kweki akabhatigira ekirengekanʼyo, naho mubhenga muramwihigira. 22 Weeki ataakora obhusarya, kora okugamba obhubheehi.j 23 Hanú yaatukwanga, ataakyukyanga eringʼana ryoryonse. Hanú yaanyankibhwanga ataasakya okuriha ekisiiyomba. Nawe, gonsego yaatigira Waryubha, abhuture ekiina kwa obhuheene. 24 Kiristu omwene yaagega obhusarya bhwetu kumubhiri gwaye, akabhambwa kumusarabha. Yaakora ego, naho bheetu tutatungwa kweki na obhusarya, twikare kwa okumungʼarira Waryubha. Bheenyu mwahonibhwa kwa okuhitira okutemwa kwaye. 25 Mwaringa mubhuriri kya amangʼondi ganú gahabhiri enjira, nawe bhoono, muhunjukiiri Omuriisya weenyu unú arabhaangararira.