Enyarubha ya mbere eya
Petero
Okukeeranʼya
1
Enyarubha inu, erwiri kuoni Petero, omutumwaa wa Yeesu Kiristu.Ndabhangʼoorera bheenyu bhanú musorerwe na Waryubha, bhanú munyarageeni kya abhageni mubhyaro bhya Ponto, Garatia, Kapadokia, Asiab na Bhitunia. 2 Akare hayo, Taata Waryubha yaabhamanya na okubhasora kwa Omutima waaye,c yaabhakora mubhe abharabhu bha omutima, naho mumwigwe Yeesu Kiristu na okuraamwa na amanyinga gaaye.d
Ndabhasabhira ku Waryubha abhoongerye eriruguto na omurembe.
Eimani yeetu
3 Tumugungye Waryubha, Taata wa Omukuru weetu Yeesu Kiristu. Okuringʼaana na ekyabhira kyaye ekyaru, yaatwibhura orwa kabhiri kwa okumuhyukya Yeesu Kiristu, okurwa mubhaku. Kwa ego, tunyooreri obhwisige bhwa obhuheene ega, turabha abhahoru koko. 4 Bhoono turaganyirira okugabha eginonkwe ginú Waryubha atuuriri murwire kurusumo rwa abhantu bhaaye. Eginonkwe giyo, gitakutura okugunda, okunyamuka kora okuhotoka. 5 Waryubha arabhaangararira kwa eginguru gyaye, kwa okubha muramwikirirya Yeesu Kiristu. Aragendererya okubhaangararira okuhikira obhutuurya hanú bhuryorokibhwa kwibhaga rya obhuteero.
6 Mbe, mujomererwe bhukongʼu kwa amangʼana gayo, onyoora bhoono kwa eribhaga ekego muraasurumbarenga kwa ekisigo kya amasakyo amanga amaaru. 7 Amasakyo gayo, garasakya eimani yeenyu emaahikane ega, ngʼ-ya heene, kya ego egijahaabhu girarengwa kwa okusambwa na omururo. Eimani yeenyu iina obhwera obhunene okukira egijahaabhu. Kwa ego, Yeesu Kiristu aribhahaana eginkuma, obhukuru na obhusuuku hanú ariija na okwiyorokya kubhurabhu. 8 Bheenyu mumuhanjiri, onyoora mutaakamuruuji, na muramwikirirya onyoora mutakumurora bhoonwego. Kwa ego, muuna obhujomerwa bhunú bhuuna obhukuru bhunú bhutakugambwa, 9 kwa okubha mwanyoora obhutuurya. Obhutuurya bhuyo, mbo ensonga ya eimani yeenyu.
10 Abharooti bha eriragano rya akare, bhaakora ekituunyo okumanya obhutuurya bhuyo, bhaarootanga eguru ya eriruguto rya Waryubha rinú ribhahikiiri bheenyu. 11 Omutima wa Kiristue yaaringa munsi waabho araroota ega, Kiristu arinyanka, na hanú enyanko iyo erihwa, arihaanwa obhukuru. Mbe, bhaatuna bhukongʼu okumanya amangʼana gayo, ega, garibha ruuha na garimunyoora egaki. 12 Waryubha yaakeerya abharooti bharya ega, amangʼana ganú bhaaringa bhararoota, gataabhatunʼyanga bheeki abheene, nawe bheenyu. Garya bhaagambanga, ngo mwaraarikirwa na bhanú bhaabhareetera Amangʼana Amajomu eguru ya Yeesu Kiristu. Na bhaabhakeerya amangʼana amajomu gayo, kwa obhuturo bhwa Omutima Omurabhu unú yaaringa atumirwe okurwa murwire. Amangʼana gayo, kora bhamaraikaf bhareegomba bhukongʼu okumanya.
Obhwikari bhwa bira obhusarya
13 Kwa ego, mwiseemye na mwiyangararire. Mutuure obhwisige bhonsego kwiruguto rinú murihaanwa, hanú Yeesu Kiristu ariija na okwiyorokya kubhurabhu. 14 Bheenyu m-baana bha Waryubha. Bhoono, mbe, mumwigwe, muteekirirya kora ahake okugendererya na orunamba runú mwaringa naro, hanú mwaringa mukyari okumanya eringʼana ryoryonse erijomu. 15 Waryubha unú yaabhabhirikira, m-murabhu. Bhoono bheenyu bhonse, mureenderwa okubha abharabhu kuginteemo gyenyu gyonsego. 16 Waryubha aragamba mu Mangʼoore Amarabhu ega, “Mubhe abharabhu bha omutima kwa okubha oni m-murabhu.”g
17 Hanú muratogora Waryubha mumasabho geenyu, muramubhirikira Taata. Weeki atakungʼahirya omuntu wowonse. Aribhuturira ekiina kira omuntu okuringʼaana na kinú okoreri. Kwa ego, mwikare kwa okumwigwa weeki, kwibhaga ryenyu rinú ritamiri mukyaro hanu. 18 Mwaringa mumenyeri okuringʼaana na enteemo inú etaringi enjomu, kya ego mwagabha okurwa kubhajaaji weenyu. Bhoono mumanye ega, Waryubha ataabhatungurya bheenyu okurwa kunteemo inu kwa okuhitira ebhintu bhinú bhirasarika kya egimbirya na ejahaabhu. 19 Nawe, yaabhatungurya kwa okutumira amanyinga ganú gaana obhwera obhunene. Amanyinga gayo, ngo aga Kiristu. Weeki yaaringa kya omwana wa eringʼondih unú ataringi omubheeru kasi omunyanku. 20 Okurwa ekyaro kitarabhumbwa, Waryubha yaaringa amumanyiri kwa ensonga iyo. Nawe, akaganya okuhikira kwibhaga rya obhuteero, nho akamureeta na okumutubhura kubhantu bhonsego mukyaro. Gayo yaagakora kurusumo rwenyu. 21 Kwa okuhitira ku Kiristu, muramwikirirya Waryubha. Weeki yaamuhyukya na okumuhaana obhukuru, na kiyo nkyo kirakora bheenyu muramwikirirya na okumwisiga Waryubha.
22 Kwa okubha mureekara okuringʼaana na ameehigiryo ga obhuheene eguru ya Yeesu, emitima gyenyu girabhiibhwe. Bhoono mukore ekituunyo okuhanja abharikyenyu mutabha na orwambe. Mbe, muhanjane kwa emitima gyenyu gyonsego. 23 Mukore ego, kwa okubha mweebhurwa orwa kabhiri. Okwibhurwa kuyo, kutakurekana na bheseweenyu, bheeki bharakwa, nawe bheenyu mutakukwa kwa okubha mweebhurwa kwa eringʼana rya Waryubha erihoru. Na eringʼana ryaye, riraguma koko. 24 Amangʼoore Amarabhu garagamba ega,
“Abhantu bhonsego n-kya amanyanki,
na obhujomu bhwabho n-kya amauwa ga kumanyanki.
Amanyanki garahotoka na amauwa garagwa,
25 nawe, eringʼana rya Omukuru Waryubha riraguma koko.”i
Eringʼana riyo ndyo Amangʼana Amajomu ganú mwaraarikirwa.