Mubhenga mureesuuhya embere ya Waryubha
4
Bhoono, eriihe na eritoongʼana gati yeenyu bhirarwa-ha? Bhirarekana na orunamba rwenyu orubhiibhi runú rurahigana mumitima gyenyu. 2 Mureegomba ebhintu nyabhurebhe, nawe, hanú mutakubhinyoora, mureeta. Na murabha na orwango rwa ebhintu nyabhurebhe, nawe hanú muratamwa okubhinyoora, murakora eriihe na eritoongʼana. Mutakunyoora ebhintu, kwa okubha mutakumusabha Waryubha. 3 Kora hanú muramusabha mutakunyoora, kwa okubha muramusabha bhubhiibhi, naho mubhitumire kwa orunamba rwenyu.4 Bheenyu m-bantu bhanú mutaringi abhaheene ku Waryubha kya abhasimbe kubhutetani bhwabho. Bhoono, mutamanyiri ega, okukora amangʼana ganú gatakumungʼarira Waryubha nko okubha omusigu wa Waryubha? Kwa ego, kira unú areenda okubha omusaani wa amabhiibhi ga ekyaro, areekora okubha omusigu wa Waryubha. 5 Mbe, muteeganirirya ega, engʼoorerwe bhusa mu Mangʼoore Amarabhu, hanú garagamba ega, Omutima unú Waryubha yaatuura munsi weetu, aratwigomba bhukongʼu okuhikira okurora orwango.a 6 Nawe, eriruguto rinú turahaanwa na Waryubha riina eginguru bhukongʼu, nkyo kirakora engʼoorerwe mu Mangʼoore Amarabhu ega,
“Waryubha arahakaanʼya bhanú bhareerora,
nawe, arahaana abheesuuhya eriruguto.”b
7 Mbe, mumwigwe Waryubha, na mwange Erisambwa, ryonse riraabhangʼose. 8 Mumusuntarire Waryubha, nho wonse, araabhasuntarire bheenyu. Bheenyu abha obhusarya, abha ameetegeerero amanga gabhiri, mutige obhusarya bhwenyu, na ameetegeerero geenyu amabhiibhi, mukore amajomu.c 9 Mwigwe obhururu kwa ekisigo kya obhusarya bhwenyu, mufumbe na mukuure. Okuseka kwenyu, kukyukibhwe okubha okukuura, na obhujomerwa bhwenyu, bhukyukibhwe okubha okufumba. 10 Mwiyituumye embere ya omukuru, wonse aribhariinʼya.
Mutabhanga murahaamiriranʼya
11 Abhahiiri bhaani kuimani, mutabhanga murahaamiriranʼya. Kira unú aramuhaamirirya omurikyaye, kasi okumubhuturira ekiina, uyo, arabha ajeereri amaragiriryo ga Waryubha na okugarora ega, m-mabhiibhi. Na hanú oragarora ega m-mabhiibhi, otakutura okugagwata kweki, nawe, orabha wikorerye omubhuturi wa ekiina. 12 Waryubha omwene, ngʼo yaatuura amaragiriryo, na ngʼo Omubhuturi wa ekiina. Ngʼo aratura okututuurya na okutusikya. Bhoono, uuwe niwi, kora obhuturire ekiina omurikyaho?
Mutabha mureegungya kurusumo rwa ejo
13 Bhoono mbe, mwitegeerere bhujomu, bhanú muragamba ega, “Reero kasi ejo, twakagye orugendo mumugi nyabhurebhe. Na twikare eyo omwaka omugima, turakora ebhyasara, na okunyoora obhwera.” 14 Nawe, mutamanyiri kinú kyakeebhuke ejo! Obhuhoru bhwenyu niki? Bheenyu n-kya ekitu, kinú kiramaahikana kwa eribhaga ekego, na okubhura! 15 Mureenderwa mugambenga ega, “Hanú Omukuru aryenda, turibha na obhuhoru na turikora kinu kasi kirya.” 16 Nawe bhoono, bheenyu mureegungya na okwiheema ega, muuna obhuturo. Okwigungya kuyo n-kubhiibhi. 17 Mbe, kira unú amanyiri okukora amajomu, nawe atakugakora, hayo arakora obhusarya.