Mutabha na ekisorooro
2
Abhahiiri bhaani kuimani, kwa okubha mumwikirirye Omukuru weetu Yeesu Kiristu wa obhukuru, mutabha na ekisorooro kubhantu. 2 Tugambe ega, omuntu unú yeebhoheri emyenda emijomu na epete ya ejahaabhu kukyara, asohe mwikanisa ryenyu. Na kwibhaga riyoriyo, asohe-mo omutobhu umwi, unú yeebhoheri emyenda emitaamuke. 3 Kimwi, mumusuuke unú yeebhoheri emyenda emijomu, na okumukeerya ega, “Uuwe ikara ahasi ahajomu hanu.” Nawe, omutobhu weeki, mumukeerye ega, “Uuwe imirira harya,” kasi ega, “Ikara kumaguru gaani hansi hanu.”4 Bhoono, nyoore murakora ego, mutakurora ega, mukyakora ekisorooro kubhantu? Mutakurora ega, muraamura kwa ameetegeerero geenyu amabhiibhi?
5 Abhahiiri bhaani abhahanje kuimani, munyitegeerere bhujomu. Waryubha abhasoreri abhatobhu bha mukyaro kinu, naho bhabhe abhaniibhi kuimani, na okugabha obhukama bhunú yaabharaga bhanú bhamuhanjiri. 6 Nawe, bheenyu murabhajeera bhukongʼu abhatobhu! Bhoono, murabhiirwe ega, abhaniibhi mbo bharabhabhandirirya bheenyu na okubhahira mwibharaja? 7 Bhoono, etaringi ega, abhaniibhi mbo bharatuka eriina erijomu rya Yeesu Kiristu, rinú murabhirikirirwa?
8 Mu Mangʼoore Amarabhu, amaragiriryo ga obhukama bhwa Waryubha garagamba ega, “Omuhanje omurikyaho, kya ego oreehanja uuwe omwene.”a Nyoore murakora ego, murakora bhujomu. 9 Nawe, nyoore muraakorenga ekisorooro kubhantu, murabha murakora obhusarya, na amaragiriryo garabhajongera ega, bheenyu m-basarya.
10 Omuntu akaagwata amaragiriryo gonsego, nawe, asarye eriragiriryo rimwi, arabharwa ega, asarirye gonsego. 11 Ndagamba ego, kwa okubha Waryubha unú yaatuura amaragiriryo ganú garagamba ega, “Otakora ameega kibhara,”b ngʼo uyo yaagamba ega, “Oteeta.”c Bhoono, nyoore otakukora ameega kibhara, nawe oreeta, orabharwa ega, osarirye amaragiriryo.
12 Mbe, mubhenga muragamba na okukora amangʼana, enu murahiituka ega, Waryubha aribhabhuturira ekiina okurekana na amaragiriryo ganú garareetera abhantu obhwiyagaari bhwa okurwa mubhusarya. 13 Waryubha ataribha na ekyabhira okumubhuturira ekiina, omuntu unú ataana ekyabhira. Nawe, nyoore omuntu yaabhira abhandi, Waryubha wonse arimwabhira kurusiku rwa okubhutura ekiina!
Eimani yeenyu egendanʼye na amakorwa amajomu
14 Abhahiiri bhaani kuimani, haana obhwera-ki kumuntu unú aragamba ega, yaana eimani, nawe, ataana amakorwa amajomu? Maheene eimani iyo etakutura okumutuurya. 15 Nyoore omuhiiri weenyu kuimani owa ekisaaja kasi owa ekikari ataana emyenda kora ebhyakurya, 16 na oumwi weenyu amukeerye ega, “Genda na omurembe, wote omururo na okwiguta,” nawe, atamwibhoherye kasi okumwigutya, m-bwera-ki bhunú amukoreeri? 17 Niigo eringi, nyoore muuna eimani eyenego, nawe, mutaana amakorwa amajomu. Eimani yeenyu, ekwiri.
18 Nawe, omuntu aratura okugamba ega, “Uuwe uuna eimani, na oni niina amakorwa amajomu.”
Mbe, ndaamukeerye ega, “Unyorokye eimani yaaho, bira amakorwa amajomu. Nawe, oni ndaakoorokye eimani yaani kwa amakorwa gaani amajomu.” 19 Uuwe oreekirirya ega, ariho Waryubha oumwi ego. Orakora bhujomu! Nawe, kora ebhihwi bhyonse, bhireekirirya ego na okurigita kwa obhoobha!
20 Uuwe m-mukangi! Okyenda okoorokibhwa ega, eimani inú etaana amakorwa amajomu, etaana obhwera? 21 Jaaji weetu Abhurahamud yaaruusya omwana waaye Esaaka, abhe ekimwensoe kya okwitwa ahasi ha okumwensera. Okurekana na ekikorwa kyaye ekijomu kiyo, Waryubha yaamubhara okubha owa obhuheene embere yaaye! 22 Bhoono, otakurora ega, eimani ya Abhurahamu, yaaringa eragendanʼya na amakorwa gaaye, na ega, eimani yaaye, yaakunaana kwa amakorwa gaaye? 23 Ego, gaakunaana ganú gaagambwa mu Mangʼoore Amarabhu ega, “Abhurahamu yaamwikirirya Waryubha, kwa ego, Waryubha akamubhara okubha omuntu omuheene embere yaaye.”f Kweki Abhurahamu, akabhirikirwa omusaani wa Waryubha.
24 Mbe, murarora ega, omuntu arabharwa okubha wa obhuheene, okurekana na amakorwa gaaye amajomu, nawe, etaringi kwa eimani eyenego.
25 Kora Rahabhu omusimbe urya, wonse yaabharwa okubha omuntu wa obhuheene embere ya Waryubha, okurekana na amakorwa amajomu, ganú yaakora. Yaabhagenihya abhabhuuririrya bha Isiraeri na okubhabheera bhagye gyabho, kwa okuhitira enjira eindi.g
26 Bhoono, nyoore omubhiri gutaana enkoro munsi waago gukwiri, egoego omuntu unú yaana eimani, nawe, ataana amakorwa amajomu, eimani yaaye ekwiri.