Enyarubha ya
Yakobho
Okukeeranʼya
1
Enyarubha inu, erwiri kuoni Yakobho, omugaya wa Waryubha na Omukuru Yeesu Kiristu. Ndabhangʼoorera bheenyu, abheekirirya bha amakabhira ekumi na gabhiri,a ganú mwanyaragana mubhyaro ebhindi. Ndabhakeeranʼya!Mubhenga na obhujomerwa hanú murasakibhwa
2 Abhahiiri bhaani kuimani, mubhenga na obhujomerwa hanú muranyoorana na amasakyo amanga hagari hagari, 3 kwa okubha, mumanyiri ega, okusakibhwa kwa eimani yeenyu, kurabhareetera okwigumirirya. 4 Mureenderwa mugendererye okwigumirirya okuhikira kubhuteero, naho mubhe mukuneeni, mutariija okusuuhirwa ekintu kyokyonse.
5 Nawe, hanú oumwi weenyu araasuuhirwe egintungwa, areenderwa amusabhe Waryubha, weeki araamuhaane. Waryubha arahaananga abhantu bhonsego kwa obhuserenʼya, kora atakukemera. 6 Nawe, hanú araamusabhe Waryubha, asabhe kwa eimani, atabha na enkubhi. Omuntu unú arabha na enkubhi, n-kya amabhooka ga munyanja ganú garahumbibhwa na omuyaga na okweswa eyo na eyo. 7 Omuntu kya uyo, ateeganirirya ega, arinyoora ekintu kyokyonse okurwa ku Mukuru Waryubha. 8 Weeki, ngʼ-wa ameetegeerero amanga gabhiri, areekubhyakubhya kumangʼana gaaye gonsego.
9 Omwikirirya omutobhu, areenderwa ajomerwe, kwa okubha Waryubha amwinwiri. 10 Nawe, omwikirirya omuniibhi, areenderwa ajomerwe hanú yeetuumiibhwe na Waryubhab kwa okubha ariruusibhwa-ho kya amauwa ga mwisisi. 11 Hanú eryubha riratura, omubhasu gurabha omururu kee, guroomya ebhiimerya, amauwa gaabhyo garagwa, na obhujomu bhwago bhonsego bhurasarika. Egoego, omuniibhi wonse, arisika aringi kumirimu gyaye.
12 Yaanonkwa omuntu unú areegumirirya hanú arasakibhwa, kwa okubha hanú aribha ahigiri amasakyo, Waryubha arimuhaana omutuho gwa obhuhoru bhwa koko, gunú yaaraga abhantu bhanú bhamuhanjiri.
13 Omuntu hanú arasakibhwa okukora amabhiibhi, atagamba ega, “Ndasakibhwa na Waryubha,” kwa okubha Waryubha atakusakibhwa na amabhiibhi, kora weeki atakumusakya omuntu wowonse kya ego. 14 Nawe, kira omuntu arasakibhwa kwa okurutwa na okungʼeenwa na orunamba rwaye orubhiibhi. 15 Hanú orunamba rwaye rurakongʼa, rurareeta obhusarya, na hanú obhusarya bhurakongʼa, bhurareeta oruku.c
Mutangʼeenwa eguru ya obhujomu bhwa Waryubha
16 Abhahiiri bhaani abhahanje kuimani, mutangʼeenwa. 17 Kira omutuho omujomu gunú turaruusya na kira ekintu ekijomu kinú turahaanwa, kirarwa murwire ku Waryubha, Omubhumbi wa obhurabhu bhwa eryubha, omweri na eginjota. Waryubha m-muheene eribhaga ryonsego, na atakwikyukyakyukya kya ekiiriiri kinú kirangʼaanyangʼaanya. 18 Kya ego omwene yeenda, yaatukora tubhe abhaana bhaaye, kwa enjira ya amangʼana gaaye ga obhuheene, naho tubhe abha mbere kubhyonsego bhinú yaabhumba.
Mwitegeerere eringʼana rya Waryubha, na okuriigwa
19 Abhahiiri bhaani abhahanje kuimani, munyitegeerere bhujomu! Kira omuntu abhe omwangu wa okwigwa, nawe, atabha omwangu wa okugamba kasi okujima, 20 kwa okubha, hanú omuntu ajimiri, atakukora amangʼana ga obhuheene embere ya Waryubha. 21 Kwa ego, mutigane na amangʼana gonsego ga okubhakonʼya na obhubhiibhi bhonsego. Mugwate kwa okwisuuhya eringʼana rinú Waryubha yaatuura mumitima gyenyu, kwa okubha riyo ndyo riratura okubhatuurya.
22 Mutabha mureengʼeena kwa okwitegeerera eringʼana rya Waryubha okwenego, nawe mukorenga kya ego riragamba. 23 Omuntu unú areetegeerera eringʼana rya Waryubha okwenego, nawe, atakukora kya ego riragamba, uyo n-kya omuntu unú areemaaha mukirore. 24 Hanú aramara okwimaaha, aragya gyaye, rumwigo, ararabhirwa kya ego aringi. 25 Nawe, omuntu unú areekomya bhujomu amaragiriryo ganú gakuneeni, na okureetera abhantu obhwiyagaari bhwa okurwa mubhusarya, akaagendererya okukora gayo, enu arahiituka ganú yeegwa na okugakorera emirimu, uyo arinonkwa kwa okukora ego.
26 Nyoore omuntu areerora ega, yaana edini inú eramungʼarira Waryubha, nawe, atamanyiri okuribhira orurimi rwaye okugamba amabhiibhi, uyo areengʼeena omwene, na edini yaaye etaana obhwera. 27 Edini inú eramungʼarira Taata Waryubha, na inú ararora ega, etaana obhubhiibhi ngʼ-inu, okubheera abhataka na abhasino kuginyanko gyabho, hamwi na okwiyangararira na amabhiibhi ga mukyaro munu.