Enyarubha ya Pauro ku
Firimoni
Pauro aramukeeranʼya Firimoni
1
Enyarubha inu, erwiri kuoni Pauro, omubhohwa kurusumo rwa okuraarika Amangʼana Amajomu eguru ya Kiristu Yeesu. Ndakungʼoorera uuwe Firimoni. Oni na omuhiiri weetu kuimani Timoteo, turakukeeranʼya uuwe omuhanje weetu, na omukori wa emirimu omurikyetu. 2 Turamukeeranʼya na omuhara weetu kuimani Afia, na omusirikare omurikyetu Arikipo, hamwi na abheekirirya bhonsego bhanú oranyoora bhareekumanʼya iika owaaho.3 Turabheendera eriruguto na omurembe okurwa ku Taata Waryubha na ku Mukuru Yeesu Kiristu, bhibhe hamwi na bheenyu.
Omukumo na amasabho ga Pauro kurusumo rwa Firimoni
4 Kira hanú ndakusabhira, ndamukumya Waryubha, 5 kwa okubha ndeegwa ega, oragendererya okumwikirirya Omukuru Yeesu na okubhahanja abheekirirya bhonsego. 6 Eimani yaaho yaakukoreri obhe na obhumwi na abheekirirya abhandi. Bhoono ndasabha ega, obhumwi bhuyo kuimani bhukubheere okumanya amajomu gonsego ganú tureenderwa okukora, kukugwatana kwetu na Yeesu Kiristu. 7 Omuhiiri waani, obhuhanje bhwaho, bhungʼeeri obhujomerwa obhunene na okunteremya bhukongʼu, kwa okubha osambaarukirye emitima gya abheekirirya.
Pauro arasabha Firimoni amwabhire Onesimo
8 Kwa ego, onyoora niina obhutungi okurwa ku Kiristu bhwa okukwamura rinú oreenderwa okukora, ntakukora ego. 9 Nawe, kurusumo rwa obhuhanje, nduuji ega, m-bujomu nkusabhe, oni Pauro omugotu, kweki omubhohwa kurusumo rwa Kiristu Yeesu. 10 Ndakusabha eringʼana rimwi, eguru ya Onesimo.a Weeki n-kya omwana waani, kwa okubha naamwibhura okumwikirirya Yeesu Kiristu, eribhaga ndingi mukibhohe. 11 Enyuma hayo, ataakujomeranga, nawe bhoono, arakujomera bhukongʼu, na oni nonse.
12 Bhoono, ndamuhindya kuuwe, weeki unú nhanjiri kwa omutima gwani gonsego. 13 Kweki, nkeenderi yeekare na oni, naho anyoore omweya gwa okumbeera emirimu ginú uuwe okaambeereri, eribhaga ndingi mukibhohe kurusumo rwa Amangʼana Amajomu. 14 Nawe bhoono, nduuji ega, etaringi bhujomu okukora ryoryonse bira uuwe okwikirirya. Ntakwenda okukubhandirirya ega umbeere, nawe, ndeenda okore amajomu kwa okwenda kwaho omwene.
15 Hamwi, Onesimo yaarwa owaaho kwa eribhaga ekego, naho obhe nawe kweki koko. 16 Okwambira bhoono, weeki ataringi kya omugaya waaho, nawe, weeki yaana obhwera okukira omugaya. Weeki m-muhiiri weetu omuhanje kuimani. Ngʼ-waheene bhukongʼu kuoni, na kuuwe aribha owa heene bhukongʼu, kya omugaya wa iika kweki kya omuhiiri ku Mukuru Yeesu.
17 Bhoono mbe, nyoore oraarore ega, oni niina obhumwi na uuwe, omuturuungʼane uyo kya ego okaanturuungʼeeni oni omwene. 18 Na nyoore yaakuraarira ekintu kyokyonse, kasi oramutonga ekintu, untonge oni. 19 Oni Pauro, nngʼooreri kwa okubhoko kwani omwene ega, ndikuriha. Ntakwenda okugamba ega, ndakutonga esiiri, kwa okubha uuwe waatunguribhwa okurekana na okuraarika kwani. 20 Bhoono omuhiiri waani, unyikiririrye eringʼana rinu, kurusumo rwa Omukuru Yeesu. Osambaarukye omutima gwani kya ego omuhiiri ku Kiristu akaakoreri.
21 Ndakungʼoorera ganu, kwa okubha mmanyiri ega, oreekirirya. Kweki mmanyiri ega, orikora okukira ganú nkusabhiri.
22 Hamwi na gayo, unseemerye ahasi ha okwikara, kwa okubha ndeesiga ega, kwa amasabho geenyu, Waryubha arimbeera niije eyo.
Okukeeranʼya kwa okuraga