Enyarubha ya Pauro ku
Abhagaratia
Pauro arakeeranʼya Abhagaratia
1
Enyarubha inu erwiri kuoni Pauro. Oni omutumwa,a ntaatumwa na abhantu kasi okuragiriribhwa na omuntu wowonse, nawe, naatumwa na Yeesu Kiristu, na Taata Waryubha unú yaamuhyukya Yeesu okurwa mubhaku. 2 Oni na abhahiiri bheetu kuimani bhonsego bhanú bharingi hamwi na oni, turabhakeeranʼya bheenyu bhanú muringi mumakanisa ga Waryubha mukyaro kya Garatia.3 Ndabheendera eriruguto na omurembe okurwa ku Taata Waryubha, na ku Mukuru Yeesu Kiristu, bhibhe hamwi na bheenyu. 4 Kiristu yeeruusya obhuhoru bhwaye, kurusumo rwa obhusarya bhwetu, naho atutuurye okurwa mumabhiibhi gonsego ga mukyaro kinu. Yaakora ego, okurekana na obhwendi bhwa Taata Waryubha. 5 Taata Waryubha agungibhwe koko na koko. Amina.
Gatariho Amangʼana Amajomu agandi aga maheene
6 Oni ndaruguura bhukongʼu, kwa okubha ni-ribhaga ekego rinú ryahitiri, bheenyu mwamujeemeri Waryubha unú yaabhabhirikira kwa eriruguto rya Kiristu. Mweehunjuriiri ameehigiryo agandi ganú abhandi bharagabhirikira ega, m-Mangʼana Amajomu. 7 Obhuheene niiga, gatariho Amangʼana Amajomu agandi. Nawe, bhariho abhantu bhanú bharabhahabhya na okwenda okukyukya Amangʼana Amajomu eguru ya Kiristu. 8 Kora nyoore omuntu wowonse gati yeetu kasi maraikab okurwa murwire, araabharaarikire amangʼana gogonse ganú gatahunkeeni na ganú bheetu twabharaarikira, omuntu uyo yeehiimwe na Waryubha! 9 Kweki ndahunjukira okugamba kya ego twagamba kwibhaga rirya, ega, nyoore omuntu araabharaarikire amangʼana gogonse ganú gatahunkeeni na ganú bheenyu mweekirirya, omuntu uyo yeehiimwe na Waryubha!
10 Bhoono, muramanya ega, ndeenda okwikiriribhwa na abhantu? Tiigo-ha, kora ahake, oni ndeenda okwikiriribhwa na Waryubha omwenego. Kasi muramanya ega, ndeenda okujomera abhantu? Nyoore kora bhoono, nkeenderi okujomera abhantu, ntakaabheeri omugaya wa Kiristu.
Ameehigiryo ga Pauro gararwa ku Yeesu Kiristu
11 Abhahiiri bhaani kuimani, ndeenda mumanye ega, Amangʼana Amajomu ganú oni naabharaarikira, gataringi ga abhantu, 12 kwa okubha ntaahaanwa na omuntu kora nteehigiribhwa na omuntu wowonse. Nawe, Yeesu Kiristu omwene, ngʼo yaagantubhurira.
13 Bheenyu mweegwa enteemo yaani kya ego yaaringa, kwibhaga rinú naaringa ndarwanira egimiira gya Ekiyahudi. Mumanyiri kya ego naanyankyanga erikanisa rya Waryubha okuhikira ekahitiranʼya, neendanga okurisikya chwe. 14 Oni naaringa nkiriri abharikyani abhaaru abha embaasi yaani, kwa okurwanira egimiira gya Ekiyahudi. Naakoranga ekituunyo bhukongʼu, okugwata amaragiriryo ganú bhajaaji weetu bhaaringa bharagwata. 15 Nawe, Waryubha kwa eriruguto ryaye, yaaringa yansoreri nkyari munda ya maayi, akambirikira mmukorere emirimu gyaye, akaamura 16 okuntubhurira kya ego Omwana waayec aringi. Yaakora ego, naho ndaarike Amangʼana Amajomu eguru ya Omwana waaye uyo, kubhantu bhanú bhataringi Abhayahudi. Oni ntaatuna omuntu owa okuntongera kinú ndaakore. 17 Kora ntaagya Yerusaremu,d kubhanú bhaankangatira okubha abhatumwa. Nawe, kinú naakora n-kugya kimwikimwi mukyaro kya Arabhia. Kimwi, kwa eribhaga nyabhurebhe, nkahunjuka kweki mumugi gwa Damasikasi.
18 Hanú emyaka esatu gyahwa, nkagya Yerusaremu, naho mmaahane na Kefae eyo. Nkeekara owaaye eginsiku ekumi na etaanu egyenego. 19 Nawe, ntaarora abhatumwa abhandi, nawe naamurora Yakobho, omumura waabho omuke na Omukuru Yeesu. 20 Waryubha amanyiri ega, amangʼana ganú ndabhangʼoorera n-ga maheene, gataringi ga obhubheehi!
21 Mbe, hanú naarwa owa Kefa, nkagya mubhyaro bhya Siria na Kirikia. 22 Kwibhaga riyo, abheekirirya bha mukyaro kya Yudea bhaaringa bhatarandora kwa ameeso. 23 Nawe, bhaaringa bhareegwa ega, “Omuntu unú yaaringa aratunyankya kubhwambiro hayo, bhoono araraarika eguru ya eimani inú yaasakyanga okuisikya!” 24 Kimwi bhakamugungya Waryubha kurusumo rwa ganú yaankorera.