15
Mbe, bheetu bhanú tunagiri kuimani, tureenderwa okwigumirirya abharikyetu, bhanú bhataranaga kuimani. Tubhabheere abhanyooheeru kuimani, tuteengʼahirya bheetu abheene. 2 Kira oumwi weetu, akore ekituunyo okukora amangʼana ganú gaana obhwera kumwikirirya omurikyaye, naho wonse anage kuimani yaaye. 3 Kora Kiristu omwene, ataakora amangʼana ganú gaaringa na obhwera kuweeki omwenego. Nawe, ganú yaakoranga, gaaringa kya ego Amangʼoore Amarabhu garagamba ega,“Amatuki ganú bharakutuka uuwe Waryubha,
gaannyoora oni.”a
4 Gonsego ganú gaangʼoorwa akare, mu Mangʼoore Amarabhu, gaangʼoorwa kurusumo rwa okutwihigirya bheetu. Amangʼoore gayo, garatubheera okwigumirirya muginyanko gyetu na garatuhorisya, naho tubhe na obhwisige.
5 Waryubha ngʼo aratubheera okwigumirirya na aratuhorisya. Bhoono, ndasabha ega, abhakore mwikare hamwi kwa ensonga eimwi, kwa okubha muragwata ekirengyo kya Kiristu Yeesu. 6 Hayo nho, bheenyu bhonsego, muraature okumugungya Waryubha, Taata wa Omukuru weetu Yeesu Kiristu, kwa ensonga eimwi na kwa eriisi erimwi.
Waryubha areekirirya Abhayahudi//na bhanú bhataringi Abhayahudi
7 Bhoono, kira oumwi yeekirirye omurikyaye, kya ego Kiristu yaabheekirirya bheenyu, naho abhantu bhamugungye Waryubha. 8 Muhiituke ega, Kiristu yaaja okubha omukori wa emirimu wa Abhayahudi. Yaaja naho abhoorokye ega, Waryubha m-muheene, na kwa enjira ya Kiristu, Waryubha akuneenʼye egindago gyonsego ginú yaaraga bhajaaji weetu. 9 Kweki, yaaja naho abhantu bhanú bhataringi Abhayahudi, bhamugungye Waryubha kwa ekyabhira kyaye. N-kya ego Amangʼoore Amarabhu garagamba ega,
“Kwa ego, ndikugungya gati ya abhantu bha ebhyaro ebhindi,
ndikwimbira ameembo ga okukukumya uuwe.”b
10 Kweki, Amangʼoore garagamba ega,
“Bheenyu abhantu bha ebhyaro ebhindi,
mujomerwe hamwi na abhantu bha Waryubha!”c
11 Kweki, Amangʼoore garagamba ega,
“Bheenyu abhantu bha ebhyaro ebhindi,
mumugungye Omukuru Waryubha.
Bheenyu abhantu bha amakabhira gonsego mukyaro,
mumugungye bhukongʼu Waryubha!”d
12 Kora omurooti Isaaya wonse yaagamba ega,
“Ariija omuntu oumwi okurwa kurwibhuro rwa Yeese,
weeki aritunga ebhyaro bhyonsego.
Na abhantu bha ebhyaro bhyonsego,
bharimwisigira ega, weeki aribhatuurya.”e
13 Waryubha ngʼo tureesigira ega, arikora gonsego ganú yaaraga. Kwa ego, ndabhasabhira ega, abhahaane omurembe bhukongʼu na obhujomerwa obhwaru hanú muragendererya okumwikirirya. Hayo nho muraabhe na obhwisige obhunene, kwa obhuturo bhwa Omutima Omurabhu.
Ensonga ya Pauro ya okungʼoora enyarubha yaaye
14 Abhahiiri bhaani kuimani, oni omwene niina obhuheene ega, bheenyu m-bantu abhaheene bhukongʼu, na mumanyiri bhujomu kya ego mureenderwa okukora, kweki muuna obhuturo bhwa okwihigiranʼya. 15 Kora ego, mbangʼooreeri amangʼana agandi munyarubha inu kwa obhuhaari, naho mbahiitukye amangʼana gayo. Nkoreri ego, okurekana na eriruguto rinú Waryubha yangʼeeri, 16 naho mbe omukori wa emirimu wa Kiristu Yeesu kubhantu bhanú bhataringi Abhayahudi. Ngʼeerwe emirimu gya omusyengeri wa okubharaarikira Amangʼana Amajomu okurwa ku Waryubha, naho bhabhe kya ekimwenso kinú kyaraamwa na Omutima Omurabhu.
17 Bhoono, okurekana na okugwatana kwani na Kiristu Yeesu, ndatura okwigungirya emirimu ginú ndakora kurusumo rwa Waryubha. 18 Oni ntakugamba eringʼana ryoryonse erindi, nawe, ganú Kiristu yaakora okuhitira kuoni. Yaakora abhantu bhanú bhataringi Abhayahudi, bhamwigwe Waryubha. Eringʼana riyo, ryakoreka okuhitira kumangʼana ganú naaringa ndagamba na emirimu ginú naaringa ndakora. 19 Bhaarutwa okumwigwa, kwa okubha okuhitira kuoni, bhaarora eginguru gya Kiristu kubhimanyiiriryo na ebhiruguuryo. Naatura okugakora kwa eginguru gya Omutima wa Waryubha. Kwa enjira iyo, neenaara kira ahasi ndaraarika Amangʼana Amajomu eguru ya Yeesu Kiristu, okwambira mumugi gwa Yerusaremu okuhikira mukyaro kya Iruriko. 20 Kwa ego, ensonga yaani nu-kuraarika Amangʼana Amajomu, ahasi hanú abhantu bhataakaraarikiirwe amangʼana eguru ya Kiristu. Ndeenda okukora ego, naho ntahunjukira okukora emirimu ahasi hanú omuntu oundi yaamara okukora. 21 Ndakora kya ego Amangʼoore Amarabhu garagamba ega,
“Abhantu bhanú bhataakaraarikiirwe amangʼana gaaye, mbo bharigarora,
na abhantu bhanú bhataakageegwiri, mbo bharigamanya.”f
Enamba ya Pauro ya okugya mumugi gwa Ruumi
22 Emirimu giyo, ngyo gyaringa girandibhira mara kaaru okuuja kubheenyu. 23 Nawe bhoono, mmariri emirimu gyani kumbaara ginu, na kwa emyaka emyaru naaringa ndeegomba okuuja kubheenyu eyo. 24 Kwa ego, ndeenda okubhataarira, na okujomererwa ekigwatani kyenyu kwa eribhaga ekego, hanú ndihita okugya mukyaro kya Isipania. Kwa ego, ndasabha ega, muriija okumbeera kurugendo rwani rwa okugya mukyaro muyo.
25 Bhoonwego, ndagya Yerusaremu kurusumo rwa okuhira omusororyo kubheekirirya abharikyetu.g 26 Abheekirirya bhanú bharingi Makedonia na Akaya, bhaarora m-bujomu okusororya, naho bhabheere abheekirirya abhatobhu gati ya abheekirirya bhanú bharingi Yerusaremu erya. 27 Bheeki abheene mbo bhaamura okukora ego, na m-maheene ega, bharatongwa okubhabheera. Bharatongwa, kwa okubha abheekirirya bhanú bhataringi Abhayahudi, bhagwateeni hamwi na Abhayahudi, kuginonkwe gya obhutuurya ginú girahitira ku Bhayahudi. Kwa ego, abheekirirya bhanú bhataringi Abhayahudi, bhareenderwa bhabheere Abhayahudi kwa ebhintu bhyabho. 28 Hanú ndibha mmariri emirimu giyo, egya okubhagwatya omusororyo guyo abheekirirya bha Yerusaremu, nho ndyamba orugendo rwani rwa okugya Isipania, na ndihitira kubheenyu eyo. 29 Mmanyiri ega, hanú ndibha nhikiri kubheenyu na okwikara hamwi na bheenyu, Kiristu aritunonka kwibhaga rinú ndibha hayo.
30 Abhahiiri bhaani kuimani, okurekana na okugwatana kwetu na Omukuru weetu Yeesu Kiristu, na okurekana na obhuhanje bhunú Omutima Omurabhu atuheeri, ndabhakomererya kwa omutima gwani gonsego ega, mwikongʼererye okugwatana na oni okunsabhira ku Waryubha. 31 Munsabhire ega, abhantu bha mukyaro kya Yudea erya, bhanú bhataamwikirirya Yeesu Kiristu, bhatariija okunkorera amabhiibhi.h Kweki munsabhire, naho abheekirirya bha Yerusaremu erya, bheekirirye okugega omusororyo gunu. 32 Mbe, hanú Waryubha arihanja, ndiija kubheenyu hayo kwa obhujomerwa bhukongʼu, naho mbe na eribhaga rya okumuunya hamwi na bheenyu.
33 Waryubha unú arabhahaana omurembe, abhe hamwi na bheenyu bhonsego. Amina.