Mutabhabhuturira ekiina abheekirirya abharikyenyu
14
Mumwikiririrye omwikirirya omurikyenyu unú eimani yaaye etaranaga. Mutahakaananʼya nawe eguru ya ameetegeerero gaaye, nyoore garaahabhane na ageenyu. 2 Omuntu unú anagiri kuimani, ararya ebhintu bhyonsego, nawe, unú ataranaga kuimani, arakanya ega, areekiriribhwa okurya emikubhi egyenego. 3 Omuntu unú ararya ekintu kyokyonse, atamujeera unú ararya emikubhi. Na unú ararya emikubhi, atamubhuturira ekiina unú ararya kyokyonse, kwa okubha Waryubha amwikiriirye kya ego aringi. 4 Uuwe otaana obhutungi bhobhonse bhwa okubhuturira ekiina omugaya wa omuntu oundi. Omukuru waaye ngʼo amanyiri, nyoore omugaya waaye areegumirirya kuimani, kasi atakwigumirirya kuimani. Wonse areegumirirya kwa okubha Omukuru Yeesu, aratura okumukora yeegumirirye.5 Omuntu oundi ararora ega, orusiku nyabhurebhe ruuna obhwera okukira eginsiku egindi, nawe, oundi ararora ega, eginsiku gyonsego giringʼeeni. Mbe, kira oumwi abhe na obhuheene na ganú areekirirya. 6 Omuntu unú ararora ega, orusiku nyabhurebhe n-dujomu okukira eginsiku egindi, arakora ego kwa okubha areenda okumungʼarira Omukuru. Na unú ararya ebhintu bhyonsego, arakora ego, kwa okubha areenda okumungʼarira Omukuru. Atakutura okurya kyokyonse bira okumukumya Waryubha. Na unú ararya omukubhi ogwenego, arakora ego, kwa okubha areenda okumungʼarira Omukuru. Uyo wonse aramukumya Waryubha. 7 Ndagamba ego, kwa okubha atariho omuntu gati yeenyu unú areekara kurusumo rwaye omwene, kora unú arakwa kurusumo rwaye omwene. 8 Eribhaga rinú turingi abhahoru, tureekara kurusumo rwa Omukuru Yeesu. Na eribhaga rinú turakwa, turakwa kurusumo rwa Omukuru Yeesu. Kwa ego, nyoore turingi abhahoru kasi turakwa, bheetu m-bantu bhaaye. 9 Kiristu yaakwa na okuhyuka, naho abhe Omukuru wa abhantu bhonsego, abhaku na abhahoru.a
10 Bhoono, kwaki uuwe orabhuturira ekiina omwikirirya omurikyaho? Na kwaki uuwe wonse orajeera omwikirirya omurikyaho? Bheetu bhonsego turiimirira embere ya ekitumbi kya Waryubha, ekya okubhuturira ekiina. 11 N-kya ego Amangʼoore Amarabhu garagamba ega,
“Maheene Omukuru Waryubha aragamba ega,
kira omuntu aritema ebhiru embere yaani,
na kira omuntu aringungya kwa orurimi rwaye.”b
12 Kwa ego, kira oumwi gati yeetu, ariigambira omwene embere ya Waryubha.
Unú anagiri kuimani atamujimya unú ataranaga kuimani
13 Kwa ego, tutige okubhuturirana ekiina, nawe, twamure okutiga okukora kyokyonse kinú kiraamujimye omwikirirya omurikyetu, kasi okumugwisya akore obhusarya. 14 Kukugwatana na Omukuru Yeesu, niina obhuheene ega, bhitariho ebhyakurya bhyobhyonse ebhikonu.c Nawe, nyoore omuntu ararora ega, ebhyakurya nyabhurebhe m-bikonu, hayo nho ebhyakurya bhiyo, bhirabha ebhikonu kumwene. 15 Kwa ego, nyoore uuwe oraamukore omwikirirya omurikyaho asurumbare bhukongʼu mumutima gwaye, hanú araarore orarya ebhyakurya nyabhurebhe, hayo orabha otakoorokereribhwa na obhuhanje kumurikyaho. Mbe, oteekirirya ega, kwa enjira ya ebhyakurya bhyaho, omuhabhye omuntu unú Kiristu yaakwa kurusumo rwaye! 16 Otakora ekintu kinú uuwe orarora ega, n-kijomu, enu abhandi bharakirora ega, n-kibhiibhi. 17 Amangʼana ga obhukama bhwa Waryubha,d gataringi amangʼana eguru ya okurya kasi okunywa, nawe, m-mangʼana eguru ya okukora obhuheene, okubha na omurembe na okwikara kwa obhujomerwa. Gayo gonsego gararekana na Omutima Omurabhu. 18 Omuntu wowonse unú aramukorera emirimu Kiristu ego, aramungʼarira Waryubha, kweki areekiriribhwa na abhantu.
19 Kwa ego mbe, tukore ekituunyo okukora amangʼana ganú garareeta omurembe, na aga okunaganʼya kuimani. 20 Otasarya emirimu gya Waryubha kwa okurya ebhyakurya bhyobhyonse bhinú oreenda. M-buheene ega, ebhyakurya bhyonsego bhireekiriribhwa okuriibhwa, nawe, m-bubhiibhi okurya ebhyakurya bhyobhyonse bhinú bhiraakore omurikyaho akore obhusarya. 21 Nyakara otige okurya enyama, kasi okunywa edivai,e kasi okukora kyokyonse kinú kiratura okukora omurikyaho akore obhusarya. 22 Bhoono uuwe, kinú oreekirirya eguru ya eringʼana riyo, kibhe gati yaaho na Waryubha waaho. Nyakara omuntu unú atakwibhuturira ekiina, hanú arakora ekintu kinú areekirirya ega, n-kijomu. 23 Nawe, wowonse unú yaana enkubhi eguru ya ebhyakurya bhinú ararya, uyo aribhuturirwa ekiina na Waryubha, kwa okubha weeki areekirirya ega, kinú arakora n-kibhiibhi embere ya Waryubha. Hanú omuntu arakora kyokyonse kinú atakwikirirya ega, n-kijomu, hayo, arakora obhusarya.