Eginonkwe gya okumwikirirya Waryubha
5
Mbe, Waryubha atubhariri okubha abhaheene embere yaaye, okurekana na eimani yeetu. Kwa ego, tuuna omurembe na Waryubha kwa okuhitira ku Mukuru weetu Yeesu Kiristu. 2 Kwa enjira ya okumwikirirya Yeesu, Waryubha atuheeri eriruguto ryaye, rinú turingi-mo. Turajomerwa bhukongʼu, kwa okubha tureesiga ega, turisanga hamwi na Waryubha mubhukuru bhwaye. 3 Tutakujomerwa kwa gayo ageenego, nawe, turajomerwa kora kuginyanko gyonsego, kwa okubha tumanyiri ega, eginyanko girareeta obhwigumirirya. 4 Obhwigumirirya bhurakora turanaga mumitima gyetu, na okunaga mumitima kurakora turabha na obhwisige. 5 Obhwisige bhuyo, bhutakutura okukora turore eginsoni, kwa okubha Waryubha atuhumiriiri obhuhanje bhwaye mumitima gyetu, okuhitira Omutima waaye Omurabhu.6 Mbe, hanú bheetu twaringa tukyari abhanyooheeru, Kiristu yaaja akatukwira bheetu abhasarya, hanú ryahika eribhaga rinú Waryubha yaaringa aseemerye. 7 Maheene m-bukongʼu kumuntu wowonse okwiruusya okukwa, kurusumo rwa omuntu omuheene. Nawe, hamwi omuntu ariko okwiruusya okukwa, kurusumo rwa omuntu omujomu. 8 Nawe, Waryubha yaatoorokya ega, atuhanjiri bhukongʼu, kwa okubha hanú bheetu twaringa tukyari abhakori bha obhusarya, Kiristu yaakwa kurusumo rwetu.
9 Mbe, nyoore tubharirwe okubha abhaheene embere ya Waryubha, kwa enjira ya okwitika kwa amanyinga ga Yeesu Kiristu, maheene turituuribhwa okurwa kubhujibhu bhwa Waryubha okuhitira ku Yeesu. 10 Hanú bheetu twaringa tukyari abhasigu bhaaye, Waryubha yaatugwatanʼya nawe, okuhitira oruku rwa Omwana waaye. Kwa ego, ekinene niiga, kwa okubha twamara okugwatanibhwa nawe, okuhitira oruku rwa Omwana waaye, turituuribhwa okurwa kubhujibhu bhwa Waryubha okuhitira obhuhoru bhwa Omwana waaye. 11 Kora gataringi gayo ageenego, nawe, kora turatura okujomererwa obhumwi bhwetu obhuhya na Waryubha, kwa okubha nu-kuhitira ku Mukuru weetu Yeesu Kiristu, tugwataniibhwe na Waryubha.
Adamu yaatureetera oruku, nawe, Yeesu atuheeri obhuhoru
12 Okuhitira kumuntu oumwi, obhusarya bhwasoha mukyaro, bhukareeta oruku. Okurekana na obhusarya bhuyo, abhantu bhonsego bharakwa, kwa okubha bhonsego m-bakori bha obhusarya. 13 Obhusarya bhwakangata okusoha mukyaro, eribhaga amaragiriryo gatarabha-ho. Nawe, Waryubha ataabhara abhantu ega, m-basarya bha amaragiriryo, kwa okubha amaragiriryo gataaringa-ho. 14 Mbe, okurwa kwibhaga rinú Adamu yaakora obhusarya, okuhikira kwibhaga rinú Musa yaahaanwa amaragiriryo, oruku rwaringa ruratunga abhantu, kora nyoore bhataakora obhusarya kya obhwa Adamu.
Mbe, Adamu yaaringa ekirengekanʼyo kya Yeesu Kiristu, unú akaajiri eribhaga erindi. 15 Nawe, obhusarya bhwa Adamu, bhutakuringʼaana na eriruguto rya Waryubha. Obhusarya bhwa omuntu oumwi uyo, bhwakora abhantu bhonsego bhakwe okurekana na obhusarya bhwaye. Nawe, ariho oumwi oundi, Yeesu Kiristu, unú arabhahaana abhantu abhaaru omutuho gwa eriruguto rya Waryubha. Eriruguto rya Waryubha riyo, ritaana endengo, rirakira obhusarya bhwa Adamu bhukongʼu! 16 Omutuho gwa eriruguto rya Waryubha riyo, gutakuringʼaana na ganú geebhuka okurekana na obhusarya bhunú Adamu yaakora. Okurekana na obhusarya bhwa omuntu oumwi uyo, Waryubha yaabhuturira ekiina abhantu. Nawe, hanú obhusarya obhwaru bhurakorwa na abhantu, Waryubha arabhara abhantu okubha abhaheene embere yaaye, okurekana na eriruguto ryaye. 17 Obhusarya bhwa omuntu oumwi uyo Adamu, bhwakora oruku rutunge abhantu bhonsego. Nawe bhoono, abhantu bhonsego bhanú bharanyoora eriruguto rya Waryubha rinú ritaana endengo, bharabharwa okubha abhaheene embere yaaye. Bhayo bharitunga mubhuhoru bhwa koko, okuhitira kumuntu oumwi oundi, Yeesu Kiristu.
18 Kwa ego, abhantu bhonsego bhaabhuturirwa ekiina okurekana na obhusarya bhwa omuntu oumwi, egoego abhantu bhonsego bharabharwa okubha abhaheene embere ya Waryubha na okuhaanwa obhuhoru bhwa koko, okurekana na obhuheene bhwa omuntu oumwi. 19 Omuntu oumwi yaanga okumwigwa Waryubha, akakora abhantu bhonsego bhakabha abhakori bha obhusarya. Egoego, omuntu oumwi unú yaamwigwa Waryubha, arikora abhantu bhabhe abhaheene embere ya Waryubha.
20 Hanú amaragiriryo ga Musa gaaja, gakakora obhusarya bhwaruhe. Na hanú obhusarya bhwaaruha bhukongʼu, eriruguto rya Waryubha ryonse rikaaruha bhukongʼu. 21 Mbe, obhusarya bhwaringa na eginguru gya okutunga abhantu, na okubhareetera oruku. Egoego, eriruguto riratunga abhantu na okubhabharira okubha abha obhuheene. Rirahaana abhantu obhuhoru bhwa koko, okuhitira ku Mukuru weetu Yeesu Kiristu.