Orugendo rwa Pauro mubhyaro bhya Makedonia na Bhugiriki
20
Hanú eriihe rya Efeso hayo ryahwa, Pauro akabhirikira abheekirirya bha hayo, akabhateremya. Kimwi akabharaga, akeemuka okugya mukyaro kya Makedonia. 2 Yaahitanga mukyaro kiyo, arakeerya abheekirirya amangʼana amaaru ga okubhateremya. Kubhuteero akahika mukyaro kya Bhugiriki, 3 akamara-yo emyeri esatu.Hanú yaaringa haangʼi okuhunjuka mukyaro kya Siria, kwa obhwato, akanyoora amangʼana ega, Abhayahudi bhagambeeni okumukorera amabhiibhi. Kwa ego, akaamura okuhunjuka kwa okuhitira kunjira ya Makedonia. 4 Kwibhaga riyo, Pauro yaasoorananga na Sopateri omwana wa Piiro, wa mumugi gwa Bheroya, Aristariko na Sekundo abhantu bha mumugi gwa Tesaronike, Gayo, omuntu wa mumugi gwa Deribhe, Timoteo, na abhantu abhabhiri bha Asia, Tukiko na Turofimo. 5 Abhantu bhayo, bhakatukangatira bhakagya okutuganyirira mumugi gwa Turoa. 6 Hanú enyangi ya emikaate ginú gitakutuurwa-mo ekimera yaahwa, tukarwa mumugi gwa Firipi kwa obhwato. Tukagya orugendo rwa eginsiku etaanu nho tukahika Turoa. Hanú twahika eyo, tukasikana na abharikyetu bhayo. Tukeekara hayo, eginsiku muhungati.
Pauro aramuhyukya Yutiko
7 Orusiku rwa okwamba rwa obhutuuro, tukeekumanʼya hamwi, naho tusuunure omukaate. Nho Pauro akaamba okwihigirya abhantu, kwa okubha yaaringa areemuka ejo wendeko, akagendererya okwihigirya okuhikira mubhutiku gati. 8 Mukinyumba kinú twaringa twikumeenʼye, egikorobhoi eginjaru gyookanga-mo. Ekinyumba kiyo, kyaringa kihagaajirwe eguru ya eginyumba ginú giikarireeni.
9 Mukisyeri kya ekinyumba kiyo, yaaringa yeekeeri-ho omumura umwi unú yaabhirikirwanga Yutiko. Omumura uyo akaamba okusundagira okuhikira akeehiribhwa, kwa okubha Pauro yaagendererya okwihigirya kwa eribhaga eritambi. Hanú yeehiribhwa, akahitira mukisyeri kiyo, okurwa mukinyumba kya kasatu, akagwa hansi. Mbe, hanú abhantu bhaaja okumwimukya, bhakanyoora amariri okukwa. 10 Pauro wonse akeeka hansi, akeebhumbika eguru ya omumura uyo, akamuhumbata, akakeerya abhantu bhayo ega, “Mutoobhoha! Akyari omuhoru!” 11 Kimwi Pauro akariina kweki mukinyumba kiyo, akasuunura omukaate, akarya. Akagendererya okwihigirya okuhikira bhukakya, nho akeemuka. 12 Abhantu bhayo, bhakamugega omumura urya, bhakamuhira iika omuhoru, bhakajomerwa bhukongʼu.
Orugendo rwa Pauro okurwa Turoa okugya Mireto
13 Pauro akagya mumugi gwa Asosi kwa amaguru, kya ego yaaringa yaamwiri. Bheetu tukariina mubhwato tukakangata okugya-yo, naho tusikane nawe eyo. 14 Akatunyoora eyo, tukamupakira mubhwato tukagya hamwi mumugi gwa Miturene. 15 Ejo wendeko, tukagendererya na obhwato bhuyo, tukahita embarika wa eriginga rinú ryabhirikirwanga, Kio. Hanú bhwakya, tukahika kwiginga erindi rinú ryabhirikirwa Samo, tukeekara mumugi gwa Turogirio. Ejo wendeko, tukahika mumugi gwa Mireto. 16 Pauro yaaringa yaamwiri okugendererya na orugendo bira okuhitira mumugi gwa Efeso, naho ataaja okutigita mukyaro kya Asia. Yaaringa areenda okwanguha mumugi gwa Yerusaremu, orusiku rwa enyangi ya Epentekosite rutarahika, nyoore ekaaturikeeni.
Pauro araragana na abhakangati bha erikanisa
17 Pauro hanú yaahika Mireto, akatuma amangʼana mumugi gwa Efeso, okubhabhirikira abhakangati bha erikanisa bhaaje bhamaahane nawe. 18 Hanú bhaaja, akabhakeerya ega, “Bheenyu abheene mumanyiri kya ego neekarana na bheenyu, okurwa orusiku runú naahika mukyaro kya Asia hanu. 19 Naamukoreranga emirimu Omukuru Yeesu kwa obhwisuuhya obhwaru na kwa ameesori. Naaringa ndeekongʼererya enyanko na okuhakaanibhwa kunú kwannyooranga, okurekana na ekisorooro kya Abhayahudi. 20 Mumanyiri ega, ntaatiga okubharaarikira eringʼana ryoryonse, rinú rikaabhabheereri bheenyu. Nkyo kyakora naaringa ndabheehigirirya kurwangari na nyumba kwa nyumba. 21 Naaringa ndabhakeerya Abhayahudi hamwi na Abhayunani ega, bhamwihunjurire Waryubha okurwa mubhusarya bhwabho na bhamwikirirye Omukuru weetu Yeesu Kiristu.
22 “Bhoono, oni nkomereriibhwe na Omutima Omurabhu ega, ngye mumugi gwa Yerusaremu. Kwa ego naagya, onyoora ntamanyiri kinú kirinnyoora eyo. 23 Nawe, kinú mmanyiri niiga, mumigi gyonsego ginú naahitanga, Omutima Omurabhu yaanyorokyanga ega, ebhibhohe na enyanko bhiranganya. 24 Kora nkaakwa, kitari ekintu kuoni, naho ndeenda mmare emirimu ginú Omukuru Yeesu yaangʼaana ngikore. Emirimu giyo, n-gya okuraarikira abhantu Amangʼana Amajomu ga eriruguto rya Waryubha.
25 “Nawe bhoono, mmanyiri ega, bheenyu bhonsego, bhanú naaraarikira obhukama bhwa Waryubha, mutakyandora kweki. 26 Kwa ego, ndabhakeerya reero inu ega, nyoore oumwi weenyu ariibhura, amanyinga gaaye, gatarindumbira oni, 27 kwa okubha kira rinú Waryubha yeendanga mumanye, naaringa ndabhakeerya bira okoobhoha. 28 Omutima Omurabhu abhakoreri bheenyu, okubha abhaangarariri bha abheekirirya bha Waryubha. Kwa ego, mwiyangararire, na mubhe muraangararira abheekirirya bhaaye, kwa okubha, Yeesu omwene yeetira amanyinga gaaye, okubhatuurya abheekirirya bhayo.
29 “Mmanyiri ega, hanú ndaarwe-ho, abheehigirya bha obhubheehi bharaaseete erikanisa. Bharaaseete kya eginsuuji eginhaari, mumuganda gwa amangʼondi na bhataabhire abheekirirya. 30 Kora okurwa gati yeenyu abheene, bhareebhuke abhantu bhanú bharihabhya obhuheene, naho bharute abheekirirya bhabhasoorane. 31 Kwa ego, mwangararire! Mubhe murahiituka ekirengyo ega, kwa eribhaga rya emyaka esatu, obhutiku na omubhasu ntaatiga okumutongera kira oumwi weenyu, kwa ameesori.
32 “Bhoono mbe, ndabhatuura mumabhoko ga Waryubha na eringʼana rya eriruguto ryaye. Weeki yaana obhuturo bhwa okubheemya na okubhakora munyoore eriruguto rinú yaabhatuurira abhantu bhaaye bhanú bhaaraamwa.
33 “Oni ntaaringa omunamba wa egimbirya kasi egijahaabhu kora omwenda gwa omuntu wowonse. 34 Bheenyu abheene mumanyiri ega, naakoranga emirimu kwa amabhoko gaani omwene, naho okunyoora bhinú neendanga na ebhya abharikyani. 35 Kira eringʼana rinú naakoranga, naabhoorokya ega, kwa enjira ya okukora emirimu kwa ekituunyo, tureenderwa okubhabheera bhanú bhataana obhuturo. Mubhenga murahiituka amangʼana ganú Omukuru Yeesu omwene yaagamba ega, ‘Nyakara okuruusya, kutakuringʼaana okuhaanwa.’”
36 Pauro hanú yaamara okugamba amangʼana gayo, akatema hansi ebhiru hamwi na bhayo bhonsego, akamusabha Waryubha. 37 Kimwi bhonsego, bhakakuura bhukongʼu, bhakamuhumbata na okumubhusu. 38 Eringʼana rinú ryakora bhaasurumbare bhukongʼu, n-dirya yaaringa abhakeererye ega, bhatakyamurora kweki. Mbe, bhakamuheregesya, bhakamuhikya kubhwato bhurya.