Pauro mumugi gwa Efeso
19
Apooro hanú yaaringa mumugi gwa Korinto, Pauro akabha arahitira mumigi gya munkuku, akahiringitira mumugi gwa Efeso. Eyo, akasikana na abheekirirya bha Yeesu abhandi, 2 akabhabhuurya ega, “Hanú mwamwikirirya Yeesu, mwanyoora na Omutima Omurabhu?” Bhakamukyukya ega, “Tiigo-ha, kora tutaakeegwiri ega, Omutima Omurabhu ariho.” 3 Nho, Pauro akabhabhuurya ega, “Mwabhatiijwa kwa obhubhatiijo-ki?” Bhakamukyukya ega, “Kwa obhubhatiijo bhunú Yoana yeehigiryanga.”4 Pauro akagamba ega, “Yoana yaaringa arabhatiija abhantu bhanú bhaamwihunjuriranga Waryubha, akabha arabhakeerya ega, bhariija okumwikirirya unú ariija enyuma waaye, na uyo ngʼo Yeesu.” 5 Hanú bheegwa amangʼana gayo, bhakabhatiijwa kwa eriina rya Omukuru Yeesu. 6 Pauro hanú yaabhatuurira amabhoko gaaye eguru yaabho, rumwigo Omutima Omurabhu akabheetuumira, bhakaamba okugamba kwa ebhigambo ebhindi, enu bhararuusya obhurooti. 7 Abhantu bhayo, erisaabhu ryabho ryaringa muna abhasaaja ekumi na bhabhiri.
8 Kwa eribhaga rya emyeri esatu, Pauro yaagyanga mwisinagogi, akabha arahaira kwa obhuteremu, amangʼana ga okuruta abhantu eguru ya obhukama bhwa Waryubha, naho bhamwikirirye. 9 Nawe, abhandi bhakakora emitima gyabho emikongʼu. Bhakabha bharaanga okwikirirya amangʼana eguru ya Yeesu, bhakaamba okugajabhura embere ya omuganda gwa abhantu. Bhoono, Pauro akatigana nabho, akaahura abheekirirya, akabha arahaira nabho hamwi na abhantu abhandi mwidarasa rya Tirano. 10 Pauro akamara muyo, emyaka ebhiri areehigirya eguru ya Yeesu, okuhikira abhamenyi bhonsego bha mukyaro kya Asia, Abhayahudi na abhantu bhanú bhataringi Abhayahudi, bhakabha bheegwiri eringʼana eguru ya Omukuru Yeesu.
Abhaana bha Sikeewa bharasakya//okukenyia ekihwi ekibhiibhi
11 Waryubha yaakora ebhika bhya okuruguurya kwa okuhitira amabhoko ga Pauro. 12 Kora ebhitambaara na emyenda, ginú gyarwanga kumubhiri gwa Pauro, hanú gyahirwanga kubharweri, bhaahwenanga amarweri gaabho, na ebhihwi ebhibhiibhi bhyabharwanga-ko.
13 Bhaaringa-ho Abhayahudi abhandi bhanú bhaagyanga eyo na eyo, bharakenyia ebhihwi ebhibhiibhi, okurwa kubhantu. Bhakabha bharasakya okukeerya ebhihwi ebhibhiibhi kwa okutumira eriina rya Omukuru Yeesu, bhaagambanga ega, “Kwa eriina rya Yeesu, unú Pauro araraarika, ndabhakeerya ega, murwe kumuntu unu!” 14 Gati ya bhanú bhaaringa bharakora ego, bhaaringa abhaana muhungati na Omuyahudi oumwi Sikeewa. Weeki yaaringa omusyengeri omukuru. 15 Nawe, ekihwi ekibhiibhi kikabhakyukya ega, “Yeesu mmumanyiri, na Pauro wonse mmumanyiri. Bhoono bheenyu m-bawi?” 16 Rumwigo, omuntu unú yaaringa na ekihwi ekibhiibhi akabheebhururukira, akabharwanʼya akabhahiga eginguru bhonsego. Bhakahuruka okurwa munyumba bharakenya, bharingi kinaabhi enu bhamantukiri.
17 Amangʼana gayo, gakamanyikana bhukongʼu ku Bhayahudi bhonsego abhamenyi bha mumugi gwa Efeso na bhanú bhataringi Abhayahudi. Bhayo bhonsego bhakagwatwa na obhoobha, bhakabha bharamugungya bhukongʼu Omukuru Yeesu. 18 Mbe, abhantu abhaaru gati ya bhanú bhaamwikirirya Yeesu, bhaaja bhakamwihunjurira Waryubha enu bharagamba embere ya abhantu, amakorwa gaabho amabhiibhi ganú bhaakoranga. 19 Erisaabhu erinene rya bharya bhaakoranga amangʼana ga obhukumu, bhakareeta ebhitabho bhyabho na okubhisamba mumururo embere ya abhantu bhonsego. Hanú bhaakora erisaabhu rya obhwera bhwa ebhitabho bhinú bhasikirye, gyaringa egimbirya eginjaru bhukongʼu, kya ebhiku mirongo etaanu.a 20 Ego niigo eringʼana eguru ya Omukuru Yeesu, ryaringa riranyaragana, na okubha na eginguru.
21 Amangʼana gayo hanú gaahwa, Pauro akaamura okugya mumugi gwa Yerusaremu, kwa okuhitira mubhyaro bhya Makedonia na Akaya. Yaagamba ega, “Hanú ndihika eyo, ndyenderwa okuhika na mumugi gwa Ruumi.” 22 Kwa ego, gati ya abhabheeri bhaaye akatuma Timoteo na Erasito, bhagye Makedonia. Weeki omwene, akatama kwa eribhaga, mukyaro kya Asia.
Eriihe rireebhuka mumugi gwa Efeso
23 Kuginsiku giyo, eriihe erinene rikeebhuka mumugi gwa Efeso, eguru ya abheekirirya bha Omukuru Yeesu. 24 Eriihe riyo, ryeebhukibhwa na omuturi wa egimbirya oumwi. Omuturi uyo, yaabhirikirwanga Demetirio. Weeki yaaringa na emirimu gya okukora ebhisusano bhya erisyengerero rya omukuru waabho wa ekikari, unú yaabhirikirwanga Artemi. Emirimu giyo, gyabhahaananga abhaturi abharikyaye obhwera obhunene.
25 Orusiku rumwi, Demetirio akakumanʼya hamwi, abhaturi abharikyaye na abhandi bhanú bhaakoranga emirimu giyo. Kimwi akabhakeerya ega, “Bheenyu abhasaaja, mumanyiri ega, obhuniibhi bhwetu, bhurarekana na emirimu ginu. 26 Nawe bhoono, bheenyu abheene murarora na okwigwa kya ego Pauro uyo, yaamariri okuruta na okukaanʼya abhantu abhaaru bha Efeso hanu, hamwi na abhantu bha mbaara gyonsego bha ekyaro kya Asia. Aragamba ega, abhakuru bhanú bharakorwa na abhantu, bhataringi Waryubha wa obhuheene. 27 Kwa ego, ndoobhoha ega, emirimu gyetu ginu girijeerwa bhukongʼu. Erisyengerero rya omukuru weetu Artemi, ryonse ririmaahikana ega, ritari ekintu. Na omukuru weetu Artemi, unú arasyengerwanga Asia yonsego na ekyaro kyonsego, ariruusibhwa obhukuru bhwaye.”
28 Hanú bheegwa amangʼana ga Demetirio gayo, bhakajima bhukongʼu. Bhakaamba okutema ekituri ega, “Artemi wa Abhaefeso ngʼo omukuru!” 29 Kimwi, omugi gonsego gwa Efeso gukabha na eriihe. Bhakabhagwata Gayo na Aristariko, abhantu bha Makedonia bhanú bhaaringa bharagya orugendo hamwi na Pauro, bhakagya nabho kurubhanja rwa emihooyo. 30 Pauro yeenda okusoha gati ya omuganda gwa abhantu, nawe abheekirirya bhataamwikiririrya. 31 Kora abhatungi abhandi bha Asia erya, bhanú bhaaringa abhasaani bha Pauro, bhaamutumira abhantu, bharamukomererya ega, atasoha murubhanja ruyo.
32 Eribhaga riyo, kira omuntu yaaringa arabhambuka bhwaye, abhandi rinu na abhandi rirya, okuhikira ekiikaro kirya kikanyaragana. Abhaaru bhataamanya ekisigo kinú kyakora bhakeekumanʼya. 33 Abhayahudi bhakamwimirirya Arekisaanda embere ya abhantu bhayo, bhakamoorokererya amangʼana ga okugamba. Arekisaanda akabhanungira amabhoko, abhantu bhayo bhonsego ega, bhakire, kwa okubha yaaringa areenda okwibhagirira embere yaabho. 34 Nawe, hanú bhaamanya ega, m-Muyahudi, bhonsego bhakakora ekituri kwa eriisi rimwi, kwa eribhaga rya ensa ebhiri, bharagamba ega, “Artemi wa Abhaefeso ngʼo omukuru!”
35 Kubhuteero omungʼoori omukuru wa omugi guyo, akabhateremya abhantu bhayo. Akabhakeerya ega, “Bheenyu abhasaaja bha mumugi gwa Efeso, niwi atamanyiri ega, omugi gunu ngo guraangararira erisyengerero rya omukuru weetu Artemi, hamwi na ekisusano kyaye kinú kyeetuuma okurwa murwire? 36 Mbe, kwa okubha atariho omuntu unú aratura okwanga amangʼana ganu, mutereme, mutakora ekintu kyokyonse kwa okwanguhiirirya. 37 Mubhareeteri abhantu bhanu hanu, onyoora bhateebha ebhintu bhya mwisyengerero rya omukuru weetu. Kora na omukuru weetu bhataamujabhura. 38 Mbe, nyoore Demetirio na abhaturi abharikyaye bhaana eringʼana eguru ya omuntu wowonse, eribharaja ririho, na abhaanangwa bhariho. Bharatura okuhira amakeesi gaabho eyo. 39 Nawe, nyoore muuna eringʼana erindi ryoryonse rinú mureenda okurireeta, murihire mubhiikaro bhinú bhireekiriribhwa na amaragiriryo geetu. 40 Eriihe rinú twibhukirye reero, riratura okukora tujongerwe, kwa okubha ritaana obhwera. Na tutaana ekisigo kya eriihe rinu.” 41 Omungʼoori uyo, hanú yaamara okugamba amangʼana gayo, akanyaraganʼya ekiikaro.