Obhutungi bhwa Yeesu bhureekomibhwa
20
Orusiku rumwi, Yeesu yaaringa murubhanja rwa erisyengerero erikuru rya Waryubha areehigirya abhantu, na okubharaarikira Amangʼana Amajomu ga Waryubha. Abhasyengeri abhakuru, abheehigirya bha amaragiriryo hamwi na abhakaruka bha Ekiyahudi bhakamuujira. 2 Bhakamubhuurya ega, “Tukeerye! Amangʼana ganú orakora, oragakora kwa obhutungi bhwawi? Niwi unú akuheeri obhutungi bhuyo?”3 Yeesu akabhakeerya ega, “Oni nonse ndabhabhuurya eringʼana rimwi ego. 4 Bhoono, obhutungi bhwa Yoana obhwa okubhatiija abhantu, bhwarwa-ha? Bhwarwa ku Waryubha kasi kubhantu?” 5 Hayo, bhakaamba okubhuuranʼya abheene ega, “Turaagambe ega, bhwarwa ku Waryubha, araagambe ega, ‘Bhoono ndeegwa, mutaamwikirirya?’ 6 Na turaagambe ega, bhwarwa kubhantu, abhantu bhonsego bhanú bharingi hanu, bhaakatuteme na amagina, kwa okubha bhareekirirya ega, Yoana yaaringa omurooti wa Waryubha.” 7 Ego, bhakamukeerya ega, “Tutamanyiri.” 8 Mbe, Yeesu akabhakyukya ega, “Kora oni nonse, ntaabhakeerye ndakora ganu kwa obhutungi bhwawi.”
Yeesu arahunkanʼya abhatungi na abharimi abhasarya
9 Nho, Yeesu akagendererya okukeerya abhantu ekirengyo ekindi ega, “Yaaringa-ho omuntu umwi. Omuntu uyo, yaahamba emijabhibhu mumugunda gwaye, akagukodisya kubharimi abhandi. Kimwi, akagya orugendo mukyaro kya hare, akamara-yo eribhaga eritambi. 10 Eribhaga rya okugesa hanú ryahika, akamutuma omukori wa emirimu waaye kubharimi bhayo, naho bhamugabhire-ko omugabho gwaye gwa egijabhibhu. Nawe, abharimi bhayo, bhakamutema omukori wa emirimu uyo, kimwi bhakamukenyia amabhoko masa.
11 “Kweki, omwene omugunda uyo, akamutuma omukori wa emirimu waaye oundi. Wonse bhakamutema na okumusuukya, kimwi bhakamukenyia amabhoko masa. 12 Kweki, akamutuma omukori wa emirimu wa kasatu. Uyo wonse bhakamutema, bhakamunyahaara bhukongʼu, bhakamurekera kibhara wa omugunda.
13 “Mbe, omwene omugunda uyo, akeeganirirya ega, ‘Bhoono nkore egaki? Tiga mmutume omwana waani omuhanje! Ndamanya ega, bharaamusuuke.’ 14 Nawe, abharimi bhayo, hanú bhaamurora, bhakabhuuranʼya ega, ‘Unu ngʼo arigabha omugunda gunu. Tumwite, engabho yaaye inu ebhe yeetu.’ 15 Mbe, bhakamuruusya mumugunda, bhakamwita.”
Kimwi, Yeesu akabhabhuurya ega, “Bhoono, omwene omugunda uyo, hanú ariija, aribhakora egaki abharimi bhayo? 16 Ariija abheete bhonsego, amare agukodisye kubharimi abhandi!” Abhantu bhanú bheegwa amangʼana gayo, bhakagamba ega, “Gayo gatatuuka koko!” 17 Kimwi, Yeesu akabhamaahirira, akabhabhuurya ega, “Mbe, ensonga ya amangʼoore ganu niki?
‘Erigina rinú abhahagaaji bhaangiri,
ndyo ryabheeri erigina erikuru rya obhurusa.’a
18 Omuntu wowonse unú arigwa kwigina riyo, aribhunikabhunika, na omuntu wowonse unú erigina riyo ririmugwira, ririmubhondorabhondora.”b
19 Abheehigirya bha amaragiriryo na abhasyengeri abhakuru, bhakamanya ega, ekirengyo kiyo kirabhatunʼya bheeki. Ego, bhakeenda okumugwata hayohayo, nawe bhakoobhoha abhantu.
Abhantu bharamuteganʼya Yeesu eguru ya//obhurihi bhwa erigooti
20 Kwa ego, abhakuru bhayo, bhakabha bharamuteganʼya Yeesu bhamugwate. Mbe, bhakatuma abhantu bhagye okumwinogorya. Abhantu bhayo, bhakeekorya ega, m-bantu abhaheene. Nawe, bheendanga omweya gwa okumugwata Yeesu kwa amangʼana gaaye, naho bhagye okumujongera kumwanangwa wa Ekiruumi.
21 Mbe, abhantu bhayo bhakamubhuurya ega, “Omwihigirya, tumanyiri ega, oragamba na okwihigirya amangʼana ga obhuheene. Uuwe otakwahura abhantu, oreehigirya obhuheene eguru ya amangʼana ga Waryubha. 22 Bhoono tukeerye, okuringʼaana na amaragiriryo ga Waryubha, tureekiriribhwa okumuruusirya Kaisaric erigooti, kasi-ha?” 23 Nawe, Yeesu akamanya ekiina kyabho, akabhakeerya ega, 24 “Munyorokye edinari.d Epicha inu na amangʼoore ganú gangʼoorerwe kudinari inu, m-byawi?” Bhakamukyukya ega, “M-bya Kaisari.” 25 Kimwi Yeesu akabhakeerya ega, “Mumuhaane Kaisari ebhya Kaisari, na mumuhaane Waryubha ebhya Waryubha.”
26 Erikyukya rya Yeesu riyo, rikabharuguurya bhukongʼu, bhakakira kiri. Bhataanyoora eringʼana ryoryonse rinú rikaakoreri bhamugwate okurwa kumangʼana ganú yaagamba embere ya abhantu.
Yeesu arakyukya amabhuuryo eguru ya obhuhyuki
27 Mbe, bhaaringa-ho abhantu abhandi bhanú bhaabhirikirwanga Abhasadukaayo.e Bhayo bhaagambanga ega, obhuhyuki bhwa abhaku bhutariho. Bhakamuujira Yeesu, bhakamubhuurya ega, 28 “Omwihigirya, Musaf yaatungʼoorera mumaragiriryo ega, nyoore omuntu araakwe, akyari okwibhura na omukari waaye, omumura waabho omuke amugabhe omusino uyo, amwibhurire abhaana.g 29 Bhoono tugambe ega, bhaaringa-ho abhamura muhungati bha enda eimwi. Mbe, omutangi akateta omukari, kimwi omutangi uyo, akakwa ateebhwiri nawe. 30 Omumura waabho wa kabhiri, [akamugabha omusino uyo, wonse akakwa ateebhwiri nawe.]h 31 Eribhaga erindi, wa kasatu akamugabha, wonse akakwa ateebhwiri. Ekabha egoego kubhonsego muhungati, bhakamugabha omukari uyo, bhakakwa bhonsego bhateebhwiri nawe. 32 Kubhuteero, omukari uyo, wonse akakwa. 33 Mbe bhoono, nyoore obhuhyuki bhuriho, orusiku runú abhaku bharihyukibhwa, omukari uyo aribha mukaawi? Kwa okubha yaaringa omukari wa bharya muhungati bhonsego, tiigo!”
34 Yeesu akabhakeerya ega, “Abhantu bha eribhaga rinu bharateta na okutetwa. 35 Nawe, bhanú Waryubha aruuji bhareenderwa okuhyukibhwa okurwa mubhaku na okumenya mukyaro ekihya, bhayo bhatariteta kora okutetwa 36 na bhatarikwa kweki. Bharibha abhahoru kya bhamaraika,i na bharibha m-baana bha Waryubha, kwa okubha bharihyukibhwa okurwa mubhaku.
37 “Kora Musa yaangʼoora ega, abhaku bharihyuka. Hanú yaahairanga na Waryubha, kukisaka kinú kyookanga omururo, yaagamba ega, Omukuru Waryubha ‘ngʼo Waryubha wa Abhurahamu, Esaaka, na Yakobho’.j 38 Ku Waryubha bhonsego abhaku na abhahoru, m-bahoru. Kwa ego, weeki ataringi Waryubha wa abhaku, ngʼo wa abhahoru.”
39 Mbe, abheehigirya bha amaragiriryo abhandi bhakagamba ega, “Omwihigirya, okyukirye bhwaheene!” 40 Okwambira eribhaga riyo, bhataasakya kweki okumubhuurya amangʼana agandi.
Kiristu Omutuurya ngʼo omuhiiri Daudi//na Omukuru wa bhonsego
41 Kimwi, Yeesu akabhabhuurya abhantu bhanú bhaaringa hayo ega, “Kwaki abhantu bharagamba ega, Kiristu Omutuurya m-muhiiri Daudi? 42 Nawe, Daudi omwene, yaangʼoora mukitabho kya Egijabhuri ega,
‘Omukuru Waryubha yaamukeerya Omukuru waanik ega,
“Ikara orubhaara rwani rwa obhuryo,
43 okuhikira hanú ndituura abhasigu bhaaho hansi ya amaguru gaaho,
bhabhe kya ekitumbi kyaho kya okutaja-ko amaguru.”’l
44 Bhoono, nyoore Daudi aramubhirikira Kiristu ega, ‘Omukuru,’ Kiristu aratura egaki kweki okubha omuhiiri waaye?”m
Yeesu arakaanʼya abheehigira bhaaye
45 Eribhaga omuganda gwa abhantu bhaaringa bharamwitegeerera, Yeesu akakeerya abheehigira bhaaye ega, 46 “Mwiyangararire na abheehigirya bha amaragiriryo. Bheeki bhahanjiri okugenda bheebhoheri eginkanju egintambi. Bhahanjiri okukeeranibhwa kwa okusuukwa mumidiira, bhahanjiri okwikara kubhitumbi bhya embere mumasinagogi, na muginyangi bhahanjiri okwikara kubhitumbi ebhya embere ebhya abhasuukwa. 47 Bharabharuusya abhasino eginyumba gyabho. Kweki bhareekorya ega, m-bantu bhanú bhataana amasoro kwa okusabha amasabho amatambi embere ya abhantu. Kurusiku rwa okubhuturirwa ekiina, abhantu bhayo bharijibhibhwa bhururu bhukongʼu.”