Yeesu arahunkanʼya abhatungi na abharimi abhasarya
12
Yeesu akaamba okuhaira na abhatungi bha Ekiyahudi kwa ebhirengyo ega, “Yaaringa-ho omuntu oumwi. Omuntu uyo, yaahamba emijabhibhu mumugunda gwaye. Akagugitira orubhago, akasimba-mo erituko rya okumitira-mo egijabhibhu. Akahagaaja-mo obhutara obhutambi bhwa okurindira-ko. Akamara akabhakodisirya abharimi nyabhurebhe omugunda guyo, akagya orugendo. 2 Hanú eribhaga rya okugesa ryahika, akamutuma oumwi wa abhakori bha emirimu bhaaye, kubharimi bharya, naho agende amugegere omugabho gwaye gwa egijabhibhu. 3 Nawe, hanú omukori wa emirimu urya yaahika mumugunda murya, abharimi bharya, bhakamugwata bhakamutema na bhakamuhunjukya amabhoko masa. 4 Kweki omwene omugunda uyo, akamutuma omukori wa emirimu oundi, kubharimi bharya. Uyo wonse, bhakamutema bhukongʼu bhakamwatya eginguma kumutwe, bhakamunyahaara bhubhiibhi. 5 Kweki akamutuma omukori wa emirimu oundi, uyo weeki abharimi bharya bhakamwita. Yaabhatuma abhakori bha emirimu bhaaye abhandi abhaaru. Abharimi bharya bhakabhatema, na abhandi bhakabheeta. 6 Akabha atamiri na oumwi wa okumutuma, omwana waaye omuhanje. Kubhuteero akamutuma uyo wonse, kubharimi bharya, akeeganirirya ega, ‘Unu m-mwana waani, weeki bharaamusuuke.’7 “Nawe, hanú uyo wonse yaahika, abharimi bharya bhakagambana ega, ‘Unu ngʼo omugabhi wa omugunda gunu. Bhoono, tumwite, engabho yaaye inu ebhe yeetu.’ 8 Mbe, bhakamugwata, bhakamwita, bhakamuruusya mumugunda murya.
9 “Mbe bhoono, omwene omugunda uyo araakore egaki? Hanú ariija, aribheeta abharimi bharya, na omugunda guyo, arikodisirya abhantu abhandi. 10 Bhoono, mutarasoma Amangʼoore Amarabhu ganú garagamba ega,
‘Erigina rinú abhahagaaji bhaangiri,
ndyo ryabheeri erigina erikuru rya obhurusa.
11 Omukuru Waryubha ngʼo akoreri eringʼana riyo,
ryonse n-kiruguuro kubheetu.’ a”
12 Hanú abhasyengeri abhakuru, abheehigirya bha amaragiriryo na abhakaruka bha Ekiyahudi, bhaamanya ega, ekirengyo kirya kirabhahairira bheeki, bhakeenda okumugwata. Nawe, bhakoobhoha omuganda gwa abhantu, bhakamutiga bhakagya.
Abhantu bharamuteganʼya Yeesu eguru ya//obhurihi bhwa erigooti
13 Nho, abhatungi bha Ekiyahudi bhakabhatuma Abhafarisaayo nyabhurebhe, na abhabheeri bha omukama Herode Antipa, bhamugwatye Yeesu okurekana na obhugambi bhwaye. 14 Bhakagya bhakamukeerya ega, “Ee Omwihigirya, tumanyiri ega, uuwe m-muntu wa heene na ega, otakoobhoha omuntu wowonse, kora akaabha omutungi wa eguru. Uuwe oreehigirya obhuheene eguru ya amangʼana ga Waryubha. Bhoono, okuringʼaana na amaragiriryo ga Waryubha, tureekiriribhwa okutobha erigooti ku Kaisari,b kasi-ha?”
15 Nawe, Yeesu akamanya orwambe rwabho, akabhakeerya ega, “Kwaki muransakya okuntega? Mundeetere edinaric ngʼirore.” 16 Nho, bhakamuhirira edinari, wonse akabhabhuurya ega, “Epicha inu na amangʼoore ganú gangʼoorerwe kudinari inu, m-byawi?” Bhakamukyukya ega, “M-bya Kaisari.” 17 Yeesu akabhakyukya ega, “Mumuhaane Kaisari ebhya Kaisari, na mumuhaane Waryubha ebhya Waryubha.” Bhonsego bhakaruguura bhukongʼu.
Yeesu arakyukya amabhuuryo eguru ya obhuhyuki
18 Gwaringa-ho omuganda ogumwi gwa Abhayahudi gunú gwabhirikirwanga ega, Abhasadukaayo.d Bheeki bhaaringa bhareehigirya ega, obhuhyuki bhwa abhaku bhutariho. Orusiku orumwi, abhandi gati yaabho bhakamuseeta Yeesu, bhakamubhuurya ega, 19 “Omwihigirya, Musa yaaturagirirya mumaragiriryo gaaye ega, nyoore omuntu araakwe, atareebhura na omukari waaye, omumura waabho oundi amugabhe omusino uyo, amwibhurire omumura waabho abhaana.e 20 Bhoono tugambe ega, bhaaringa-ho abhamura muhungati abha enda eimwi. Omutangi akateta omukari, akamara akakwa atareebhura nawe. 21 Omumura waabho owa kabhiri akamugabha omusino uyo, nawe wonse akakwa, atareebhura nawe. Na owa kasatu wonse ekabha ego. 22 Bhonsego muhungati bhakakwa bhateebhwiri na omusino uyo. Kubhuteero, omusino uyo wonse, akakwa. 23 Bhoono otukeerye, nyoore obhuhyuki bhwa abhaku bhuriho, orusiku runú abhaku bharihyuka, omukari uyo, aribha omukari wawi gati ya abhamura muhungati bhayo? Kwa okubha bhonsego muhungati bhaaringa bhamuteteri.”
24 Yeesu akabhakyukya ega, “Bheenyu murabhura bhukongʼu, kwa okubha mutamanyiri ganú gaangʼoorwa mu Mangʼoore Amarabhu, kweki mutamanyiri obhuturo bhwa Waryubha kya ego bhuringi. 25 Hanú abhaku bharihyuka, bhatariteta kora okutetwa. Bharibha kya bhamaraikaf bha murwire, bheeki bhatakuteta kora okutetwa. 26 Na eguru ya okuhyukibhwa kwa abhaku, mutarasoma mukitabho kya Musa, kya ego Waryubha yaagamba kukisaka kinú kyookanga omururo? Waryubha yaakeerya Musa ega, ‘Oni ngʼ-Waryubha wa Abhurahamu, wa Esaaka na wa Yakobho.’g” 27 Yeesu akagendererya okugamba ega, “Mbe, Waryubha ataringi Waryubha wa abhaku, nawe ngʼ-Waryubha wa abhahoru,h kwa ego murabhura bhukongʼu!”
Eriragiriryo erikuru okukira gonsego
28 Hanú Yeesu yaaringa arahakaananʼya na Abhasadukaayo, omwihigirya wa amaragiriryo oumwi akahika, akeegwa kinú bharahakaananʼya. Hanú yeegwa ega, Yeesu akyukirye bhujomu, akamubhuurya ega, “Kumaragiriryo gonsego ga Waryubha, n-diiha eriragiriryo erikuru okukira agandi?”
29 Yeesu akamukyukya ega, “Erikuru n-dinu, ‘Mwitegeerere bheenyu Abhaisiraeri! Omukuru Waryubha weetu, ngʼo Omukuru omwenego. 30 Omuhanje Omukuru Waryubha waaho, kwa omutima gwaho gonsego, kwa enkoro yaaho yonsego, kwa obhungʼeeni bhwaho bhonsego na kwa eginguru gyaho gyonsego.’i 31 Na eriragiriryo rya kabhiri erikuru n-dinu, ‘Omuhanje omurikyaho, kya ego oreehanja uuwe omwene.’j Ritariho eriragiriryo erindi erikuru okukira agabhiri gayo.”
32 Omwihigirya wa amaragiriryo urya akamukeerya Yeesu ega, “Omwihigirya, ogambiri bhwaheene ega, Waryubha ngʼ-umwi ego, atariho oundi, nawe, weeki omwene. 33 Kweki mmanyiri ega, ereenderwa okumuhanja Waryubha kwa omutima gonsego, kwa obhungʼeeni bhonsego na kwa eginguru gyonsego, na okumuhanja omurikyaho, kya ego oreehanja uuwe omwene. Gayo ngo amaragiriryo amakuru bhukongʼu, okukira okuruusya ebhimwenso bhya okusikibhwa na ebhimwenso ebhindi bhyonsego.”
34 Yeesu hanú yaarora ega, omuntu uyo akyukirye kwa egintungwa, akamukeerya ega, “Uuwe otaringi hare okusoha mubhukama bhwa Waryubha.” Okwambira orusiku ruyo, atariho wowonse unú yaasakya kweki okumubhuurya Yeesu amabhuuryo agandi.
Kiristu Omutuurya ngʼo omuhiiri Daudi//na Omukuru wa bhonsego
35 Yeesu hanú yaaringa arabheehigirya abhantu murubhanja rwa erisyengerero erikuru rya Waryubha, akabhabhuurya ega, “Kwaki abheehigirya bha amaragiriryok bharagamba ega, Kiristu Omutuurya m-muhiiri Daudi? 36 Daudi omwene enu aroorokereribhwa na Omutima Omurabhu, yaagamba ega,
‘Omukuru Waryubha yaamukeerya Omukuru waanil ega,
“Ikara orubhaara rwani rwa obhuryo,
okuhikira hanú ndituura abhasigu bhaaho hansi ya amaguru gaaho.”’m
37 “Daudi omwene aramubhirikira Kiristu ega, ‘Omukuru’. Mbe bhoono, Kiristu aratura egaki okubha omuhiiri waaye?”n Omuganda omunene gwa abhantu gwaringa guramwitegeerera Yeesu kwa obhujomerwa.
Yeesu arakeerya abhantu bheeyangararire//na abheehigirya bha amaragiriryo
38 Hanú Yeesu yaaringa areehigirya abhantu, akabhakeerya ega, “Mwiyangararire na abheehigirya bha amaragiriryo. Bheeki bhahanjiri okugenda bheebhoheri eginkanju egintambi, na okukeeranibhwa kwa obhusuuku mumidiira. 39 Kweki mumasinagogio bhahanjiri okwikara embere, na muginyangi bhahanjiri okwikara kubhitumbi ebhya embere ebhya abhasuukwa. 40 Bharabharuusya abhasino eginyumba gyabho. Kweki bhareekorya ega, m-bantu bhanú bhataana amasoro kwa okusabha amasabho amatambi embere ya abhantu. Kurusiku rwa okubhuturirwa ekiina, abhantu bhayo bharijibhibhwa bhururu bhukongʼu.”
Egisadaaka gya abhaniibhi na omusino omutobhu
41 Yeesu yaaringa yeekeeri murubhanja rwa erisyengerero erikuru rya Waryubha, abhatiri orubhaara rwa erisandiko rya okuruusirya-mo egisadaaka. Akamaaha kya ego abhantu bharatuura egisadaaka gyabho mwisandiko murya. Abhaniibhi abhaaru bhaaringa bhararuusya egimbirya eginjaru. 42 Mbe, akaaja omukari oumwi omusino omutobhu, weeki akaruusya omunyaraga gwa egimbirya ebhiri egyenego. 43 Hanú Yeesu yaarora gayo, akabhabhirikira abheehigira bhaaye, akabhakeerya ega, “Ndabhakeerya obhuheene ega, omukari omusino omutobhu uyo, ateeri egimbirya eginjaru mwisandiko rya egisadaaka, okukira bhonsego bhanú bharuusirye. 44 Ndagamba ego, kwa okubha abhantu abhandi bhonsego, bharuusirye amasaagyo okurwa kubhintu ebhyaru bhinú bhaanabhyo. Nawe, omukari unu, na obhutobhu bhwaye, aruusirye bhyonsego bhinú yaanabhyo mubhuhoru bhwaye.”