Yeesu aramuhwenʼya omurweri orusiku rwa Esabhato
14
Orusiku rumwi rwa Esabhato, Yeesu akagya akasoha munyumba ya omukuru umwi wa Abhafarisaayo okurya ebhyakurya. Na hanú yaaringa muyo, Abhafarisaayo na abhantu abhandi, bhakabha bharamwikomya bhukongʼu.2 Embere waaye, yaaringa-ho omuntu umwi, unú yaaringa na obhurweri bhwa okubhimba omubhiri. 3 Yeesu akabhabhuurya Abhafarisaayo na abheehigirya bha amaragiriryo ega, “Amaragiriryo ga Waryubha garatwikiririrya okuhwenʼya abhantu orusiku rwa Esabhato,a kasi-ha?” 4 Nawe, bhonsego bhakakira. Mbe, Yeesu akamukuunʼya omurweri uyo, akamuhwenʼya, akamutiga agye gyaye.
5 Nho, Yeesu akabhabhuurya ega, “Niwi gati yeenyu unú, engʼombe yaaye kasi entikiri yaayeb hanú eraagwe mukisima orusiku rwa Esabhato, atakuiruusya-mo?” 6 Abhantu bhayo, bhataanagya okumukyukya eringʼana riyo.
Ameehigiryo eguru ya okwikorya abhakuru
7 Yeesu yaaringa ararora abhageni bhanú bhaaringa bharaarikirwe munyangi iyo, kya ego bhaaringa bhareesorera ebhitumbi bhya abhageni abhakuru. Nho, akabhakeerya ekirengyo ega, 8 “Hanú oraaraarikwe mubhwenga, otige okwikangatirirya okwikara ahasi ha abhageni abhakuru, kwa okubha oriko okunyoora araarikirwe oundi omukuru okukira uuwe. 9 Na unú yaabharaarika bheenyu bhabhiri, araaje akukeerye ega, ‘Ndasabha omuteere unu ekitumbi kiyo.’ Hayo, orisuuka bhukongʼu, kwa okubha origya okwikara enyuma kukitumbi kya omuntu wa insi bhukongʼu. 10 Nawe, hanú oraaraarikwe munyangi, ogende wikare kumweya gwa enyuma, naho hanú araaje unú yaakuraarika, akukeerye ega, ‘Musaani waani, njo embere hanu! Nho ahajomu bhukongʼu.’ Ego oraabhe oheerwe obhukuru embere ya abhageni bhonsego. 11 Kwa okubha kira omuntu unú areeriinʼya omwene, Waryubha arimwituumya. Na unú areeyituumya omwene, Waryubha arimuriinʼya.”
12 Hayo, Yeesu akamukeerya omuntu unú yaaringa amuraarikiri ega, “Hanú oraaseemerye abhantu enyangi ya ebhyakurya bhya mubhasu kasi mugoroobha, otaraarika abhasaani bhaaho, abhahiiri bhaaho, abhamenyani bhaaho na abhaniibhi. Hanú oraakore ego, bheeki bhonse bharikuraarika owaabho. Ego, orinyoora orihirwe kwa okubha waabharaarika. 13 Nawe, hanú oraaseemye enyangi, oraarike abhatobhu, abharema, abhabheeru, na abhahoku. 14 Nho orinonkwa, kwa okubha bhayo bhataana obhuturo bhwa okukuriha. Kwa ego, Waryubha arikuriha eribhaga rinú arihyukya abhantu abhaheene.”
Ekirengyo kya enyangi enene
15 Mbe, omugeni umwi unú yaaringa yeekeeri hamwi na Yeesu kubhyakurya, hanú yeegwa amangʼana gayo, akagamba ega, “Yaanonkwa omuntu unú arirya enyangi, mubhukama bhwa Waryubha!”
16 Yeesu akamukyukya kwa ekirengyo ega, “Yaaringa-ho omuntu umwi, unú yaaseemya enyangi enene, akaraarika abhantu abhaaru. 17 Ensa ya okurya yaaja okuhika, akamutuma omukori wa emirimu waaye kubhonsego bhanú yaaringa araarikiri, abhakeerye ega, ‘Muuje! Ebhintu bhyonsego bhibheeri!’
18 “Nawe, bhonsego bhanú yaaringa araarikiri, umwi umwi bhakabha bharamusabha abhaabhire. Wa okwamba, akagamba ega, ‘Nguriri omugunda, ndeenderwa ngende ngumaahe. Ndakusabha unyabhire.’ 19 Oundi akagamba ega, ‘Nguriri egingʼombe ekumi gya okurimira, bhoonwego ndagya okugisakya. Ndakusabha unyabhire.’ 20 Na oundi akagamba ega, ‘Naateteri omukari bhwangu hanu, kwa ego, ntaaje.’
21 “Omukori wa emirimu uyo, hanú yaahunjuka, akamukeerya omukuru waaye gayo gonsego. Mbe, omukuru uyo, akajima, akamukeerya ega, ‘Genda bhwangu kunjira ya nyamansaana na mubhinyerero bhya omugi gunu, obhareete hanu abhatobhu, abhahoku, abharema, na abhabheeru.’
22 “Eribhaga erindi, omukori wa emirimu hanú yaahunjuka, akamukeerya ega, ‘Omukuru, ganú waari untumiri, gabheeri. Kora ego, omweya gukyari-ho kubhantu abhandi.’
23 “Omukuru akamukeerya ega, ‘Mbe, genda kwibharabhara erikuru na kugintunga gya omugi gunu. Obhangʼeenererye abhantu bhasohe munyumba yaani okuhikira iijure. 24 Nawe, ndabhakeerya ega, bhonsego bhanú naaringa ndaarikiri kubhwambiro, atariho kora umwi waabho, unú arirabha enyangi yaani!’”
Ganú gareenderwa okubha omwihigira wa Yeesu
25 Yeesu yaaringa aragenda na omuganda omunene gwa abhantu. Mbe, akeekyukya, akabhakeerya ega, 26 “Omuntu wowonse unú aransoorana arabha omwihigira waani heene hanú araanhanje oni, okukira esewaabho, ngʼina waabho, omukari waaye na abhaana bhaaye, abhahiiri bhaaye bha ekisaaja na bha ekikari, na obhuhoru bhwaye omwene. 27 Omuntu wowonse unú atakugega omusarabha gwaye,c kurusumo rwani, uyo atakutura okubha omwihigira waani.
28 “Tiga mbaragirirye. Niwi gati yeenyu areende okuhagaaja ekinsongyo, ateekare okwamba akore amasaabhu ga obhuhagaaji, arore nyoore yaana egimbirya gya okumarira obhuhagaaji. 29 Bira okukora ego, aratura okuhagaaja obhurusa, amare atamwe okugendererya okuhagaaja ekinsongyo. Abhahiti bha kunjira bharaabhenga bharamujeera. 30 Bharaagambenga ega, ‘Rora omuntu unu! Yaamba okuhagaaja, nawe ataana obhuturo bhwa okurimariisya erikindaasi rinu!’
31 “Kasi ekirengyo ekindi ega, m-mukama-ki, unú areende okugya okurwana eriihe na omukama oundi, ateekare okwamba yeetegeerere nyoore weeki na abhasirikare bhaaye ebhiku ekumi, aratura okurwana na omurikyaye wa abhasirikare ebhiku mirongo ebhiri. 32 Nyoore araarore ega, atakutura okuhiga, rumwigo, aratuma amangʼana ga okusabha, bheekiriranʼye kwa omurembe akyari hare.
33 “Egoego na bheenyu, unú atakutiga bhyonsego bhinú yaanabhyo, atakutura okubha omwihigira waani.