Yeesu arakaanʼya abhantu kwa orwambe rwa Abhafarisaayo
12
Eribhaga riyo, abhantu abhaaru bhaaringa bhareekumanʼya, okuhikira bhakabha bharatajana.Yeesu akaamba okubhakeerya abheehigira bhaaye ega, “Mwiyangararire na orwambe rwa Abhafarisaayo, kwa okubha orwambe ruyo ruranyaragana kya ekimera. 2 Kira kinú kikundikiriibhwe, kirikundukurwa, na kira kinú kibhisirwe, kirimaahikana. 3 Amangʼana ganú muragambanga kwa ekinyerera, abhantu bharigeegwa. Na kira kinú mwaringa murajamirirana, muringi mubhinyumba bhya munsi, kiriraarikwa kibhara wa eginyumba.
Moobhohe Waryubha omwenego
4 “Ndabhakeerya bheenyu abhasaani bhaani, mutige okoobhoha abhantu bhanú bharabheeta omubhiri. Kwa okubha hanú bharamara okubheeta, bhataana ekintu ekindi kweki kinú bharakora. 5 Nawe, ndabhoorokya unú mureenderwa okumoobhoha. Moobhohe Waryubha, kwa okubha araamare okwita omuntu, yaana obhuturo bhwa okumwesa mumururo gunú gutakusima.a Mbe, mumoobhohe weeki omwenego!
6 “Ebhisanje bhitaanu bhiraguribhwa kwa obhuguri obhuke bhukongʼu. Kora ego, Waryubha atakurabhirwa kora kimwi kyabhyo. 7 Nawe bheenyu, Waryubha amanyiri kora erisaabhu rya egintuukya gya emitwe gyenyu. Kwa ego, mutoobhoha, kwa okubha bheenyu muuna obhwera okukira erihijo rya ebhisanje ebhyaru.
Moorokye eimani yeenyu embere ya abhantu
8 “Ndabhakeerya ega, kira omuntu unú aranyikirirya embere ya abhantu, oni nonse, Omwana wa Adamu, ndimwikirirya embere ya bhamaraikab bha Waryubha. 9 Nawe, kira omuntu unú aranyanga embere ya abhantu, oni nonse ndimwanga embere ya bhamaraika bha Waryubha. 10 Kira omuntu unú aragamba amangʼana amabhiibhi ga okuhakaanʼya Omwana wa Adamu, Waryubha arimwabhira. Nawe, kira omuntu unú aragamba amangʼana ga okujabhura Omutima Omurabhu, uyo Waryubha atarimwabhira.
11 “Hanú murihirwa mumasinagogi, na embere ya abhakuru, na embere ya abhatungi, mutariija okubha na enkubhi eguru ya amangʼana ganú murigamba, kasi kya ego murikyukya. 12 Kwa okubha, eribhaga riyo, Omutima Omurabhu aribheehigirya amangʼana ganú murigamba.”
Ekirengyo kya omuniibhi omukangi
13 Mbe, omuntu umwi wa mumuganda guyo, akamukeerya Yeesu ega, “Omwihigirya, okeerye omuhiiri waani, yangabhire-ko engabho inú taata yaatutigira.”
14 Yeesu akamukyukya ega, “Niwi yaantuura mbe omubhuturi wa ekiina gati yeenyu?” 15 Kweki, akabhakeerya abhantu bhayo ega, “Mwiyangararire na orunamba rwa ebhintu, kwa okubha, obhuhoru bhwa omuntu bhutakurekana na obhwaru bhwa ebhintu bhyaye.”
16 Kimwi, Yeesu akabhakeerya ekirengyo ega, “Yaaringa-ho omuniibhi umwi, unú omugunda gwaye gwaringa gwibhwiri ebhyakurya ebhyaru. 17 Omuniibhi uyo, akeebhuurya ega, ‘Bhoono, nkore egaki? Ntaana ahasi hanú ndaatuure ebhyakurya bhyani!’ 18 Kimwi, akagamba ega, ‘Ndahaanyura ebhitara bhyani, na okuhagaaja ebhindi ebhinene bhukongʼu. Ndatuura muyo obhuro bhwani bhonsego, na ebhintu bhyani ebhindi. 19 Nho, ndaature okugamba ega, “Bhoono, nituuriiri ekibhumbiko kya ebhintu ebhyaru ebhijomu. Bhiranyisa kwa emyaka emyaru! Mbe, mmuunye, ndye na okunywa, njomerwe!”’
20 “Nawe, Waryubha akamukeerya ega, ‘Uuwe omukangi! Obhutiku bhunu orakwa! Na ebhintu bhyonsego bhinú wikumiiri, bhiribha bhyawi?’”
21 Yeesu, akamariisya kwa okugamba ega, “Ego niigo eribha, kumuntu unú areekumira ebhintu ebhyaru kurusumo rwaye omwene, nawe, obhuniibhi bhwaye bhutaana obhwera embere ya Waryubha.”
Ameehigiryo eguru ya okwinyankira
22 Kweki, Yeesu akabhakeerya abheehigira bhaaye ega, “Kwa ego, mutanyankira obhuhoru bhwenyu ega, murirya-ki, kora mutanyankira emibhiri gyenyu ega, muriibhoha-ki. 23 Kwa okubha, obhuhoru bhurakira ebhyakurya, na omubhiri gurakira emyenda!
24 “Mwitegeerere ekirengyo kinu. Nyamuko gitakuhamba, gitakugesa, kora gitaana ebhitara, nawe Waryubha aragiriisya. Mbe, bheenyu m-ba obhwera obhunene okukira ebhinyonyi bhiyo! 25 Kwa okwinyankira, niwi gati yeenyu, aratura okwiyongerererya obhuhoru bhwaye kora kwa ensa eimwi?c 26 Mbe! Nyoore mutakutura okukora kora eringʼana eriike riyo, kwaki muranyanka eguru ya agandi?
27 “Mumaahe amauwa, kya ego garamera. Gatakukora emirimu na gatakutuma emyenda. Nawe, oni ndabhakeerya ega, kora omukama Soromoni kwa obhuniibhi bhwaye bhonsego, ataajomibhwa bhwaheene kya eriuwa erimwi gati ya gayo! 28 Bhoono, nyoore Waryubha areebhohya ego obhunyanki bhwa mwisisi, bhunú reero bhuriho na ejo bhureeswa mumururo, mbe bhoono, Waryubha ataritura okubheebhohya bheenyu abhantu bha eimani enke!
29 “Mbe, bheenyu mutige okunyanka ega, murarya-ki, kasi muranywa-ki. Mutige okoobhoha! 30 Abhantu bhanú bhatamanyiri Waryubha, mbo bharanyankira ebhintu bhiyo. Nawe bheenyu, Eseweenyu wa murwire amanyiri bhujomu ega, murabhyenda! 31 Kwa ego, mutune embere obhukama bhwa Waryubha. Hayo nho, muryongeribhwa agandi gayo gonsego.
Obhuniibhi bhwa murwire
32 “Bheenyu omuganda omuke, mutige okoobhoha, kwa okubha Eseweenyu ahanjiri okubhahaana obhukama bhwaye. 33 Mugurye ebhintu bhyenyu, muhaane abhatobhu egimbirya gya ebhintu bhiyo. Mwikorere eginsaho ginú gitakugota, na okwituurira ekibhumbiko murwire enú kitarisuuha. Eyo, omwibhi atakwibha, kora ebhibhungi bhitarikisarya. 34 Mukore ego, kwa okubha hanú ekibhumbiko kyenyu kiringi, nho na omutima gwenyu gonse guribha.
Abhantu bheeseemye okuuja kwa Omukuru Yeesu
35 “Mubhe mwiseemerye okunkorera emirimu, na egikorobhoi gyenyu, gibhe girooka. 36 Mubhe kya abhakori bha emirimu bhanú bharaganyirira omukuru waabho ahinde okurwa mubhwenga. Hanú araaje asiikurye, bhamusiikurire ekiseku bhwangu. 37 Bhaanonkwa abhakori bha emirimu bhanú omukuru waabho ariija anyoore bharamuganyirira. Ndabhakeerya obhuheene ega, ariiseemya, na aribheekarya kubhyakurya na okubhakorera emirimu! 38 Kora nyoore omukuru waabho arihinda obhutiku gati, kasi nyenkyo juri, na okubhanyoora bheeseemerye, abhakori bha emirimu bhayo bhaanonkwa!
39 “Bhoono, mumanye bhujomu eringʼana rinu ega, nyoore omwene enyumba akaamanyiri eribhaga rinú omwibhi araaja, akeeseemerye, na omwibhi atakaasoheri munyumba yaaye. 40 Kwa ego, na bheenyu mwiseemye eribhaga ryonsego, kwa okubha Omwana wa Adamu ariija kwibhaga rinú mutakwiganirirya.”
Ekirengyo kya omukori wa emirimu omuheene
41 Mbe, Petero akamubhuurya Yeesu ega, “Omukuru, ekirengyo kiyo otukeererye, n-kurusumo rwetu abheenego, kasi n-kurusumo rwa abhantu bhonsego?”
42 Omukuru Yeesu akamukyukya ega, “Omukori wa emirimu omuheene na wa egintungwa, ngʼ-unú omukuru waaye amuteeri okubha omwimiririri wa abhakori bha emirimu abhandi munyumba yaaye, naho abhe arabhahaana ebhyakurya kwibhaga rinú rireenderwa. 43 Arinonkwa omukori wa emirimu unú omukuru waaye, hanú arihunjuka okurwa kurugendo, amunyoore arakora kya ego yaamuragirirya. 44 Ndabhakeerya obhuheene ega, omukuru waaye arimukora okubha omwimiririri wa ebhintu bhyaye bhyonsego!
45 “Nawe, nyoore omukori wa emirimu uyo, areeganirirye mumutima gwaye ega, ‘Omukuru waani araatigite bhukongʼu okuhinda,’ nho yaambe okutema abhakori bha emirimu abharikyaye, abhasaaja kwa abhakari, yaambe okurya na okunywa, okuhikira ararehwa. 46 Mbe, omukuru waaye arihunjuka okurwa kurugendo, orusiku runú omukori wa emirimu uyo atakwiganirirya okumuturuungʼana, na ensa inú atamanyiri. Nho, omukuru waaye arimujibhya bhururu, na okumutuura ahasi hamwi na abhantu bhanú bhataringi abhaheene.d
47 “Omukori wa emirimu unú yaamanya obhwendi bhwa omukuru waaye, nawe ateeseemya okumuturuungʼana, kora ataagwata amaragiriryo gaaye, aritemwa ebhisaamuri ebhyaru. 48 Nawe, omukori wa emirimu unú atamanyiri obhwendi bhwa omukuru waaye, araakore eringʼana rinú rireenderwa obhujibhu bira okumanya, uyo arijibhibhwa hakego. Omuntu unú yaahaanwa ebhyaru, aririhibhwa ebhyaru, na omuntu unú aheerwe okukora emirimu emyaru bhukongʼu, omukuru waaye arimutonga ebhyaru.
Yeesu araahukanʼya abhantu
49 “Oni, naaja mukyaro hanu, naho nkoome omururo gwa okwahukanʼya abhantu. Na ndeenda ndore omururo guyo gukoomerwe! 50 Kora oni omwene, niina enyanko inú ndeenderwa okunyoora, na ndagendererya okunyanka mumutima gwani, okuhikira gakoreke. 51 Muramanya ega, niijiri mukyaro okureeta omurembe? Ndabhakeerya ega, etari ego! Niijiri okwahukanʼya abhantu. 52 Okwambira bhoono, munyumba ya abhantu bhataanu, abhasatu bharyahukana na abhabhiri. Abhabhiri bhonse, bharyahukana na abhasatu bhayo. 53 Taata aryahukana na omumura waaye, na omumura wonse, aryahukana na esewaabho. Maayi aryahukana na omuhara waaye, na omuhara wonse aryahukana na ngʼina waabho. Mabhyara, aryahukana na omukamwana waaye, na omukamwana uyo wonse, aryahukana na ngʼinabhyara waabho.”
Okumanya eribhaga rya Yeesu
54 Kweki, Yeesu akakeerya omuganda gwa abhantu bhayo ega, “Hanú murarora amasaaru gararwa orubhaara rwa bhusikirira-ryubha, muragamba ega, ‘Embura eringi haangʼi okutwa,’ heene eratwa. 55 Na hanú murarora omuyaga gurahuuta okurwa orubhaara rwa taragweta, muragamba ega, ‘Kuraabhe na eribhiriira,’ na niigo erabha. 56 Bheenyu bhanyarwambe! Mumanyiri bhujomu ebhimanyiiriryo bhya mukyaro na ebhya murwire. Bhoono, erabha egaki muratamwa okumanya ensonga ya amangʼana ganú garatuuka kuginsiku ginu?
Ameehigiryo eguru ya okubhutura ekiina kunú kuraaja
57 “Ndeegwa bheenyu abheene, kwa emitima gyenyu, mutakwamura okukora ganú gareenderwa? 58 Hanú oraagende hamwi na omuntu unú arakujongera mwibharaja, kora ekituunyo okwikiririnʼya nawe, mukyari kunjira. Nyoore otaakore ego, araakuhikye embere ya omubhuturi wa ekiina. Na omubhuturi wa ekiina araakuhire kumukuru wa abhasirikare, naho omukuru uyo, akusohye mwigereja kwa eginguru. 59 Ndakukeerya obhuheene ega, otarirwa muyo, okuhikira hanú orimara okuriha esiiri yonsego!”