Amangʼana Amajomu ga Yeesu Kiristu
kya ego gaangʼoorwa na
Mataayo
Ehamati ya Yeesu Kiristu
1
Ganu ngo amariina ga bhajaaji waabho Yeesu Kiristu. Yeesu Kiristu yaarwira muhamati ya omukama Daudia inú yaaringa ehamati ya Abhurahamu.2 Abhurahamu yaamwibhura Esaaka,
Esaaka akeebhura Yakobho,
Yakobho akeebhura Yuda na abhamura bhaabho.
3 Yuda akeebhura Peresi na Jeera, ku Tamari,
Peresi akeebhura Hejironi,
Hejironi akeebhura Aramu,
4 Aramu akeebhura Aminadabhu,
Aminadabhu akeebhura Nashoni,
Nashoni akeebhura Sarumoni,
5 Sarumoni akeebhura Bhoaji, ku Rahabhu,
Bhoaji akeebhura Obhedi, ku Ruutu,
Obhedi akeebhura Yeese,
6 na Yeese akeebhura omukama Daudi.
Daudi akeebhura Soromoni kumukari wa Uria,b
7 Soromoni akeebhura Rehobhoamu,
Rehobhoamu akeebhura Abhia,
Abhia akeebhura Asa,
8 Asa akeebhura Jehoshafati,
Jehoshafati akeebhura Joramu,
Joramu akeebhura Ujia,
9 Ujia akeebhura Jotamu,
Jotamu akeebhura Ahaji,
Ahaji akeebhura Hejekia,
10 Hejekia akeebhura Manase,
Manase akeebhura Amoni,
Amoni akeebhura Josia,
11 na Josia akeebhura Jekonia na abhamura bhaabho.
Na kwibhaga riyo Abhaisiraeri bhaangʼaanyiribhwa mubhugaya mukyaro kya Bhabheri.
12 Eribhaga rinú Abhaisiraeri bhaangʼaanyiribhwa eyo,
Jekonia akeebhura Sherateri,
Sherateri akeebhura Jerubhabheri,
13 Jerubhabheri akeebhura Abhiudi,
Abhiudi akeebhura Eriakimu,
Eriakimu akeebhura Ajori,
14 Ajori akeebhura Jadoki,
Jadoki akeebhura Akimu,
Akimu akeebhura Eriudi,
15 Eriudi akeebhura Eriejeri,
Eriejeri akeebhura Matani,
Matani akeebhura Yakobho,
16 Yakobho akeebhura Yusufu, omusaaja wa Mariamu,
na Mariamu akeebhura Yeesu unú arabhirikirwa Kiristu Omutuurya.c
17 Mbe, okurwa ku Abhurahamu, okuhikira okwibhurwa kwa omukama Daudi, gyaringa-ho eginyibhuro ekumi na ena. Na, okurwa ku Daudi, okuhikira kwibhaga rinú Abhaisiraeri bhaangʼaanyiribhwa mubhugaya mukyaro kya Bhabheri, gyaringa-ho eginyibhuro egindi ekumi na ena. Kweki, okurwa kwibhaga rinú bhaangʼaanyiribhwa eyo, okuhikira okwibhurwa kwa Kiristu, gyaringa-ho eginyibhuro egindi ekumi na ena.
Okwibhurwa kwa Yeesu Kiristu
18 Ganu ngo amangʼana ga okwibhurwa kwa Yeesu Kiristu. Mariamu ngʼina waabho Yeesu, yaaringa arombeerwe obhuko na Yusufu. Nawe, yaaringa atararaara nawe, Mariamu akamaahikana ega, yaana enda kwa obhuturo bhwa Omutima Omurabhu.d 19 Yusufu yaaringa omuntu wa heene embere ya Waryubha. Nawe, ateendanga ega, amusuukye Mariamu, kwa ego akaamura okumutiga kwa ekinyerera.e
20 Hanú Yusufu yaamara okwiganirirya gayo, maraikaf wa Omukuru Waryubha akamwibhukira mukirooto, akamukeerya ega, “Yusufu, omuhiiri Daudi, otoobhoha okumuteta Mariamu, kwa okubha anyooreri enda iyo kwa obhuturo bhwa Omutima Omurabhu. 21 Ariibhura omwana wa ekimura, wonse orimutoga eriina Yeesu,g kwa okubha uyo ngʼo arituurya abhantu bhaaye okurwa mubhusarya bhwabho.”
22 Gayo gonsego gaakoreka ego, naho rikunaane eringʼana rinú Omukuru Waryubha yaagamba, okuhitira kumurooti waaye ega,
23 “Maaha, unú ataakataariri na omusaaja arigega enda,
weeki ariibhura omwana wa ekimura.
Bharimutoga eriina ryaye Emanueri.”h
Ensonga ya eriina rinu niiga, “Waryubha aringi hamwi na bheetu.”