Dachi Akõre Warr ijãad̶ai panuu ʉ̃rʉbena
5
1 Jesús Dachi Akõreba Dachi Karibabarii deai jarad̶a ab̶auba ijãaruubʉrã, mau ẽbẽra Dachi Akõre warrbʉ.a Dachi Bajãad̶ebena Akõre kʉ̃ria b̶uuba ichi warrarã sid̶a kʉ̃ria b̶uu. 2 Dachiba Dachi Akõre kʉ̃ria panuubʉrã maud̶e ichiba waubi b̶uu bed̶ea wau panuubʉrã, kuitaa panuu ichi warrarã sid̶a kʉ̃ria panuu. 3 Dachi Akõre biawãra kʉ̃ria panuubʉrã, ichiba waubi b̶uu bed̶ea joma waud̶ai. Ichiba waubi b̶uu bed̶ea chaareawẽa b̶uu. 4 Joma Dachi Akõre warrarãba nau iujãad̶ebena kachirua ida b̶ubadau. Biawãra dachiba Jesucristod̶e ijãa panuud̶eeba mau poyaa ida b̶ud̶ai. 5 ¿Kaiba nau iujãad̶ebena kachirua poyaa ida b̶uima? Ab̶auba Jesús biawãra Dachi Akõre Warr ijãa b̶uubʉrã, mau ẽbẽraba mau poyaa ida b̶ui.Jesús biawãra Dachi Akõre Warrbʉ
6 Mau ara ichi Jesucristo, chi nau iujãad̶aa neeped̶a baniad̶e boro eabid̶a maud̶e ichi oa cruzd̶e ched̶abʉ. Nau iujãad̶aa neeped̶a baniad̶éburu boro eabasii, maumaarã ichi oa sid̶a cruzd̶e chesii. Dachi Akõre Jauriba kuitaabi b̶uu mau biawãra, ichiba chi biawãra bed̶ea kuitaabibariid̶eeba. 7 Maud̶e bajãad̶e õbea panuuba mau biawãra arab̶aud̶e jara panuu; Dachi Bajãad̶ebena Akõreba maka jara b̶uu, chi «Bed̶ea» abadauba maka jara b̶uu maud̶e ichi Jauriba maka jara b̶uu. Mau õbea panuu ab̶aburubʉ.b 8 Naka chi õbea panuuba kuitaabibadau chi bed̶ea biawãra Jesús ʉ̃rʉbena: Jesús boro easiid̶eeba, ichi oa cruzd̶e chesiid̶eeba, maud̶e Dachi Akõre Jauriba kuitaabi b̶uud̶eeba. Mau õbea jara panuuba arab̶aud̶e kuitaabi panuu. 9 Ẽbẽraba unud̶a biawãra aaruubʉrã dachiba mau ijãabadau. Maamina Dachi Akõreba jara b̶uu aude ijãad̶ai panuu, ichi Warr ʉ̃rʉbena biawãra jara b̶uud̶eeba. 10 Chi Dachi Akõre Warr ijãa b̶uuba ichi sõd̶e kuitaa b̶uu Dachi Akõreba jara b̶uu biawãra. Maamina chi Dachi Akõreba jara b̶uu ijãawẽa b̶uuba chi mauba setaa jara b̶uu a kʉ̃risia b̶uu, ichi Warr ʉ̃rʉbena jara b̶uu ijãawẽa b̶uud̶eeba. 11 Dachi Akõreba jara b̶uu naubʉ: ichi Warrd̶eeba dachi ewaricha mau ome chokae nibabiai. 12 Biawãra chi Dachi Akõre Warrd̶e ijãa b̶uu mau ome ewaricha chokae b̶uai. Maamina chi Dachi Akõre Warr ijãawẽa b̶uu mau ome ewaricha chokae b̶uabai.
Juanba nau kartad̶e aanama b̶ʉd̶a
13 Mʉʉba nau karta machi chi Dachi Akõre Warr ijãabadaurã baita b̶ʉʉruu kuitaad̶amera ewaricha Dachi Akõre ome chokae nuread̶ai.
14 Dachi Akõreba kʉ̃ria b̶uu kĩra dachiba ʉtaa id̶iiduubʉrã, kuitaa panuu ichiba ũribarii. Maud̶eeba ne wapeawẽa ichimaa ʉtaa id̶id̶ai panuu. 15 Dachiba ʉtaa id̶iiduu Dachi Akõreba ũribarii kuitaa panuud̶eeba, kuitaa panuu mau ʉtaa id̶iiduu ichiba deai.
16 Machid̶ebena ab̶auba bichi ãba kachirua dachi biubikau wauruu unuuruubʉrã, ʉtaa id̶ii b̶uu. Maka Dachi Akõreba mau perdonaped̶a, chokae nibabii. Maamina dachi biubibarii kachirua baraubʉ. Mʉʉba jarawẽa b̶uu chi mau kachirua waubadaurã kakua ʉtaa id̶imera. 17 Joma Dachi Akõre daad̶e biꞌiwãe waud̶a kachiruabʉ. Maamina kachirua barau dachi biubikau.
18 Dachiba kuitaa panuu Dachi Akõre warrarãba kachirua wau panad̶akau,c Dachi Akõre Warr Jesucristoba ãchi nu ua b̶uud̶eeba. Mauba jʉbawãe niiba ãchi kachirua poyaa waukau. 19 Dachiba kuitaa panuu dachi Dachi Akõred̶e. Maud̶e kuitaa panuu joma nau iujãad̶e Dachi Akõred̶e ijãad̶akaurã jʉbawãe nii juad̶e duanuu. 20 Kuitaa panuu Dachi Akõre Warr neesii maud̶e kʉ̃risia kuitaa dachimaa deasii Dachi Akõre biawãra unud̶amera. Ichi Warr Jesucristo ome panuud̶eeba dachi biawãra Dachi Akõre ome panuu. Mau biawãra Dachi Akõrebʉ. Mauba ẽbẽrarãmaa ichi ome ewaricha chokae nuread̶ai deabarii. 21 Mʉ warrarã, Dachi Akõre kĩra nuree juaba kaped̶aad̶ad̶e ijãarã́sturu.