Setaa jaradeabadaurã saka kuitaad̶ai
4
1 Ãbarã, barikiurãba Dachi Akõre Jaurid̶eeba berrea panuu abadaurã ijãarã́sturu, maumaarã kauwa ichiásturu ãchiba biawãra Dachi Akõre Jaurid̶eeba maebʉrã waabenarãd̶eeba berrea panuu kuitaad̶ai baita. Mau makásturu ãreaba nau iujãad̶e setad̶eeba ãchiba Dachi Akõre Jaurid̶eeba berrea panuu abadaud̶eeba. 2 Naka machiba kuitaad̶ai kai Dachi Akõre Jaurid̶eeba berrea b̶uu: ab̶aba Jesucristo nau kakuad̶e biawãra neesii aaruubʉrã, Dachi Akõre Jaurid̶eeba berrea b̶uu. 3 Maamina ab̶auba Jesucristo nau kakuad̶e neebasii aaruubʉrã, Dachi Akõre Jaurid̶eeba berrea b̶uuwãe. Chi Cristo kĩramaabariid̶eeba berrea b̶uu.a Machiba ũrisid̶au Cristo kĩramaabarii neei b̶uu. Biawãra mau nau iujãad̶e b̶uu.4 Mʉ warrarã, machi Dachi Akõred̶ebʉ. Machiba maarãmaa ida setaa kũruabiad̶aabasii, chi machi sõd̶e b̶uu chi nau iujãad̶e b̶uu audeara poyaabarii b̶uud̶eeba. 5 Maarã nau iujãa kachiruad̶ebenarãbʉ. Maud̶eeba nau iujãad̶ebena kʉ̃risia jaradeabadau maud̶e ãchiba jaradea panuu nau iujãad̶e Dachi Akõred̶e ijãad̶akaurãba ijãabadau. 6 Maamina Dachi Akõred̶ebʉ. Chi Dachi Akõre unu b̶uuba dachiba jaradea panuu ijãabarii. Chi Dachi Akõre unukauba dachiba jaradea panuu ijãakau. Maud̶eeba dachiba kuitaa panuu kaiba Dachi Akõre Jaurid̶eeba biawãra bed̶ea jaradea b̶uu maud̶e kaiba setad̶ebena jaurid̶eeba setaa jaradea b̶uu.
Dachi Akõreba ẽbẽrarã kʉ̃ria b̶uu
7 Ãbarã, dachi chiya kʉ̃ria nuread̶ai panuu, Dachi Akõreba dachimaa dachi ãbarã biawãra kʉ̃riabiabariid̶eeba. Joma chi kʉ̃ria uru nuree Dachi Akõre warrarãbʉ maud̶e Dachi Akõre unubadau. 8 Dachi Akõreba ne jomad̶e kʉ̃riakua b̶uud̶eeba chi ab̶au kʉ̃riawẽa b̶uuba Dachi Akõre unukau. 9 Dachi Akõreba dachi kʉ̃ria b̶uu unubisii ichi Warr ab̶a nii nau iujãad̶aa bʉisiid̶e ichid̶eeba ewaricha chokae nuread̶amera. 10 Chi biawãra kʉ̃ria naka b̶uu: chi kʉ̃riad̶eeba Dachi Akõreba ichi Warr bʉisii biumera dachi kachirua perdonai baita. Dachi Akõreba maka waubasii dachiba ichi kʉ̃ria panasiid̶eeba, maumaarã maka wausii ichiba dachi kʉ̃riasiid̶eeba.
11 Ãbarã, Dachi Akõreba dachi maka kʉ̃riasiid̶eeba dachi sid̶a chiya kʉ̃ria nuread̶ai panuu. 12 Ab̶au bid̶a Dachi Akõre dauba unukau. Maamina dachi chiya kʉ̃ria panuubʉrã, Dachi Akõre dachi ome b̶uu maud̶e ichi kʉ̃riad̶eeba dachiba biawãra joma kʉ̃ria panuu. 13 Dachi Akõreba ichi Jauri dachimaa deasiid̶eeba kuitaa panuu dachi Dachi Akõre ome panuu maud̶e ichi dachi ome b̶uu. 14 Daiba ichi Warr unusid̶aud̶eeba jara panuu Dachi Bajãad̶ebena Akõreba mau biawãra bʉisii nau iujãad̶ebenarã karibamera. 15 Barikiuba Jesús biawãra Dachi Akõre Warr aaruubʉrã, Dachi Akõre ichi ome b̶uu maud̶e ichi Dachi Akõre ome b̶uu.
16 Dachiba kuitaa panuu maud̶e ijãa panuu Dachi Akõreba dachi kʉ̃riakua b̶uu. Dachi Akõreba ne jomad̶e kʉ̃ria b̶uu. Biawãra kʉ̃ria uru b̶uu Dachi Akõre ome b̶uu maud̶e Dachi Akõre ichi ome b̶uu. 17 Maka dachiba Dachi Akõre maud̶e joma ẽbẽrarã biawãra kʉ̃ria panuu. Dachi Akõreba dachi nebʉra kastikai ewarid̶e dachi ne wapeawẽa nuread̶ai, nau iujãad̶e Jesucristo nibad̶a kĩra nibaped̶aad̶ad̶eeba. 18 Dachiba Dachi Akõre maud̶e joma ẽbẽrarã kʉ̃ria panuubʉrã, Dachi Akõreba kastikaid̶ebena wapead̶aabai panuu, chi biawãra kʉ̃riaba mau wapead̶ai wãꞌãebibariid̶eeba. Chi Dachi Akõreba dachi nebʉra kastikai wapea b̶uuba kuitaa b̶uu Dachi Akõreba ichi nebʉra kastikai. Ichiba Dachi Akõre maud̶e joma ẽbẽrarã wabid̶a biawãra kʉ̃ria b̶uuwãe.
19 Dachiba Dachi Akõre kʉ̃ria panuu ichiba dachi naa kʉ̃riasiid̶eeba. 20 Ab̶auba Dachi Akõre kʉ̃ria b̶uu aaruubʉrã, maud̶e ichi ãba kĩramaa b̶uaruubʉrã, setaa jara b̶uu. Chi ãba unu b̶uu kʉ̃riawẽa b̶uubʉrã, ¿saka Dachi Akõre unuwẽa nii kʉ̃ria b̶uaima? 21 Jesucristoba dachimaa waubi b̶uu bed̶ea naubʉ: chi Dachi Akõre kʉ̃ria b̶uuba ichi ãba kʉ̃ria b̶uai b̶uu.