Jesusd̶eeba chi bed̶ea wid̶i dead̶a bibuara b̶uu
8
1 Chi kʉ̃risia bia daiba jara panuu naubʉ: dachi Paare Mechiu bajãad̶e Dachi Akõre rey ãkau jua biare akʉ b̶uu, 2 maud̶e chi Dachi Akõre ded̶e ed̶a paare kĩra traja b̶uabarii. Mau chi biawãra de ãnimara e waud̶abʉ. Ẽbẽrarãba mau waud̶aabasii, maumaarã Dachi Mechiuba mau wausii.3 Dachi Akõreba joma paare mechiurã b̶ukuabarii ichimaa ne kaebea dead̶amera maud̶e ãnimara baa dead̶amera. Maud̶eeba dachi Paare Mechiu nii bid̶a ne kaebea deai b̶uasii. 4 Ichi nau iujãad̶e b̶uad̶a basirã, paare nibaabai basii, nau iujãad̶e paarerã ãrea baraud̶eeba. Mau paarerãba Dachi Akõremaa ne kaebea deabadau Moisesba b̶ʉd̶ad̶e b̶ʉ kub̶uu kĩra. 5 Paarerãba wau panuud̶eeba unubibadau bajãad̶e saka b̶uu. Maud̶eeba Moisesba chi ãnimara e de waui naed̶e Dachi Akõreba ichimaa naka jarasii: «Joma arakʉd̶e kauwa wause mʉʉba ead̶e unubid̶a kĩra». 6 Maamina Jesús dachi Paare Mechiuba bajãad̶e waubarii paarerãba nau iujãad̶e waubadau audeara biꞌia b̶uu. Ara mau kĩra Dachi Akõreba Jesusd̶eeba bed̶ea dead̶a bibuara b̶uu ẽbẽrarã bed̶ea dead̶a audeara, Dachi Akõreba ẽbẽrarã ãrea karibai asiid̶eeba. 7 Dachi Akõreba ẽbẽrarã ome naed̶e bed̶ea dead̶aba biawãra karibad̶a basirã waya maucha bed̶ea deabai basii. 8 Maamina Dachi Akõreba ẽbẽrarãba mau joma waud̶awẽa panuu unusii. Maud̶eeba naka jarasii:
Dachi Mechiuba naka jara b̶uu: «Ewari ab̶ad̶e mʉʉba israeld̶ebenarã ome maud̶e Judad̶ebenarãmaa bed̶ea chiwid̶i deai.
9 Mau bed̶ea chiwid̶i machi nabẽraed̶ebenarãmaa bed̶ea dead̶a kĩra b̶uabai.
Maarãmaa bed̶ea deasii, Egiptod̶ebena uad̶osiid̶e.a
Maamina biawãra ijãad̶aabasiid̶eeba mʉʉba ãchi ida b̶usii. Maka jara b̶uu Dachi Mechiuba.
10 Maud̶e Dachi Mechiuba naka jara b̶uu: Kaad̶ebena ewarid̶e mʉʉba nau bed̶ea chiwid̶i israeld̶ebenarãmaa deai:
Mʉʉba chi Moisesba b̶ʉd̶a ãchi kʉ̃risiad̶e maud̶e ãchi sõd̶e b̶ui.
Mʉ ãchi Akõre bai, maud̶e ãchi mʉ ẽbẽrarã bai.
11 Maud̶e jomaurãba mʉ kuitaa panad̶ai. Chi kaebeu nureeba maud̶e chi mechiurã kuitaa panad̶ai.
Maud̶eeba ab̶au bid̶a ichi druad̶ebenarãmaa maud̶e ichi ẽbẽrarãmaa waa jaradead̶aabai mʉ jomaurã Mechiu kuitaad̶amera.
12 Ãchiba kachirua wauped̶aad̶a mʉʉba joma perdonai. Ãchiba kachirua wauped̶aad̶a mʉʉba waa kʉ̃risia b̶uabai».
13 Dachi Akõreba bed̶ea chiwid̶i deai asiid̶e kuitaabisii ichiba naed̶e bed̶ea dead̶a chi chõra b̶uu. Chi chõrad̶eeba kãꞌãabariwãed̶e ãyaa b̶ui.b