2 Tesalonicenses
Karta ome Pabloba b̶ʉd̶a ãbarã Tesalónica puurud̶ebenarã baita
Pabloba nau kartad̶e naa b̶ʉd̶a
1
1 Mʉ Pablobʉ. Nau karta b̶ʉʉruu ãbarã Tesalónica puurud̶ebena baita. Machi, Dachi Bajãad̶ebena Akõred̶ebʉa maud̶e Dachi Mechiu Jesucristod̶ebʉ. Ãba Silvano maud̶e Timoteo mʉ ome panuu. 2 Daiba kʉ̃ria panuu Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi aid̶a panad̶amera maud̶e jirukaraayuwãe panabiad̶amera.Dachi Akõreba ichi bed̶ea ijãad̶akaurã ichiai ʉ̃rʉbena
3 Ãbarã, daiba ewaricha machi baita Dachi Akõréturu kid̶ibai abadau. Daiba maka waubadau biꞌia b̶uu. Machiba ewaricha Cristo biꞌia ijãa panuu maud̶e biꞌia chiya kʉ̃ria panuu. 4 Mau baita daiba ẽbẽrarã Dachi Akõred̶erã panuucha machi ʉ̃rʉbena kĩrajʉʉ nebʉrʉbadau. Daiba jarabadau ẽbẽrarãba kachirua waud̶ai baita wãraa panumina machiba Cristod̶e wabid̶a ijãa panuu maud̶e ãrea biꞌiwãe panumina joma dauchia jãadua panuu. 5 Mauba kuitaabi b̶uu Dachi Akõre jipa niiba ẽbẽrarã kastikabarii. Ichiba machi biꞌia unu b̶uu ichi juad̶e ua b̶uai baita. Maud̶eeba ʉ̃raud̶aa ãrea biꞌiwãe panuu.
6 Dachi Akõre jipa niiba ẽbẽrarã kastikabarii. Ichiba chi machi ãrea biꞌiwãe panabiabadau ãrea biꞌiwãe panabiai. 7-8 Maamina machi, chi biꞌiwãe nureerã kʉrrjĩrubiai dai kʉrrjĩrubiabarii kĩra. Mau makai Dachi Mechiu Jesús ichi angelerã chi poyaabadau ome tʉbʉchia aokod̶e bajãad̶ebena neeruud̶e. Maud̶e joma Dachi Akõred̶e ijãad̶akaurã maud̶e chi bed̶ea bia Dachi Mechiu Jesús ʉ̃rʉbena ijãad̶akaurã kastikai. 9 Ãchi tʉbʉ aokod̶e ewaricha ãrea biꞌiwãe panabiai. Dachi Mechiu daad̶ebena maud̶e ichi poyaabarii mechiud̶ebena kaitawẽ panad̶ai. 10 Ichi neeruud̶e mau ewarid̶e ichid̶irãba ichimaa biꞌia berread̶ai. Ãchi ome biꞌia waud̶ad̶eeba joma ichi ijãabadaurãba ichi ãrea biꞌia unud̶ai. Daiba ichi ʉ̃rʉbena jaradeasid̶aud̶e, machia bid̶a ijãasid̶au.
11 Maud̶eeba daiba ewaricha Dachi Akõremaa ʉtaa id̶ibadau ichiba machi biꞌia unumera. Ichiba machi mau kakua iusii. Daiba ʉtaa id̶i panuu Dachi Akõreba ichi poyaabariid̶eeba machi ne jomad̶e aid̶amera. Maka ichid̶e ijãa panuud̶eeba biꞌia wau kʉ̃ria panuu joma waud̶ai. 12 Makarã machid̶eeba jomaurãba Dachi Mechiu Jesucristo ʉ̃rʉbena biꞌia jarad̶ai maud̶e ichid̶eeba machi ʉ̃rʉbena biꞌia jarad̶ai, Dachi Akõreba maud̶e Dachi Mechiu Jesucristoba ãchi sõbiad̶eeba aid̶a panuud̶eeba.