3
1-2 Daiba waa poyaa dauchia jãadua panad̶aabasiid̶eeba dai du ab̶a Atenas puurud̶e panuumisa kʉ̃risiasid̶au dachi ãba Timoteo machimaa bʉid̶ai. Dachi Akõre baita trajabarii Timoteoba dai ome arab̶au bed̶ea bia Cristo ʉ̃rʉbena jaradeabarii.a Ara makʉd̶e ichi bʉisid̶au Cristod̶e biꞌia ijãa panuud̶eeba dauchia jãadua panad̶amera, 3 maud̶e machi ãrea biꞌiwãe panuud̶e, mau ãrea kʉ̃risiarãad̶amera. Machiba kuitaa panuu Cristod̶e ijãa panuu baita dachi ãrea nebʉrad̶e panad̶ai panuu. 4 Machi baara panasid̶aud̶e daiba jarabachid̶au ẽbẽrarãba dachi ãrea nebʉrad̶e panabid̶amera. Machiba kuitaa panuu biawãra makasii. 5 Maud̶eeba mʉʉba waa poyaa dauchia jãadua b̶uawẽed̶eeba Timoteo machimaa bʉisii, wabid̶a Cristod̶e ijãa panuu kuitaai baita. Mʉʉba kʉ̃risia b̶uasii jʉbawãe niiba machimaa Cristo ida b̶ubia b̶uasii. Makad̶a basirã daiba machimaa Cristo ʉ̃rʉbena jaradeaped̶aad̶a bari ara jãka b̶uai basii.6 Maamina Timoteo machimaa b̶uad̶a daimaa neesii. Machiba Cristod̶e ijãa panuu ʉ̃rʉbena maud̶e machi kʉ̃ria ʉ̃rʉbena ichiba biꞌia jarad̶e neesii. Ichiba jarasii machiba kʉ̃riad̶eeba wabid̶a dai kĩrababadau maud̶e unu kʉ̃ria panuu, daiba machi unu kʉ̃ria panuu kĩra. 7 Mauba ãbarã, daiba kuitaasid̶au machiba Jesusd̶e wabid̶a ijãa panuu. Maud̶eeba dai ãrea nebʉra baraa panumina kĩrajʉʉsid̶au. 8 Jãabae dai biawãra sõbia paneesid̶au, kuitaa panuud̶eeba machi Dachi Mechiud̶e dauchia jãadua panuu. 9 ¿Saka ichíturu kid̶ibai jarad̶aima, dai ãrea kĩrajʉʉ panuu Dachi Akõre daad̶e machi ʉ̃rʉbena? 10 Ãsaed̶e, ẽsabud̶aa bid̶a daiba Dachi Akõremaa ʉtaa id̶ibadau machi ichiad̶e wãd̶ai baita. Maka machiba Cristo ʉ̃rʉbena wabid̶a adua panuu daiba poyaa jaradead̶ai joma aude ijãad̶amera.
11 Daiba Dachi Bajãad̶ebena Akõremaa maud̶e Dachi Mechiu Jesusmaa ʉtaa id̶i panuu machimaa waya wãbiad̶amera. 12 Daiba kʉ̃ria panuu Dachi Mechiuba machi aid̶a b̶uai jomaurã ome biꞌia chiya kʉ̃ria panad̶amera daiba machi ãrea kʉ̃ria panuu kĩra. 13 Maud̶e ʉtaa id̶i panuu Cristoba machi kariba b̶uai sõd̶eeba ãrea ijãad̶amera. Maka Dachi Mechiu Jesús joma ichid̶irã baara neeruud̶e machi Dachi Bajãad̶ebena Akõre daad̶e kachiruaswãe nuread̶ai.