Jesucristoba bʉid̶arãba Pablo biꞌia irsibiped̶aad̶a
2
1 Año 14 bad̶akare mʉ Bernabé ome waya Jerusalend̶aa wãsii. Tito sid̶a wãsii. 2 Mʉ wãsii Dachi Akõreba kuitaabisiid̶eeba araa wãi b̶uu. Ara basiid̶e mʉʉba ãbarã chi mechiurã ómeburu araa imibiaped̶a, jarasii chi bed̶ea bia Cristo ʉ̃rʉbena mʉʉba judiowãerãmaa saka jaradea b̶uu. Maka wausii mʉʉba wau b̶uu ãchiba biꞌia unu panuu kuitaai baita.a 3 Maud̶e Tito mʉ ome b̶uu judiowãemina, ãchiba jarad̶aabasii ichi mukĩra chi kakua tõoi b̶uu. 4 Mau ʉ̃rʉbena berreasid̶au chi nuree biawãra ãbarãwãeba jarabachid̶aud̶eeba. Maarã ãbarã kĩra need̶aped̶a, unud̶ai kʉ̃riabachid̶au dachi Moisesba b̶ʉd̶ad̶ebena ãyaa wãsid̶au kuitaa. Jesucristod̶e ijãad̶ai bad̶amaarã, chi Moisesba b̶ʉd̶a waya waubi kʉ̃ria panasid̶au, chi mau b̶ʉd̶a baita bari trajabadaurã kĩra. 5 Maamina ãchiba jaraped̶aad̶a daiba ne ab̶a bid̶a ijãad̶aabasii machiba chi bed̶ea bia biawãra Cristo ʉ̃rʉbena ewaricha uru nuread̶amera.b6-7 Chi mechiurã abadau ãbarãba kʉ̃risia awara jarad̶aabasii mʉʉba jaradeamera. Maumaarã kuitaasid̶au Dachi Akõreba mʉ bʉisii chi bed̶ea bia Cristo ʉ̃rʉbena judiowãerãmaa jaradeamera Pedro judiorãmaa bʉid̶a kĩra. (Ãchi chi mechiurã panuu abadamina, mʉ baita arab̶aud̶e b̶uu, Dachi Akõreba dachi kĩra awara unukaud̶eeba). 8 Biawãra Dachi Akõreba Pedro ichiba bʉid̶a b̶usii judiorãmaa jaradeamera. Ara mau Dachi Akõreba mʉ b̶usii ichiba bʉid̶a bai baita, judiowãerãmaa jaradeamera. 9 Ãbarã chi mechiurã Santiagobac, Pedrobad maud̶e Juanba kuitaasid̶au Dachi Akõreba ichi sõbiad̶eeba biawãra mʉ judiowãerãmaa bʉisii. Maud̶e ãchi mʉ ome maud̶e Bernabé ome jua deasid̶au kuitaabid̶ai baita arab̶au kʉ̃risia uru panuu. Ãchiba jarasid̶au daiba judiowãerãmaa jaradea panad̶ai, maud̶e ãchiba judiorãmaa jaradea panad̶ai. 10 Ab̶aburu daimaa jarasid̶au ãbarã chi nejarr barauwãe nuree aid̶ad̶amera. Mau mʉʉmaarã ãrea biꞌia b̶uasii maka wau kʉ̃ria b̶uasiid̶eeba.
Pabloba Pedro iadaad̶a
11 Ewari ab̶a Pedro Antioquía puurud̶aa ãbarã ichiad̶e wãsii. Aria mʉʉba jomaurã ãbarã daad̶e ichi iadaasii, ichiba biawãra kachirua wausiid̶eeba. 12 Naka kachirua wausii: chi nuree ãbarã judiorã ẽbẽrarã Santiagod̶ebenarã Antioquía puurud̶aa wãsid̶au. Ãchiba jarabachid̶au judiowãerã mukĩra chi kakua tõod̶ai panuu ẽbẽrarã Dachi Akõred̶erã nuread̶ai baita. Ãchi need̶ai naed̶e Pedro ãbarã judiowãerã ome kobachii, maamina mau ãbarã judiorã need̶aped̶a ichi waya ãbarã judiowãerã ome koobasii. Maumaarã ãyaa wãsii. Wapea b̶uasii chi judiowãerã ãchi mukĩra chi kakua tõod̶ai panuu a jara panuu ʉ̃rʉbena.e 13 Maud̶e waabenarã ãbarã judiorãba chi ãbarã judiowãerã ida b̶usid̶au Pedroba biawãrawãe wau b̶uu kĩra. Maka wau panuud̶eeba Bernabé bid̶a ara mau kĩra kachirua wausii. 14 Maamina mʉʉba unusii ãchi biawãra chi bed̶ea bia Cristo ʉ̃rʉbena jara b̶uu kĩra nibad̶aabasii. Maud̶eeba mʉʉba Pedro jomaurã ãbarã daad̶e naka iadaasii: «Bichi judiomina judio kĩra nibakau. Maumaarã judiowãe kĩra nibabarii. Mau ¿sakãe bichiba ãbarã judiowãerãmaa judiorãba waubadau waubi b̶uma?»
15 Judiowãerãba Moisesba b̶ʉd̶a wãꞌãe panuud̶eeba dachi judiorãba ãchi kachirua waubadaurã abadau. Dachi naweba warr adausid̶aud̶eed̶ebena judiorãd̶eeba, mau Moisesba b̶ʉd̶a uru panuu. 16 Maamina dachiba kuitaa panuu Dachi Akõreba ab̶a bid̶a b̶uwẽe chi jipa nuree baara, mau Moisesba b̶ʉd̶a wau b̶uud̶eeba. Maumaarã Jesucristoba mau Moisesba b̶ʉd̶a kĩra joma wausiid̶eeba, Dachi Akõreba dachi b̶ubarii chi jipa nuree baara. Maud̶eeba dachia bid̶a Jesucristod̶e ijãasid̶au maud̶e Jesucristod̶e ijãa b̶u kakua maka chi ichid̶irã jipa nuree baara duanubarii, ichiba mau b̶ʉd̶a kĩra joma waud̶a kakua. Biawãra Moisesba b̶ʉd̶a wau panuud̶eeba Dachi Akõreba dachi b̶ukau chi jipa nuree baara.
17 Dachiba jʉrʉsid̶au Cristod̶eeba Dachi Akõreba dachi chi jipa nuree baara duanumera. Maud̶eeba waabenarãmaarã dachi kachirua waubadaurãbʉ, chi Moisesba b̶ʉd̶a ida b̶usid̶aud̶eeba. Makarã ¿Cristoba dachimaa kachirua waubi b̶uka? ¡Makawãema! 18 Mʉʉba Moisesba b̶ʉd̶a ida b̶ud̶akare waya ijãaruubʉrã, mʉ nebʉra baraa b̶eei mau b̶ʉd̶a ida b̶u b̶uasiid̶eeba. 19 Naed̶e mʉ Moisesba b̶ʉd̶ad̶eeba nibasii. Maamina mau Moisesba b̶ʉd̶ad̶ebena wãsii.f Maka mʉ Dachi Akõre baita chokae b̶eesii. 20 Mʉ Cristo ome cruzd̶e ãbua jirab̶usid̶au. Maud̶eeba ara mʉʉd̶eeba b̶uwãema, maumaarã Cristo mʉ sõd̶e b̶uu. Nau kakuad̶e chokae b̶uumisa mʉ Dachi Akõre Warr Jesusd̶eeba nibai. Ara mau Jesús, Dachi Akõreba waubi b̶uu wausiid̶eeba, mʉ kʉ̃riasii maud̶e mʉ kakua ichi ida beabisii. 21 Dachi Akõreba ichi sõbiad̶eeba waud̶a mʉʉba ida b̶uwẽe. Moisesba b̶ʉd̶a wau panuud̶eeba chi jipa nuree baara panasirã, Cristo bari biui basii.