Israeld̶ebenarãba kachirua wauped̶aad̶a ʉ̃rʉbena
10
1 Ãbarã, mʉʉba kʉ̃ria b̶uu machiba Moisés ewarid̶e makad̶a kĩrabad̶awẽa panad̶ai. Mau ewarid̶e joma dachi nabẽraed̶ebenarã Moisés baara nibaped̶aad̶a Dachi Akõreba bʉid̶a jʉ̃rʉara ekare nibasid̶au maud̶e Mar Purrd̶e kĩaraa wãsid̶au. 2 Mau mard̶e maud̶e jʉ̃rʉara ekare joma ãchi Moisés ome ãbua panasiid̶eeba Moisés trʉ̃d̶eeba boro eaped̶aad̶a kĩra panasid̶au. 3 Jomaurãba chi arab̶au chiko Dachi Akõreba bajãad̶ebena bʉid̶a kobachid̶au. 4 Jomaurãba arab̶au bania Dachi Akõreba eakarrd̶ebena eab̶aribid̶a dobachid̶au. Mau eakarr Cristo jara b̶uu, ãchi wãaduucha Cristo jaurid̶eeba ãchi ome b̶uasiid̶eeba. 5 Maamina Dachi Akõreba ãchid̶ebena ãrea biꞌiwãe unusii, ichi ome kachirua wausid̶aud̶eeba. Maud̶eeba drua sirua wãꞌãe b̶uud̶e kinisid̶au.6 Mau ewarid̶e makad̶aba dachimaa kuitaabi b̶uu kachirua kʉ̃riad̶aabai panuu ãchiba kʉ̃riaped̶aad̶a kĩra. 7 Juaba waud̶a Dachi Akõre kĩra nuree juaba kaped̶aad̶ad̶e ijãarã́sturu waabenarã chi nureeba ijãaped̶aad̶a kĩra. Dachi Akõre bed̶ead̶e ãchi ʉ̃rʉbena naka b̶ʉ kub̶uu: «Ẽbẽrarã akʉ paneed̶aped̶a kĩrajʉʉ ãbua ko duanasid̶au maud̶e itua do duanasid̶au. Mau maad̶akare jiradud̶aped̶a ãchi kakuaba wau kʉ̃ria b̶uu wau duaneesid̶au». 8 Dachi kakuaba barikia kachirua waud̶aabai panuu waabenarãba wauped̶aad̶a kĩra. Ãchiba maka wau panuu kakua ara ewari ab̶ad̶e 23.000 kinisid̶au. 9 Cristoba saka waui kuitaai dachiba kachirua waud̶aabai panuu waabenarã ãchiba wauped̶aad̶a kĩra. Maud̶eeba chi nuree damaba kaakuaped̶a kinisid̶au. 10 Kĩrajʉʉwẽa panuud̶eeba Dachi Akõre ʉ̃rʉbena kachirua berrearã́sturu waabenarã chi nureeba wauped̶aad̶a kĩra. Maud̶eeba chi ángel dachi kinibibariiba ãchi ãrea kinibiasii.
11 Joma ãchi makad̶aba unubi b̶uu saka Dachi Akõreba kachirua kastikabarii. Mau Dachi Akõre bed̶ead̶e b̶ʉ kub̶uu dachi nau kaad̶earebena ewarid̶e nureerãba ara mau kĩra waurãad̶amera. 12 Maud̶eeba ab̶auba ãrea ijãa b̶uu kʉ̃risia b̶uubʉrã, ara ichi du ab̶a kauwa b̶uai b̶uu kachiruad̶e ida b̶aebiamaaba. 13 B̶esed̶e dachi sõd̶e kʉ̃risiabadau kachirua waud̶ai baita, jomaurãba maka kʉ̃risiabadau kĩra. Mau poyaa dauchia jãadua panad̶awẽebʉrã, Dachi Akõreba dachimaa maka kʉ̃risiabiabai. Maud̶e dachiba maka kʉ̃risia paneeduud̶e ichiba aid̶ai dauchia jãadua panad̶amera, ichiba jara b̶uu kĩra ewaricha waubariid̶eeba.
Dachi Akõre kĩra nuree juaba kaped̶aad̶a ida b̶ud̶ai panuu ʉ̃rʉbena
14 Maud̶eeba mʉ ãbarã mʉa kʉ̃riakuabarii, Dachi Akõre kĩra nuree juaba kaped̶aad̶a ida b̶ústuru. 15 Mʉʉba machimaa berrearuu kʉ̃risia kuitaa nureerãmaa berrearuu kĩra. Ãrea kʉ̃risiásturu mʉʉba jara b̶uu biawãra kuitaai. 16 Dachi Mechiu kĩraba panuud̶e dachiba uva b̶aa basud̶e b̶uu ʉ̃rʉbena Dachi Akõremaa ichíturu kid̶ibai ad̶aped̶a dobadau. Mau dooduud̶e unubibadau dachi Cristo oad̶eeba ichi ome ãbua panuu. Maud̶e pan b̶ʉakuad̶a kooduud̶e unubibadau Cristo nau kakuad̶e ãrea biꞌiwãe b̶uasiid̶eeba dachi ichi ome ãbua panuu. 17 Dachiba pan ab̶a b̶uu ãrea b̶ʉakuaped̶a kobadau. Ara mau kĩra dachi ãrea panumina kakua ab̶a b̶uu kĩra nuree.
18 Israeld̶ebenarãba waubadau ʉ̃rʉbena kʉ̃risiásturu. Ãchiba ãnimara Dachi Akõremaa baa deaduud̶e mau kiurud̶ebena kobadau. Mau kooduud̶e unubibadau Dachi Akõred̶e ijãa panuu. (Ara mau kĩra ab̶auba Dachi Akõre kĩra nuree juaba kaped̶aad̶amaa kiuru baa dead̶ad̶ebena kooruubʉrã, unubii mau juaba kaped̶aad̶ad̶e ijãa b̶uu). 19 Maamina mʉʉba jarawẽa b̶uu chi Dachi Akõre kĩra nuree juaba kaped̶aad̶a biawãrabʉ. Chi maarãmaa kiuru dead̶ad̶ebena kiuru kĩra b̶uu. 20 Maamina Dachi Akõred̶e ijãad̶akaurãba kiuru ãchi Dachi Akõre kĩra nuree juaba kaped̶aad̶arã deaduud̶e biawãra jai kachiruarãmaa dea panuu. Dachi Akõremaa dea panuuwãema. Machiba mau kiuru kooduubʉrã, unubid̶ai jai kachiruad̶e ijãa panuu. Mau mʉʉba kʉ̃riawẽma. 21 Jauri kachiruamaa dead̶a basud̶e b̶uu machiba dooduubʉrã, Jesucristo oa kĩrabad̶ai baitabena basud̶e b̶uu dod̶aabai panuu. Jai kachiruamaa ãnimara kiuru dead̶a machiba kooduubʉrã, Dachi Mechiu kĩrabad̶ai baitabena kobadau kod̶aabai panuu. 22 Maka wauduubʉrã ¿Dachi Mechiu kĩrubid̶aabaika? ¿Dachi ichi audeara meserãa nuree kĩra?
Joma wáusturu ãbarãba biꞌia kʉ̃risiad̶amera
23 Waabenarãba jara panuu «Cristod̶e ijãa b̶uud̶eeba mʉʉba kʉ̃ria b̶uu kĩra joma waui b̶uu». Maamina mʉʉba jaraaruu: ne joma waui b̶umina joma dachiba wau kʉ̃ria b̶uuba dachi aid̶akau. Biawãra joma dachiba wau kʉ̃ria b̶uu waui b̶umina joma mauba ãbarã aid̶akau. 24 Ab̶au bid̶a ara ichi biꞌia b̶uai jʉrʉ b̶uabai b̶uu, maumaarã waabenarã biꞌia nuread̶amera jʉrʉ b̶uai b̶uu.
25 Kiuru nedobʉibadaumare nedobʉid̶a joma kod̶ai panuu. Maamina id̶irã́sturu mau kiuru chi Dachi Akõre kĩra nuree juaba kaped̶aad̶amaa deaped̶aad̶a bad̶a kuitaad̶ai baita, mau biꞌiwãe b̶uu a kʉ̃risia panuud̶eeba. 26 Nau iujãa maud̶e ne joma nau iujãad̶e b̶uu Dachi Mechiuba wausii. Maud̶eeba ne joma kod̶ai panuu.
27 Chi Jesusd̶e ijãawẽa b̶uuba machi kod̶amera iuruubʉrã maud̶e wã kʉ̃riaduubʉrã, wã́sturu. Ichiba dearuu kósturu. Id̶irã́sturu mau chiko Dachi Akõre kĩra nuree juaba kaped̶aad̶amaa deaped̶aad̶a bad̶a kuitaad̶ai baita, mau biꞌiwãe b̶uu a kʉ̃risia b̶uud̶eeba. 28 Maamina ab̶auba «nau kiuru Dachi Akõre kĩra nuree juaba kaped̶aad̶amaa deaped̶aad̶a» aaruubʉrã, mau korã́se ichiba mau biꞌiwãe b̶uu a kʉ̃risiai b̶uud̶eeba.a 29 Mʉʉba jarawẽa b̶uu machiba mau kiuru kod̶akau panuu. Maumaarã mʉʉba jara b̶uu chi ab̶áuburu maka kʉ̃risia b̶uu.
Ab̶auba naka kʉ̃risiai: Mʉʉba wau kʉ̃ria b̶uu wauruud̶e ab̶auba kachirua a kʉ̃risiaruubʉrã, ¿mau poyaa waukau b̶uka? ¿Mʉʉba wau kʉ̃ria b̶uu kĩra waubai b̶uka? 30 Mʉʉba chiko ʉ̃rʉbena Dachi Akõremaa ichíturu kid̶ibai aaruubʉrã, ¿sakãe waabenarãba mʉʉba chiko kooruu ʉ̃rʉbena kachirua berread̶ai panuma? Kachirua jarad̶aabai b̶uu.
31 Maamina mʉʉba jaraaruu: machi komaa panuud̶e maud̶e waumaa panuud̶e joma wáusturu ẽbẽrarãba Dachi Akõre ʉ̃rʉbena biꞌia jarad̶amera. 32 Machiba wau panuud̶eeba judiorã, judiowãerã maud̶e ẽbẽrarã Dachi Akõred̶erã kachiruad̶e b̶aebirã́sturu. 33 Ara mau kĩra mʉʉba wau b̶uud̶eeba jomaurãmaa biꞌia kʉ̃risiabii kʉ̃ria b̶uu. Ab̶aburu mʉ biꞌia b̶uai baita jʉrʉkau, maumaarã ẽbẽrarã ãrea biꞌia nuread̶amera jʉrʉbarii. Maka mʉʉba wau b̶uud̶eeba ãchiba Cristod̶e ijãad̶ai Dachi Akõreba karibamera.