Pablo bed̶ea ũribadaurãba ichi aid̶ad̶ai panuu
9
1 ¿Mʉʉba wau kʉ̃ria b̶uu wauwẽa b̶uka? ¿Mʉ Jesucristoba bʉid̶awãeka? ¿Mʉa bid̶a Dachi Mechiu Jesús unusiiwãeka? ¿Machiba mʉʉd̶eeba Dachi Mechiud̶e ijãaped̶aad̶awãeka? 2 Waabenarã ãbarãba mʉ Jesucristoba bʉid̶a kʉ̃risiad̶awẽa panumina machiba kuitaad̶ai panuu mʉ biawãra ichiba bʉid̶abʉ. Mʉʉba jaradeasiid̶eeba machiba Dachi Mechiud̶e ijãasiid̶eeba mau unubi b̶uu. 3 Chi mʉ ʉ̃rʉbena kachirua jarabadaurãmaa mʉʉba naka id̶iiruu: 4 ¿Mʉʉba jaradea b̶uud̶eeba koi baita adaubai b̶uka? ¿Doi baita bid̶a adaubai b̶uka? 5 Waabenarã Jesusba bʉid̶arã, Dachi Mechiu Jesús ãbarã maud̶e Pedro ãchi wẽrarã ome ãbua nibabadau.a Ara maarã kĩra ¿Jesusd̶e ijãa b̶uu wẽra ome kãiped̶a, mʉ ome ãbua uru nibaabai b̶uka? 6 Bernabeba, mʉa bid̶a Dachi Akõre bed̶ea jaradea nibad̶ad̶e awara traju waubadau ne uru panad̶ai baita. Maamina ¿waabenarã kĩra daiba jaradea panuud̶eeba ne adau panad̶ai panuuwãeka?7 ¿Kokoroa ara ichi chi nejarraba chĩod̶e wãbarika? ¿Chi uva uud̶a uru b̶uuba ichi uva jõbariiwãeka? ¿Oeja nubariiba oeja ju b̶aa dobariiwãeka? 8 ¿Joma mau mʉ kʉ̃risiad̶eeba jara b̶uka? ¿Moisesba b̶ʉd̶ad̶e ara mau kĩra jara b̶uuwãeka? 9 Mau b̶ʉd̶ad̶e naka b̶ʉ kub̶uu: «Pakaba ne biraduamaa b̶uud̶e chi kũ jʉ̃rã́se». Dachi Akõreba mau bed̶ea jarasiid̶e ¿paka ʉ̃rʉbenáturu kʉ̃risiabarika? 10 ¿Dachi ʉ̃rʉbena sid̶a kʉ̃risia b̶uasiiwãeka? Biawãra dachi baita Dachi Akõreba mau Moisesba b̶ʉd̶a deasii. Chi netaa uubarii maud̶e chi chaud̶a pebarii trajabadau, maud̶ebena ne uru panad̶ai kuitaa panuud̶eeba. 11 Ara mau kĩra daiba machimaa Dachi Akõre bed̶ea jaradeasiid̶eeba ¿biꞌia b̶uuwãeka daiba machid̶ebena ne adaud̶ai? 12 Waabenarãba machid̶ebena ne adaud̶ai panuubʉrã, daiba ãchi audeara biꞌia ne adaud̶ai panuu.
Maamina ne id̶id̶akau. Maumaarã joma jãadua panuu ẽbẽrarãba chi bed̶ea bia Cristo ʉ̃rʉbena kachirua kʉ̃risiarãad̶amera. 13 Machiba kuitaa panuu Dachi Akõre de mechiud̶e trajabadaurãba ãchiba wau panuud̶eeba adaubadau kod̶ai baita. Chi ãnimara baa deabadaurãba mau kiurud̶ebena adaubadau kod̶ai baita. 14 Ara mau kĩra Dachi Mechiu Jesusba jarasii chi bed̶ea bia ichi ʉ̃rʉbena jaradea nibabadaurãba maud̶ebena adaud̶ai panuu kod̶ai baita. 15 Maamina mʉʉba mau adaukau. Mau ʉ̃rʉbena nau kartad̶e b̶ʉwãe b̶uu machiba chi nejarra dead̶amera. Mʉʉba jaradea b̶uud̶eeba chi nejarra adaukaud̶eeba kĩrajʉʉ b̶uu. Mʉʉba kʉ̃riawẽma ab̶au bid̶a chi nejarra dea b̶uud̶eeba mau kĩrajʉʉ wãꞌãebii. Mʉʉmaarã machid̶ebena chi nejarra adaui kãyabãra biui bibuara b̶uu.
16 Mʉʉba chi bed̶ea bia Cristo ʉ̃rʉbena jaradea b̶umina mʉ chi mechiu akau, Dachi Akõréburu jaradeabi b̶uud̶eeba. Biawãra mau bed̶ea bia jaradeawẽebʉrã, mʉ miichuburi b̶eei. 17 Ara michi kʉ̃ria jaradea b̶uubʉrã, chi nejarra adaui b̶uu. Maamina ara michi kʉ̃ria jaradeawẽa b̶uu. Dachi Akõréburu mʉʉmaa jaradeabisiid̶eeba, mʉʉba makai b̶uu. 18 Makarã ¿mʉʉba jaradea b̶uu baita, kãare adauima? Ne adaubai. Kĩrajʉʉ b̶uai chi bed̶ea bia Cristo ʉ̃rʉbena jaradea b̶uud̶eeba. Mʉʉba jaradea b̶uud̶eeba ne adaui b̶umina ne id̶ikau.
19 Mʉ ab̶au chibari baita bid̶a b̶ari trajabariiwãed̶eeba chi jomaurã chibari baita bari trajabarii b̶eesii ãreaba mʉʉd̶eeba Jesucristod̶e ijãad̶amera. 20 Mʉ judiorã tãed̶e b̶uud̶e judiorã kĩra b̶uabarii mʉʉd̶eeba Jesucristod̶e ijãad̶amera. Chi Moisesba b̶ʉd̶a ũribadaurã nuree tãed̶e b̶uud̶e mʉ mau Moisesba b̶ʉd̶ad̶eeba b̶uuwãemina mau kĩra b̶uabarii ãchiba mʉʉd̶eeba Jesucristod̶e ijãad̶amera. 21 Maud̶e chi Moisesba b̶ʉd̶a adua nuree tãed̶e b̶uud̶e mʉ ãchi kĩra b̶uabarii mʉʉd̶eeba Jesucristod̶e ijãad̶amera. Maamina mʉʉba Dachi Akõreba Moisesmaa b̶ʉbid̶a ida b̶ukau. Joma Cristoba waubi b̶uu kĩra waubarii. 22 Chi ãbarã chi biawãra bed̶ea ãrea adua nuree tãed̶e b̶uud̶e ãchi kĩra b̶uabarii mʉʉd̶eeba Jesucristo ʉ̃rʉbena biꞌia kuitaad̶amera. Mʉ wãaruucha ẽbẽrarã tãed̶e b̶uud̶e maarã kĩra b̶uabarii mʉʉd̶eeba waabenarãba Cristod̶e ijãad̶aped̶a mʉʉba maarã kachiruad̶ebena karibamera. 23 Mʉʉba joma mau kĩra waubarii chi bed̶ea bia Cristo ʉ̃rʉbena kuitaabii baita. Maka mʉa bid̶a Dachi Akõred̶ebena ne biꞌia adaui.
24 Machiba kuitaa panuu ẽbẽrarã pirabadau kai chi aude isa pira nii kuitaad̶ai baita. Maud̶e kabanaa pirabadamina ab̶a chi naa need̶aburu ne adaubarii. Machi sid̶a isa piraaduu kĩra joma biꞌia wáusturu Dachi Akõreba deai jarad̶a adaud̶ai baita. 25 Pirabadaurãba ãchi kakua nubadau chaarea nuread̶ai baita. Maka waubadau waabenarã audeara biꞌia pirad̶aped̶a boro jũra adaud̶ai baita. Mau boro jũra isa bʉʉbarii.b Maamina dachiba ne joma biꞌia waubadau Dachi Akõreba deai jarad̶a bʉʉkau adaud̶ai baita. 26 Maud̶eeba ẽbẽra barikia pira wãaruu kĩra mʉʉba waukau. Maud̶e ẽbẽra barikia drʉ b̶uu kĩra drʉkau. 27 Maumaarã mʉ kakua chaarea wau b̶uu maud̶e mʉ kakuaba waubai b̶uu mʉʉba waubi b̶uu. Maka joma wau b̶uu Dachi Akõreba deai jarad̶a adaui baita. Maka wauwẽebʉrã, mʉʉba ẽbẽrarãmaa jaradea b̶uasmina Dachi Akõreba deai jarad̶a poyaa adaubai.