Pablo Efesod̶e b̶uad̶a
19
1 Apolos Corintod̶e b̶uumisa Pablo drua ea id̶aa b̶uare wãsiid̶e Éfeso puurud̶e neesii. Aria chi nuree Cristod̶e ijãabadaurã unusii. 2 Ichiba mau ãbarãmaa id̶isii:—Machiba Cristod̶e ijãasid̶aud̶e ¿Dachi Akõre Jauri machiba irsibisid̶aka?
Ãchiba panausid̶au:
—Daiba wabid̶a Dachi Akõre Jauri ʉ̃rʉbena ũrid̶akau.
3 Maud̶e Pabloba id̶isii:
—Maka b̶uubʉrã ¿saka boro eabisid̶ama?
Ãchiba panausid̶au:
—Juanba jarad̶a kĩra boro easid̶au.
4 Maud̶e Pabloba jarasii:
—Juanba jarabachii ẽbẽrarãba kachirua waubadau ida b̶ud̶aped̶a Dachi Akõremaa need̶amera. Maka wauduubʉrã ichiba boro eabachii. Mau awara jarabachii chi ichi kaad̶e neeruu ijãad̶amera. Mau Jesús basii.a
5 Mau ũrisid̶aud̶e Dachi Mechiu Jesús trʉ̃d̶eeba boro easid̶au. 6 Maabae Pabloba ichi jua ãchi ʉ̃rʉ kub̶usiid̶e Dachi Akõre Jauri ãchimaa neesii. Maud̶e bed̶ea didiwaraad̶e berreasid̶au maud̶e Dachi Akõre baita berreasid̶au. 7 Mau ãchi 12 kĩra panasid̶au.
8 Jed̶ako õbea Pablo judiorã araa ãbua imibadau deed̶aa wã b̶uabachii. Aria wapeawẽa judiorã ome berrea b̶uabachii Dachi Akõreba ichi warr Jesusd̶eeba, ichid̶irã ichi juad̶e ua b̶uu ʉ̃rʉbena, mau ãchiba ijãad̶amera. 9 Maamina waabenarã sõ chaareakuad̶aped̶a ijãad̶aabasii. Ẽbẽrarã daad̶e Jesús chi O ʉ̃rʉbena kachirua berreabachid̶au. Maud̶eeba Pablo jãmabena ãyaa wãsii. Ichiba chi ijãabadaurã jaradeabadau deed̶aa adoesii. Mau de Tiranod̶e basii. Aria ewaricha jaradeabachii. 10 Año ome maka wausii. Maka joma Asia druad̶ebena judiorãba maud̶e judiowãerãba Dachi Mechiu Jesús ʉ̃rʉbena ũrisid̶au.
Esceva warrarãba wauped̶aad̶a
11 Dachi Akõreba ãrea ẽbẽrarãba poyaa ne waud̶akau mechiu Pablod̶eeba waubachii. 12 Barikiu paru Pabloba jʉ̃ b̶uad̶a ẽbẽrarãba chi ẽpermo nureerãmaa adoebachid̶au. Mauba chi ẽpermo nuree aribiabiabachid̶au maud̶e jai kachiruarã sid̶a ẽbẽrarã kakuad̶ebena duabʉibachid̶au.
13 Mau ewarid̶e chi nuree judiorãba jai kachirua duabʉikua nibabachid̶au. Maarãba Dachi Mechiu Jesús trʉ̃d̶eeba jai kachirua ẽbẽrarã kakuad̶ebena duabʉikad̶ai chaa panasid̶au. Naka jarabachid̶au: «Pabloba jaradea b̶uu Jesús trʉ̃d̶eeba mʉʉba jaraaruu: ãyaa wãse».
14 Chi maka wau panuu judio Esceva warrarã basii. Maarã siete panasid̶au. Esceva paare mechiurãd̶ebena basii.b 15 Ewari ab̶a jai kachirua duabʉi panuud̶e jai kachiruaba maarã 7 ẽbẽrarãmaa jarasii: «Jesús mʉʉba kuitaa b̶uu. Maud̶e Pablo sid̶a mʉʉba kuitaa b̶uu. Maamina machi ¿kaima?»
16 Maabae chi ẽbẽra jai kachirua bara b̶uuba ãchi orra adauped̶a joma poyaakuasii. Ãrea sĩkuasiid̶eeba ãchi kakua joma kõekuaped̶a, maabae ded̶ebena ewaraa pira wãsid̶au. 17 Joma Efesod̶e nuree judiorãba maud̶e griegorãba mau kuitaasid̶aud̶e wapeasid̶au. Maud̶e Dachi Mechiu Jesús trʉ̃ ʉ̃rʉbena biꞌia berreasid̶au.
18 Mau ewarid̶e ãrea Jesusd̶e ijãa panuurã aria need̶aped̶a chi ãchiba kachirua wauped̶aad̶a jomaurã daad̶e jarasid̶au. 19 Chi jaibana kĩra kuitaa nureerãba ãchi jaradeabadau karta araa ãbua adoesid̶au jomaurã daad̶e baad̶ai baita. Joma mau karta sãabe chi nejarr juasiisid̶aud̶e 50.000 parata id̶ibachid̶au.c 20 Maka Dachi Akõreba ichi poyaad̶eeba waud̶a kakua chi Dachi Mechiu Jesús ʉ̃rʉbena bed̶ea kaitawẽ trʉ̃ poasii. Maud̶e Jesusd̶e ijãabadaurã aude baraasii.
21 Mau maad̶akare Pabloba ichi sõd̶e kʉ̃risiasii Macedonia druad̶e maud̶e Acaya druad̶e nibaped̶a Jerusalén puurud̶aa wãi. Maud̶e jarasii: «Jerusalend̶e b̶uaped̶a mʉ Roma puurud̶aa wãi b̶uu». 22 Maud̶eeba ichi aid̶abadaurã Timoteo maud̶e Erasto Macedonia druad̶aa naa bʉisii maamina ichi Asia druad̶e b̶eesii.
Éfeso puurud̶ebenarã kĩrubikaped̶aad̶a
23 Mau ewarid̶e Jesús Od̶e duanuu kakua ẽbẽrarã ãrea kĩrubikasid̶au. 24 Mau nakabachii: ẽbẽra Demetrio abadau b̶uasii. Mau ẽbẽra chi paratad̶eeba ne waubarii basii. De bistĩikau waubachii, Artemisa de mechiu kĩra.d Mau wau b̶uud̶eeba Demetrioba maud̶e chi ichi ome ne waubadaurã bid̶a chi nejarra ãrea irsibibachid̶au. 25 Demetrioba mau ẽbẽrarã maud̶e waabenarã ne waubadaurã iukuaped̶a, maabae naka jarasii: «Kõpaerorã, machiba kuitaa panuu, nau traju wauduuba dachiba chi nejarr ãrea irsibibadau. 26 Maamina machiba unu panuu maud̶e ũri panuu jãu Pabloba Dachi Akõre kĩra nii juaba kaped̶aad̶a chi biawãrawãe abarii. Ichiba nau Efesod̶e maud̶e beraa joma Asia druad̶e maka jara nii. Maud̶eeba ãrea ẽbẽrarãba Artemisa ida b̶uuduu. 27 Mauba chi dachiba ne waubadau ẽbẽrarãba mau kachirua unu paneed̶ai. Chi Artemisa de mechiu sid̶a waa trʉ̃ poa panad̶aabai. Makarã Asia druad̶e maud̶e joma nau druad̶e bid̶a chi Artemisad̶e ijãa panuuba waa aude kʉ̃risiad̶aabai».
28 Mau bed̶ea ũrisid̶aud̶e ãrea kĩrud̶aped̶a b̶ia jara duaneesid̶au: «¡Ãrea biꞌia nii Artemisa Efesod̶ebena!»
29 Maka panuud̶e joma puurud̶ebenarã kuitaa kʉ̃risiad̶awẽa pira wãurisid̶au. Maud̶e waabenarãba Pablo baara nibabadau ome jidaud̶aped̶a teatrod̶aa adoesid̶au: ab̶a Gayo basii maud̶e chi ab̶abena Aristarco basii. Maarã Macedonia druad̶ebena basii. 30 Pablo aria ẽbẽrarã ome berread̶e wã kʉ̃ria b̶uasii, maamina chi Jesusd̶e ijãabadaurãba ida bʉid̶aabasii. 31 Mau awara waabenarã Asiad̶ebena karrarãba Pablomaa jarad̶e bʉisid̶au. Ichi ome kõpaerorãd̶eeba chi chuburia id̶isid̶au teatrod̶aa wãrãamera. 32 Maud̶e ãbua duanuud̶e joma kĩrubika nub̶uasii. Maud̶e joma kĩra aꞌawaraa b̶ia duanasid̶au. Ãreaba adua panasid̶au sakãe araa ãbua duanuu.
33 Maka panuud̶e judiorãba Alejandro jʉrʉ adausid̶au ichiba kãare jarai b̶uu a jarad̶ai baita. Maabae chi puuru daad̶e wãbisid̶au, ãchimaa berreamera. Maud̶e Alejandroba juaba chũpeabiasii ichi nebʉra ʉ̃rʉbena arakʉd̶e berreai kʉ̃ria b̶uasiid̶eeba. 34 Maamina ichi judio nii kuitaasid̶aud̶e jomaurãba hora ome naka b̶ia jarasid̶au: «¡Ãrea biꞌia nii Artemisa Efesod̶ebena!»
35 Maabae mau puurud̶ebena secretarioba ẽbẽrarã chũpea panabiasii maabae jarasii: «Efesod̶ebenarã, jomaurãba kuitaa panuu, dachi puurud̶ebenarãba chi Artemisa de mechiu b̶uu maud̶e chi ara ichi kĩra juaba kaped̶aad̶a, bajãad̶ebena b̶aed̶a biꞌia nubadau. 36 Ab̶au bid̶a mau poyaa setaad̶e ad̶aabai. Maud̶eeba chũpea panad̶ai panuu. Ne waud̶ai naed̶e ãrea kʉ̃risiad̶ai panuu. 37 Nau ẽbẽrarãba dachi chi Artemisa de mechiud̶ebena nechiruad̶awẽa panumina maebʉrã ichi ʉ̃rʉbena kachirua berread̶awẽa panumina machiba namaa adoesid̶au. 38 Demetrio maud̶e chi kõpaerorã ãchi jidea kʉ̃ria panuubʉrã Romad̶ebena juezmaa wãd̶ai panuu mau jarad̶ai baita. 39 Maamina june nebʉra uru panuubʉrã, chi puurud̶ebenarã araa ãbua duanuumaa jarásturu. Maarãburu mau ichiad̶ai. 40 Mau id̶i wauped̶aad̶a kakua Romad̶ebenarãba poyaa jarad̶ai daiba kĩrubikabiad̶ai panuu. Jãarãba sakãe maka wausid̶ama a id̶iiduubʉrã ¿saka panaud̶aima?»
41 Mau jaraped̶a, joma ãchi decha bʉikasii.