Thessalonikat Paular
Seba Hamani
2
Bheilog, tumi nije hobor po, ami tomar idu ejanagan brithai no oi. 2 Tumi hobor po, Philippi sohorot ami onek hosto ar itjiot peiei. Hintu sedogkie jagulugkie sere Itchioro gom hoboran tomare janei dibartei Itchiorottei ami sahoj gorilong. 3 Haron amar uschoni tuli denagan bhulo-krome bah, aw-pobitrottun, bah thogabajittun no eje. 4 Hintu gom hoboran janei dibartei Itchiore amare thik gorsiede doge, manus hujhi goribartei noi, hintu amar ontorani shagi saidie Itchiorbuore hujhi goribartei phogodang gori. 5 Haron tumi hobor po, huno somoie ami bhulona hodaloi haror habor lubbo no gori. Itchiorbuo amar shakki age. 6 Kristor apostol ijebe ami dabi goribar theleio, tomartun ok oinnio jonottun ok manjie amare baini goribarteio no sei. 7 Hintu mabuoi tar puo shabagunore sedon seresta gorede dogkie gori, ami tomar idu niroit elong. 8 Senottei, sit puri-puri tomare ami dhap gori-gori agi. Tumi amar agojor oio hinottei, bana Itchioro gom hoboran tomare dibartei noi, hintu amar jibonanio tomare dibartei hujhi oio agi. 9 Haron bheilog, tomar monot age, ami ham gorsei ar hadoni gorsei. Itchioro gom hoboran tomare janei dede, ami tomar bugi no oi para ami reide-dine ham gorsei. 10 Ami hodog ega mone, sorol mone ar duj di no parsie gori tumi bischias gorsiode sigunor moiddie bebohar gorsei, tumi ar Itchiorbuo olode amar shakki. 11 Tumi hobor po, babe tar nijor puogunore gorede dogkie gori, ami tomare uschoni tuli diei, santona diei, ar tomare begkunore daetto diei. 12 Sieni ami tomartei gorsei, jene Itchiore tar nijor rejjioganot ar mohimaganot tomare dagkiede ienot upojukto gori soli paro.13 Ei harone Itchiorore amio no thameie gori hujhi hoda hoi. Haron amattun suinniode Itchioro hodagan tumi gojhi loio. Manjior hoda dogkie gori tumi gojhi no lo, hintu Itchioro hodagan soittio bili gojhi loio, ar sien tomar moiddie je bischias gore the dolei ham gore. 14 Bheilog, tumi Judea dejot agonde Jisu Kristor Itchioro mondoligunor leik adeie ola. Haron thara jedogkie gori Judea dejigunor adot hosto peion, tumio tomar nijor dej hulliegunottun ekkui hosto pela. 15 Sigune Probu Jisure ar tharar nijor munigunore morei phellion, ar thara amare uttiesar gorilak. Thara Itchior hujhi no goron, ar thara olakke begkunor biruddi. 16 Be-jadtune mukti pan para hobartei amare badha duon. Sedogkie gori, onsur pabpaniloi boron on. Hintu rakkan tharar ugure shanggadik gori lungiegi.
Tharare Sebartei
Paulai Dhap Gorer
17 Bheilog, hintu ami ikkie hanekkonottei tomartun pharok oi theleio, ontoredi pharok no oi. Ami tomar muoni sebartei shanggadik dhap oinei, siebes jur gorinei sesta gorir. 18 Senottei, ami tomar idu ebartei seiei. Mui, Paulaio bar bar ebar seiong, hintu Soitane amare badha die. 19 Haron amar ashagan, bah hujhigan, bah hujhir raj tukkuo hi? Amar Probu Jisu ebode lokkene tar mujungot tumi amar raj tuk obade noi ni? 20 Haron tumi olade amar bainigan ar hujhigan.